ཚིག་རེ་གཉིས་ཀྱིས
ང་ཚོའི་བར་ཐག་གི་དྲོད་ཁོལ་ཚོར་དཀའ་ནའང
ཁྱོད་ཕྱོགས་སུ་བཞུར་བའི་སེམས་པ
མཚན་མོའི་རྔམ་ཁ་ལས་བརྒལ་སོང

རང་ལ་དབང་བའི་སེམས་ཚོར་རྣོན་པོས
གྱེས་ཁའི་སྣང་བརྙན་གྱི་རི་མོ་བསུབ་མ་ཐུབ
དེའི་རྐྱེན་གྱིས འཁྲང་སེམས་དམར་པོ
ནམ་ཡང་རེ་སྒུག་གི་འདུན་མར་འཁྱུད་ཡོད

ཁེར་རྐྱང་གི་ཉིན་མཚན་ཁྲོད
དཔུང་ཁག་གཅིག་པའི་རྨི་ལམ་དེ་སྲུང་ནས
རྡོ་སྐས་དྲོན་མོའི་གཏམ་རྒྱུད་དེ་གླེང་ནས
འདས་པའི་ལོ་ངོ་ལྔ་བཅུ་ཕྲག་ལ་ཁུར་ཏེ
གོམ་སྟབས་ཆེན་པོས་ལོག་ཡོང་གི་ཡོད

རང་དབང་གི་ཁ་དབུགས་འཇམ་པོས
ཕྱིར་དྲན་གྱི་ན་ཟུག་བསླངས་སོང
བདེན་དོན་གྱི་རྨ་ཁ་ཟབ་མོས
གླུ་དབྱངས་ཤིག་ལེན་པའི་སྤོབས་པ་གནང་སོང

དྲན་སྣང་རྒོད་པའི་ས་མཐའི་ཐུ་འོག་ནས
གོམ་གང་མདུན་སྤོས་ཀྱིས
སྐྱོ་གདུང་ཚད་མེད་རྡོག་པོས་གནོན་བཞིན
ངལ་དུབ་གྲངས་མེད་རྒྱབ་ལ་གཡུག་བཞིན
ལོག་ཡོང་གི་ཡོད ཁྱོད་ཀྱི་དོན་དུ
                          ༢༠༠༨།༣།༣༡

རྩོམ་ཁུངས། ངེད་དྲ་བ།