སྔོན་ལས་བག་ཆགས་མཐུག་པོ་དེས།།
བསླངས་པའི་ཚེ་འདིར་ཚ་བོ་ཡི།།
བསོད་ནམས་དགའ་བའི་སྙིང་གི་གཏམ།།
དྲིན་ཅན་སྤོ་བོས་ལན་ཅིག་གསོན།།
ཚེ་རབས་དུ་མར་བསགས་པའི་ཆོས།།
སྨིན་པ་མེད་ན་ཚེ་ཐོག་འདིར།།
ཁྱིམ་གཞི་གཅིག་ནས་འཛོམས་ཤིང་བརྟེན།།
སྐལ་བའི་ཉི་མ་ག་ལ་འཆར།།
ལྷག་པར་ཕ་མའི་ཚུལ་བཟུང་ནས།།
ཆུང་ནས་བྱམས་བརྩེ་དྲོད་ཁོལ་གྱིས།།
གཡས་ནས་སྐྱོར་ཞིང་གཡོན་ནས་འདེགས།།
མིག་འབྲས་སྙིང་ཡང་དམན་སར་བཀོད།།
བརྡ་དང་གོམ་འགྲོས་ཐུབ་ཙམ་ནས།།
ཁྱོད་ཀྱི་བྱམས་སྐྱོང་བསིལ་ཆར་དེས།།
གཉོམ་པའི་ལང་ཚོའི་ལྗང་གསར་གྱི།།
སྐྱེ་སྟོབས་ཁོ་ལག་རྒྱས་པར་མཛད།།
ལྷག་པར་འབྱུང་གཞི་འཁྲུགས་པ་ཡི།།
མི་འདོད་ནད་ཀྱིས་གཟིར་བའི་དུས།།
ན་ཟུག་རང་ལ་སྨིན་པའི་ཚུལ།།
ལེགས་འཆང་ནད་གཡོག་ཁྱོད་ལས་སུ།།
དགོན་དང་གྲོང་ཁྱེར་ཆེ་ཕྲས་མཚོན།།
ཆུང་ནས་མཇལ་སྐོར་ལྟད་མོར་བྱིན།།
བདག་གི་བྱིས་བློའི་མཚན་དབྱིངས་ལ།།
སྤྲོ་དགའི་སྐར་མའི་ཕྲ་ཚོན་བཏབ།།
བུ་ངའི་འཚོ་བའི་ཟུར་རེ་ནས།།
སེམས་ཀྱི་ལག་པས་དམ་བཟུང་བ།།
བུ་གཅིག་རྗེས་ལ་མ་ཡི་སེམས།།
འགོག་མེད་སྨྱོན་པའི་བརྟུལ་ཞུགས་བཟུང་།།
འཇིག་རྟེན་བརྩེ་བའི་བཅུད་བསྡུས་པ།།
ཁྱོད་ཀྱི་ཤ་ཚའི་སྙིང་གི་མགུར།།
ཁོ་བོའི་སྦྱངས་བརྩོན་དོ་ར་ནས།།
སྙན་སྙན་སེམས་ཀྱི་ཟབ་སར་གྱེར།།
ད་ནི་སྐྲ་ལོ་གཤིན་རྗེས་བཟུང་།།
གཟུགས་ཕུང་གཞུ་ལྟར་འཁྱོག་པར་བཀུག།
སྐད་ངག་མི་སྡུག་ལྡབ་ལྡིབ་སྨྲ།།
ཉི་ཤུའི་ལང་ཚོ་སུ་ཡིས་འཕྲོག།
དྲན་པའི་དུས་ཀྱི་ཉིན་མོ་ལ།།
ལྷ་ཕྲུག་ལྟ་བུའི་གཞོན་ཤ་རྒྱགས།།
བླ་མེད་དཔའ་སྣང་མཐོན་པོ་ཡིས།།
གཞལ་ཡས་ཕོ་བྲང་དམའ་མོར་ཕབ།།
གང་གི་བཀའ་དྲིན་ཉི་མའི་འོད།།
ཚེ་རབས་ཕྲེང་བར་མི་ནུབ་པར།།
གཡུང་དྲུང་རྡོ་རྗེ་རང་གཤིས་སུ།།
གྱུར་ཅིག་སྤོ་བོ་ཁྱེད་ཀྱིས་དགོངས།།
ཐུང་ལ་སྡུག་པའི་མི་ཚེ་འདིར།།
ཕ་མ་ལས་ཀྱང་དྲིན་མཐོ་བ།།
ཁྱོད་ཀྱི་ཚེ་ལོ་བསྐལ་བ་བརྒྱར།།
ཐུབ་པར་མཆོག་གསུམ་གྲོགས་སུ་ཤོག།
 

རྩོམ་ཁུངས། ངེད་དྲ་བ།