ལུང་རིགས་ཐལ་འགྱུར་གྱི་རྟགས་གསལ་མ་གཏོང་།།
སྙིང་བོ་ཡོད་མེད་ལ་རྩོད་པ་མི་བྱེད།།
རིང་གི་མིག་ལམ་གྱི་དངོས་པོའི་རིན་ཐང་།།
རང་སེམས་ཁོ་ན་འདིའི་ཐག་གིས་བཅད་འགྲོ།།

ཁ་ངོ་ཡག་བཙོག་ལ་འབྲེལ་བ་མེད་ཀི།
ཡིད་གཞུང་དྲངས་བ་དང་གཤིས་ཀ་འཇམ་ནས།།
སེམས་ཀྱི་དུངས་པ་འདི་ཁྱོད་ལ་ཤོར་ན།།
སྙིང་གཅེས་ལོག་ལོག་ཏེ་ཁྱོད་རང་ཡིན་ནོ།།

སོ་སྐྱེས་འུ་ཅག་གིས་འཁྲབ་པའི་གློག་བརྙན།།
སྐྱེས་བུ་དམ་པ་རྣམས་ངུ་ཁ་འཆོར་ཡང་།།
རང་གི་ནུས་ཚོད་པོ་འདི་ཙམ་ཡིན་པས།།
གནོང་འགྱོད་མཆི་མ་ཞིག་རང་ལ་མི་འདུག།

དགའ་བ་དུངས་པ་འདི་སྐད་ཅིག་འགྱུར་ན།།
འཇིག་རྟེན་འཁོར་བ་འདི་ནམ་ཞིག་སྟོང་ལ།།
འགྱུར་མེད་བརྩེ་བ་ཞིག་ཡོད་པའི་རྐྱེན་གྱིས།།
འཁོར་བ་མ་སྟོང་བར་ཡོད་པ་འདི་རེད།།

དམ་པའི་ལྷ་ཆོས་ཀྱི་ལོ་རྒྱུས་རིང་བ།།
འཇིག་རྟེན་མི་ཡུལ་གྱི་མི་ལ་ཐུག་ཡོད།།
ད་དུང་དོན་སྙིང་གི་རིན་ཐང་ཡོད་པ།།
འཁོར་བ་སྡུག་བསྔལ་གྱི་རྒྱ་མཚོར་རག་ལས།།

དེ་བས་སྙིང་གྲོགས་ཀྱི་མི་མོ་ཁྱོད་དང་།།
འདས་བའི་ལོ་ཟླ་ལ་སྙིང་གཏམ་བཤད་པ།།
སེམས་ཀྱི་ངལ་བ་ཙམ་གསོ་བའི་ཆེད་མིན།།
མཐའ་མར་འབྲས་བུ་ཞིག་ཡོད་པར་སོམས་དང་།།

ཉི་མ་ནུབ་བཞུད་ཀྱི་ས་སྲོད་རེ་ལ།།
ཡིད་ཀྱི་དྲན་པ་འདི་ཕྱིར་ལ་བཀུགས་ན།།
ལྷད་མེད་བརྩེ་བ་ཡི་སྙིང་གཏམ་བཤད་སའི།།
ཕ་ཡུལ་འབྲོག་ལྗོངས་ཀྱི་རྩྭ་ཐང་དྲན་ཡོང་།།

གཤིས་ཀ་གཡང་དཀར་ཀྱི་བལ་ལས་འཇམ་ལ།།
སེམས་པ་དངུལ་དཀར་གྱི་མདོག་དང་འདྲ་བས།།
ཚིག་གཅིག་ཚིག་གཉིས་ཀྱི་སྙིང་གཏམ་གླེང་བ།།
ཁ་དང་ཁོག་པ་གཉིས་སོ་སོར་མི་འགལ།།

བྲལ་དུས་སྐྱོ་གདུང་གི་མིག་ཆུ་མ་གཏོང་།།
རང་ལུས་བདེ་ཐང་ལ་གནོད་པ་ཆེའོ།།
འཛོམས་དུས་མི་བྲལ་ཞེས་མནའ་ཚིག་མ་བོར།།
སྔོན་བསགས་ལས་དབང་གི་བཀའ་འདི་བཙན་ནོ།།

མི་ཆེན་དགོན་ཆེན་རྣམས་དཔང་བར་བཞག་ནས།།
ཆེན་པོ་མནའ་རྒན་ཞིག་བསྐྱལ་དོན་མི་འདུག།
འགྱུར་མེད་བརྩེ་བ་ཞིག་ཡོད་པ་བདེན་ན།།
མི་ཚེ་འགྲུལ་བཞུད་ཀྱི་ལམ་ནས་བལྟས་ཆོག།
                                      ༢༠༠༩  ༧  ༩ ལ།

རྩོམ་ཁུངས། ངེད་དྲ་བ།