བྱང་སྐར་གཅིག་གི་ལས་དབང་།
དྲན་སྣང་ཀློང་ན་འཁྱགས་སིབ་སིབ་ཀྱིས་བཞུར་བའི་དལ་འགྲོ་རིང་མོ།
ཁུག་པ་བརྒྱ་ཕྲག་གི་དཀའ་བ་བརྒྱུད་ལ།
གྲང་ངར་གཏུམ་པོ་ཡི་བཀག་བསྐྱིལ་གཏོར་ཏེ།
གཡང་གཟར། རྩྭ་ཐང་། གྲོག་རོང་།
བཞུར་ནས་བཞུར་དུ་འགྲོ
དགུ་ཚིགས་བྱང་ངོས་ཀྱི་སྐར་མ་འོད་ཆེན།
ན་ཟུག་གི་རུམ་བྲོ་མང་པོ་འཛུམས་མདངས་ཀྱི་ལྷུང་བཟེད་དུ་བཅུག་ལ།
བརྙས་དམོད་ཀྱི་གཏམ་རྒྱུད་མོད་པོ་ཞི་དུལ་གྱི་རྩྭ་ཐང་དུ་བཀྲམས་ཏེ།
ནམ་ཡིན་ཡང་ཡིད་ཆེས་དང་སྤྲོ་སྣང་གིས་འཇིག་རྟེན་གྱི་ཡུལ་གྲུ་འདི་ལ་ཀེམ་ཀེམ་ལྟ།
བདེན་ཏེ།
དགུ་ཚིགས་བྱང་ངོས་ཀྱི་སྐར་མ་འོད་ཆེན་དེ་ནི་ཁྱེད་རང་ཡིན་ལ།
ཟླ་བའི་ཕུགས་བསམ་གྱི་རེ་བཞག་འཁོར་སའང་ཁྱེད་རང་ཡིན།
རྣམ་དག་གི་སེམས་པ་ལ་ལྟོག་གེ་བའི་རྣམ་ཤེས་འཁྲུངས་བའི་དུས་དེ་རིང་།
དགུན་ཟླ་རྭ་བའི་ཁ་བའི་འདབ་མ་ས་གཞིས་བསྡམས་སོང་།
དབྱར་ཟླ་དྲུག་པའི་མེ་ཏོག་སེར་ཆེན་བད་ཀྱིས་བཅོམ་སོང་།
ཡིན་ནའང་།
སྟོན་ཟླ་བརྒྱད་པའི་སྡོང་ལོ་སེར་པོ་རླུང་གིས་དེད་ལ།
དཔྱིད་ཟླ་གཉིས་པའི་ཆུ་ནག་༼ཁོ་མོས༽་མི་སྡུག་པའི་ཉམས་སྟོན་རུང་།
བྱང་སྐར་ཁྱེད་ཉིད་སྔར་བཞིན་ནམ་མཁའི་བྱང་ཕྱོགས་ཀྱི་མཐའ་མཚམས་དེ་ན།
ཀྲོང་ངེར་འགྱིང་ལ།
གསལ་ལེར་འཚེར།
ལོས་ཡིན་ཏེ།
བྱང་སྐར་དེ་ནི།
མི་ཡུལ་འདིའི་སྐྱ་རེངས་བསུ་བའི་༼ཕོ་ཉ་༽ཐོག་མ་དང་།
ས་སྒང་འདིའི་རྨོངས་མུན་དཀྲོགས་པའི་༼ཀི་སྒྲ་༽དང་པོ།
བྱང་སྐར་དེ་ནི།
མི་ལུས་ལ་དྲོད་སྣང་སྦྱིན་པའི་༼ནས་ཆང་སྔོན་མོ་༽དང་།
བརྩེ་བ་ལ་དྲོད་མདངས་རྒྱས་པའི་༼སྙིང་གཏམ་གསོན་པོ༽།
དེ་བས།
ཧི་མ་ལ་ཡའི་གཟི་བརྗིད་དང་མ་ཕམ་གཡུ་མཚོའི་སེམས་རྒྱ་བསྣམས་ཏེ།
གཡུ་མདོག་གི་ལྗོངས་ཁམས་ཤིག་ལ་རེ་བ་དང་ཡིད་ཆེས་ཀྱིས།
དགུ་ཚིགས་འགྲམ་ངོགས་ན་ཀྲོང་ངེར་འགྱིང་ལ།
གསལ་ལེར་འཚེར།
༢༠༡༡ལོའི་ཟླ་5པོའི་ཚེས་8ཉིན་དུད་སྤྲིན་གྲོང་ནས།
རྩོམ་ཁུངས། ངེད་དྲ་བ།