རི་གླུ་ལྟ་བུའི་འབོད་པ་དེ
        མཛའ་ན་མོ་ཁོ་ནའི་གདུང་བ་ག་ལ་ཡིན
        མཐོ་ས་རེ་བུད་དང་  ཡང་ན་
        ཁུ་སིམ་པའི་མཚན་མོའི་བྲང་གཞུང་ལ་ཉན་ཚེ
        འུར་ཟིང་གིས་ཁེངས་པའི་ལོ་ཟླ་དེ་ཚོར
        རི་ཉུལ་ཐང་ཉུལ་བྱེད་པའི་མཚན་མོར་མང་པོར
        ན་ཟླ་ཚོ་རེ་རེ་བཞིན་བརླགས་སོང་སྐད

        འཚོ་བའི་སྙིང་པོ་ཡ   
        མུན་ནག་དེའི་དབང་གིས
        ཟུག་གཟེར་གྲངས་མེད་ཀྱི་རྨ་ཁ་ཟབ་མོ་འམ
        མངོན་སུམ་འཛེམ་མེད་ཀྱི་ཁྲག་ཐིགས་རེ་རེ
        གཉེན་ཉེ་ཚོའི་ལས་སྐལ་དུ་བབས་སོང
        གཉེན་ཉེ་ཚོའི་མིག་ཆུ་རུ་གྱུར་སོང
       
        ཧ་ཅང་གཉོམ་པའི་གཉེན་ཉེ་ཚོའི་ངུ་སྐད
        སེམས་ཁར་བབས་པའི་སྐྱོ་གདུང་སྟེ
        ཐག་རིང་ཞིག་ནས་ལོ་ཟླ་མང་པོ་བཞུར་སོང་ཡང
        རི་བོ་ཕ་རོལ་ནས་ཡང་ཡང་རྙེད་པའི་ཚོར་བ
        ངའི་སྙན་ངག་གི་བླ་སྲོག་ལ་འཐིམ་སོང
        ངའི་སྙན་ངག་གི་རིན་ཐང་ལ་འཐིམ་སོང