རང་སྣང་རྩེན་ལ་དོད་པའི་མགྲིན་གླུ་འདི།།
སྲ་འཐས་རྨི་ལམ་དཀྲོགས་པའི་སྐྱ་རེངས་བརྡ།།
སྤྱོམ་ཚིག་ངག་གི་འཆའ་བའི་རྐང་རུས་དེ།།
འཐོར་རླུང་བྱེ་མས་འགེམ་བཞིན་སྙིགས་སུ་སྦས།།

ངེས་ཤེས་ལྕགས་ལ་གཙུབ་འདྲའི་རྣོ་ངར་གྱིས།།
མཐོང་ལམ་བྲེད་དུ་གཉོམ་པའི་ཨ་ཙ་མ།།
ཡིད་འོང་ཞེ་ལ་འཁྲེན་པའི་དབྱངས་རྟ་ཞིག།
ནམ་ཞར་ཤེས་བློ་བསྙིལ་བའི་ཕུང་བོ་ཟད།།

བསམ་གཏན་དམིགས་ལ་སྒོམ་པའི་བརྟན་བརླིང་གིས།།
གསར་བྱུང་བློ་ཡི་འབྱེད་པ་གདོལ་དུ་བདས།།
ཕྲ་ཐུང་བསམ་པའི་འཁོར་བ་བྲན་བསྒྱུར་གྱིས།།
རང་མགོ་རྡོག་ཏུ་བརྫིས་པའི་ན་ཟུག་སྐྱེས།།

བདེན་དོན་ཚད་མས་འགྲེལ་བའི་རྟོག་གེ་བ།།
འཕག་འཚག་ངར་གྱིས་དགྱེ་བའི་སྙིང་དུ་རྒྱུ།།
རང་སྲོག་འབེན་དུ་འཛུགས་པའི་སྙིང་སྟོབས་ཤིག།
བབ་ཅོལ་གསོག་གསོབ་སྐལ་གྱིས་འཕྲོག་ལ་འཁྱེར།།

སྤྱན་ཆབ་སེམས་སུ་གདུ་བའི་ཚ་རྔམ་གྱིས།།
འདོད་ཡོན་ཆར་ཟིལ་འབེབས་པའི་སྲོག་རྟ་བརླན།།
དྲོད་ཁོལ་མེ་རུ་བསྒྲོན་པའི་འཇམ་རེག་གིས།།
འཆར་ཡན་སྤྲིན་དང་འདྲེས་ཏེ་ཀློང་དུ་བརྡོལ།།

བག་རེ་སྙན་འཇེབས་འོངས་པའི་གཅམ་བུའི་སྐད།།
ཚུགས་མེད་གཤིས་ལུགས་བོར་བའི་ཧར་གཏམ་དགྱེ།།
མིག་ལྟོས་ཕྱི་ཐག་གཡེལ་བའི་རྣམ་རྟོག་གིས།།
རང་སེམས་རང་གིས་གསིལ་བའི་ཨ་ཐང་ཆད།།

རྒྱང་འབུད་དུང་གིས་བཤགས་པའི་སྒྲ་འཛིན་འདི།།
སུན་སྣང་བོགས་སུ་ཐོན་པའི་སྡང་མིག་འཁུ།།
ལེགས་ཉེས་རྨོངས་སུ་འགུགས་པའི་སྦྱོར་བ་དེས།།
ཅི་ཡིན་མ་འཚལ་རོ་ལངས་གྱེན་དུ་ཀེར།།

བདེན་སྣང་ཁུ་སིམ་འཁྱར་བའི་བར་སྣང་དུ།།
རྣམ་ཤེས་རླུང་གིས་འགྲིབ་པའི་བེམ་རོ་ལྟུང་།།
ཚེ་སྲོག་རྨང་ནས་བཀུམ་པའི་གླེན་རྟགས་སུ།།
ལོ་རྒྱུས་ཐ་སྙད་དག་ནི་རྒྱང་དུ་སྤྱུགས།།

        ༢༠༡༡.༤.༢.ཉིན་མལ་ཤག་ནས།
 

རྩོམ་ཁུངས། ངེད་དྲ་བ།