ངའི་སྙན་ངག
ལ་ལས།
ངའི་སྙན་ངག
རྣམ་ཤེས་བྲལ་བའི་བེམ་གཟུགས་ཤིག་རེད་ཟེར།
ང་རང་མཚོན་ན།
ངའི་སྙན་ངག
བདག་སེམས་གསོ་བྱེད་ཀྱི་ཆོས་ཆར་གྱི་བདུད་རྩི་ཡིན།
ལ་ལས།
ངའི་སྙན་ངག
སྒྱུ་རྩལ་གྱི་སྟོང་བའི་རོལ་དབྱངས་ཤིག་རེད་ཟེར།
ང་རང་མཚོན་ན།
ངའི་སྙན་ངག
ཀ་མད་སུམ་ཅུའི་ལང་ཚོའི་མཆོད་པ་ཞིག་ཡིན།
ལ་ལས།
ངའི་སྙན་ངག
བསླུ་བྲིད་ཀྱི་དགའ་མ་ཞིག་རེད་ཟེར།
ང་རང་ལ་མཚོན་ན།
ངའི་སྙན་ངག
ཕུག་མདུན་གྱི་ལམ་བུར་འགྲོ་བའི་ལམ་འཁྲིད་ཤིག་ཡིན།
ལ་ལས།
ངའི་སྙན་ངག
བཟི་གཏམ་ནུས་མེད་ཤིག་རེད་ཟེར།
ང་རང་ལ་མཚོན་ན།
ངའི་སྙན་ངག
གངས་ཕྲུག་རྣལ་མ་ཞིག་གྱི་སེམས་ཚོར་ཡིན།
ལ་ལས།
ངའི་སྙན་ངག
ས་མཐའི་སྤྲང་འཁྱམས་ཤིག་གི་ལབ་རྡོལ་རེད་ཟེར།
ང་རང་ལ་མཚོན་ན།
ངའི་སྙན་ངག
མེས་པོ་སྲོང་བཙན་དྲན་པའི་རྒྱང་འབོད་ཡིན།
ལ་ལས།
ངའི་སྙན་ངག
ཉི་མ་བཞུད་རྗེས་ཀྱི་གྲིབ་གཟུགས་ཤིག་རེད་ཟེར།
ང་རང་ལ་མཚོན་ན།
ངའི་སྙན་ངག
བྲག་སྲིན་མ་ལོའི་གཅེས་ཕྲུག་ཚོ་འཛོམས་པའི་སྒོར་གཞས་ཤིག་ཡིན།
༢༠༡༡ ༣ ༢༨ དགོང་མོར།
རྩོམ་ཁུངས། ངེད་དྲ་བ།