སོ་ཕག་ཁོག་སྟོང་གི་ཁང་བ་གྱན་གསུམ་པོར
སོ་ཕག་ཁོག་སྟོང་གི་ར་སྐོར་སྙིང་ལ་རྗེ་བོ་ཞིག་ཡོད
སོ་ཕག་ཁོག་སྟོང་གི་ཁང་བ་གྱན་གསུམ་པོས
ང་ཚོ་ལ་དབྱར་ཁ་བསིལ་བསིལ་གནང་དགོས་པ་དང
དགུན་ཁ་དྲོ་དྲོ་གནང་འོས་པའི་དྲན་གསོས

བསིལ་བསིལ་གནང་བྱེད་ཀྱི་རྒྱ་ལྭ་ཡོད་ན
དྲོ་དྲོ་གནང་བྱེད་ཀྱི་ཨོང་བ་ཡོད་ན
ང་ཚོ་ནི་གཏན་སྡོད་འབྲོག་པ་ཡིན
གཏན་དུ་སྡོད་རྒྱུ་ཡོང་ན
 
ལོ་སར་རེ་རེར
རྫོང་དཔོན་སྐུ་ངོས་ང་རང་དྲན་ཞིང
ཁོང་གིས་ཕྱག་གཡས་པས་གཡོན་པ་བཟུང་ཞིང་འོང
ཁོང་གི་སྐུ་འཁོར་དག་གིས་ཀྱང
ཕྱག་གཡས་པ་གཡོན་པ་རྡེག་གིན་འོང
ངས་ཀྱང་གཡས་ལག་གིས་གཡོན་ལག་བཟུང
ཡང་གཡས་ལག་གིས་གཡོན་ལག་ལ་བརྡེགས་པས
དྲོད་སྣང་དེ་བྲང་ལ་སྦྱར་ན་ཡིད་ལ་ཤར་བ
ང་ཚོ་ནི་གཏན་སྡོད་འབྲོག་པ་ཡིན
 
ད་ལོ་དགུན་ཁ་འབྲོག་པ་སྐམ་བཙོང་ཞིག་གི་ས་ནས
མ་མོ་ཤི་རོ་ཞིག་ཉོས་ཤིང
སྒྱེད་པུའི་མེ་འོད་ཀྱིས་གདོང་བ་ངར་གྱིན་ཡོད་ཚུལ་གྱིས
ཤ་ཞིག་བཙོས་པར
ཆུང་མས་ཤབ་ཤུབ་ངང་
ཤ་ལྷག་ཁྱིམ་མཚེས་ཀྱི་འཁྱག་སྒམ་དུ་བཅོལ་ན་ལབ་བྱུང
 
ང་ཚོ་ནི་གཏན་སྡོད་འབྲོག་པ་ཡིན