ཐ་མག་རྐང་གཅིག་མཉམ་དུ་འཐེན་པའི་མི་ལོ་བཞི
ཨ་རག་ཁམ་གང་མཉམ་དུ་འཐུང་བའི་མི་ལོ་བཞི
ཕྱི་སྐད་ཀྱི་ཐ་སྙད་རེ་རེ་མཉམ་དུ་བཀླགས་པའི་མི་ལོ་བཞི
མི་ལོ་བཞི  མཁའ་ཡི་འཇའ་ཚོན་བཞིན་ཡལ་ཐལ
མི་ལོ་བཞི  ཞོགས་པའི་བསིལ་བ་བཞིན་འཐོར་ཐལ

མི་ལོ་བཞིར  རྒྱལ་ཁ་དང་ཕམ་ཁའི་དཔའ་ཀློང་ནས་ལངས་འགྱེལ་བྱས་མྱོང་ལ
ཐོབ་པ་དང་ཤོར་བའི་འཐུ་འོག་ནས་གཡུལ་འཐབ་ཡང་བྱས་མྱོང

ང་ཚོ་རྒྱང་རིང་རྒྱང་རིང་ཞིག་ཏུ་འགྲོ་དགོས་པའི་བཞུད་ལམ་དུ
ངས་རང་གི་བླ་སྲོག་ལ་ཡང་ཡིད་ཆེས་དཀའ་བའི་རྨི་ལམ་ཞིག་རྨིས་འོངས
བྱ་རྒོད་གྱི་གཤོག་ཟུང་ལྟ་བུའི་འུ་བུ་ཅག་གི་ལང་ཚོ
ཅིའི་ཕྱིར  ས་སྲོས་ཀྱི་གྲིབ་འོག་ཏུ་ཡལ་དགོས་བྱུང་ངམ

ཉི་ཟླའི་མིག་ཆུས་བརླན་པའི་ས་ཆེན་གྱི་རྩིག་ལྡེབས་ངོས་སུ
སྒྲོན་མེ་དང་སྨོན་ལམ་གྱི་འུར་ཆོམ་རེ་ལ་རྣ་བ་གཡར་བཞིན
ཀྱག་ཀྱོག་གི་བཞུད་ལམ་རིང་མོར་གདུང་རྟས་ཕྱིར་མིག་འཕངས
ངས་སེམས་ངོགས་སུ་ཁ་བ་བཞིན་འབབ་པའི་ཁྱོད་ཀྱི་དགོད་སྒྲ
ངས་མིག་ལམ་དུ་བསང་འོད་བཞིན་འབར་བའི་ཁྱོད་ཀྱི་འཛུམ་ཞལ
ཁྱོད་ནི་ནམ་ཡང་བདག་གི་བླ་སྲོག་ལ་འཐིམས་པའི་སྙིང་གི་ཕྱེད་ཀ་ལགས

ཁྱོད་རང་འདི་ལྟར་བཞུད་སོང
ང་ལ་གདུང་སྡུག་དང་མིག་ཆུས་ཕྲེང་ཐག་རྒྱུན་ཆད་མེད་པ་ཞིག་བཞག་ནས
ང་ལ་སྨྲེང་སྐྱོ་དང་ཕྱིར་དྲན་གྱི་ན་ཟུག་བཟོད་བརླག་མེད་པ་ཞིག་བཞག་ནས
གཏན་དུ་ཕྱིར་འོངས་མེད་པའི་ལོ་ཟླའི་ལྟེབས་ཁུག་དུ་བུད་སོང
མཆོད་མེ་རྐོང་གང་འདི་ངས་ཁྱོད་ལ་ཕུལ་བའི་ཆེས་མཐའ་མཇུག་གི་སྐྱེལ་མ་ཡིན
སྨོན་ལམ་གང་མྱུར་འདི་ངས་ཁྱོད་ལ་བསྟན་པའི་ཕྱོགས་གསལ་གྱི་དཔལ་འབར་ཡིན

ལོ་ཟླ་ལ་ཁྲེལ་གཞུང་ཡོད་པར་སྨོན  གནམ་རྒན་མར་མིག་ཟུང་ཡོད་པར་སྨོན
ངའི་ཟུངས་ཁྲག་དུ་འཐིམས་ནས་བླ་སྲོག་དུ་གནས་པའི་ཁྱོས
ཡང་བསྐྱར་ཁྱེའུ་ཞིག་གི་རང་གཟུགས་སྟོན་བཞིན་ཕྱིར་ཕེབས་ཤོག
ང་ཚོས་མཉམ་དུ་རྒྱང་སྐྱོད་བྱེད  ང་ཚོས་མཉམ་དུ་སྙན་ངག་འབྲི
                                                       2011.1.7ཉིན།