བདེ་བར་གྱིས་ཤིག ཞེ་མཐུན་མ།
མིག་ཟུང་ལས་མཆི་མ་ཞིག་ལྷུང་ལ་ཁད
མགྲིན་པ་ལས་སྐད་ཆ་ཞིག་བཤད་ལ་ཁད
བཤད་ལ་ཁད་ཀྱི་སྐད་ཆ་འདི
ལྷུང་ལ་ཁད་ཀྱི་མཆི་མ་འདི
ཁྱོད་འགྲོ་ཁའི་རྣམ་དག་གི་སེམས་པ་ཡིན
དཀར་བོང་བོང་གི་དྭངས་གཙང་གི་སེམས་པས
ཞི་འཇ་མ་གྱིས་ཁྱོད་ལ་རེག་རེག་བྱེད་བཞིན
ཁྲ་རིལ་རིལ་གྱི་མིག་ཟུང་གི
གཉོམ་ཆུང་གིས་ཁྱོད་ལ་ཡང་ཡང་ལྟ་བཞིན
ལྷུང་ལ་ཁད་ཀྱི་མཆི་མ་འདི་ཁྱེར་ནས
བཤད་ལ་ཁད་ལ་ཀྱི་སྐད་དེ་སྦྲུམ་ནས
ཁྱོད་ལ་འཐམས་པའི་ལག་འཇུ་དལ་གྱིས་ལྷོད་བྱུང
བདེ་བར་གྱིས་ཤིག ཞེ་མཐུན་མ
རུས་རྐང་གི་འགུལ་བསྐྱོད་མ་འཐོར་ན
ཟུང་ཁྲག་གི་རྒྱུ་བ་མ་འགག་ན
ལག་ཟུང་འདི་ཡང་བསྐྱར་སྦྲེལ་བའི་ཉི་མ་ཞིག་ལོས་ཡོད
ལག་ཟུང་འདི་ཡང་བསྐྱར་སྦྲེལ་བའི་ཉི་མ་ཞིག་ལོས་ཡོད
2011．5．1ཉིན།
རྩོམ་ཁུངས། ངེད་དྲ་བ།