ལོ་རྒྱུས་ཀྱི་གཉའ་བར་དུ་འགྱིང་བའི་གནའ་བོའི་རི་གྲོང་ཆུང་ཆུང་དེར།
སྟེས་དབང་གིས་ཕྲད་ཅིང་སྟེས་དབང་གིས་འདྲེས་པའི་ཀོ་རི་ཡའི་བུ་མོ་ལགས།
མཛེས་སྡུག་གང་ཞིག་གིས་སྦགས་པའི་འཚིག་ཇ་ཕོར་གང་གི་སྔ་གཞུག་ཏུ།
རྡུལ་མཚོན་ལས་རྣོ་བའི་ཁྱོད་ཀྱི་ཟུར་མིག་དང་འཛུམ་མདངས།
བདག་གི་འཇིག་རྟེན་དུ་ཁད་ཀྱིས་འཛུལ་ནས་སླེབས་བྱུང་ལ།
མུ་ཏིག་བཞིན་འཚེར་བའི་ཁྱོད་ཀྱི་དྭངས་གཙང་དང་རེ་སྨོན།
བདག་གི་གཙང་ངོགས་སུ་གཡོར་གྲུ་བཞིན་ལྷོད་ཀྱིས་སྐྱོམ་བཞིན་ཕེབས་བྱུང་།
 
བརྩེ་དུངས་དང་མི་གཤིས་ཀྱིས་ལྡེམ་པོར་སྐྱོར་བའི་ཀོ་རི་ཡའི་བུ་མོ་ཁྱེད།
དོན་ངོ་མར།       དུས་ཚིགས་གང་ཞིག་ལ་བརྐུངས་པའི་རྒྱང་རིང་གི་ཁུ་བྱུག་ཡིན།
ད་དུང་ཡིད་ཆེས་དང་རེ་བཞག་གིས་ཁེངས་པའི་ཉམ་ཆུང་གཞོན་ནུ་མ་ཁྱེད།
འཇིག་རྟེན་གང་ཞིག་ནས་ཕེབས་པའི་བརྩེ་དུང་གི་ཕོ་ཉ་ཡིན།

བསླུ་བྲིད་ཀྱིས་ཡོངས་སུ་བཏང་པའི་ཉིན་མཚན་གང་མང་གི་ངོགས་སུ།
ཁྱེད་རང་མི་ཡུལ་ཁོ་ནར་ཡོད་པའི་དུངས་སེམས་ཀྱི་ལྷ་མོ་ཞིག་གི་ཚུལ་དུ།
བདག་ཁོ་ནའི་འཇིག་རྟེན་དུ་བབས་ཤིང་བདག་ཁོ་ནའི་འཇིག་རྟེན་དུ་ལྷོད་ཀྱིས་ཐིམ་དུས།
ངས་རང་ཉིད་གནམ་འོག་འདིའི་བརྩེ་དུང་གི་རྒྱལ་སྲས་ཡིན་པའི་ངེས་ཤེས་ཐོག་མར་རྙེད་སོང་ལ།
ངས་ཚེ་སྲོག་གི་གཏིང་མཐར་བཞད་པའི་མཛའ་དུངས་ཀྱི་མཛེས་སྡུག་ཐོག་མར་མཐོང་བྱུང་ཨང་།

དྭངས་གཙང་དང་ལྷིང་འཇགས་འཁྱིལ་བའི་མཚན་མོ་རེ་རེར།
ཟླ་འོད་དང་སེམས་པ་མཉམ་དུ་བཞུར་བའི་ཞི་འཇགས་ཀྱི་སྒེའུ་ཁུང་འགྲམ་དུ།
ཁྱེད་ཀྱི་གསལ་ལ་མི་གསལ་བའི་ཀོ་རི་ཡའི་སྣ་གླུ་ཐུང་ཐུང་དེ་དག་དང་།
ད་དུང་ཁྱེད་ཀྱི་དག་ལ་མི་དག་པའི་བོད་སྐད་ད་མ་དིག་དེས།
ཐེངས་ག་ཚོད་ཅིག་ལ་བདག་གི་ཡོད་ཚད་བཟི་རུ་བཅུག་མྱོང་བ་ཁྱེད་ཁོ་ནས་ཤེས་ཨང་།
ཁྲེལ་གཞུང་ཅན་གྱི་རྒྱང་རིང་ཀོ་རི་ཡའི་བུ་མོ་ལགས།

གཟའ་མཇུག་གི་གུང་གསེང་རེ་རེ་དབུགས་དབྱུང་ཞིག་གི་ཚུལ་དུ་སླེབས་དུས།
རོལ་དབྱངས་དང་གློག་འོད་མཉམ་དུ་བཞུར་བའི་ཆང་ཁང་དེ་དག་ཏུ།
ཁྱེད་རང་སུ་ལའང་སྨོན་མི་དགོས་པའི་བུད་མེད་གཞོན་ནུ་མ་ཞིག་གི་ཚུལ་གྱིས།
བདག་གི་དཔུང་པར་འཇུས་ཤིང་བདག་གི་ཕྲག་པར་བསྙེས་ནས་ཐེངས་མང་བསྐྱོད་མྱོང་ཨང་།
སྐབས་དེ་དག་ཏུ།           ཏག་ཏག་མཉམ་འཛོམས་ཀྱི་སྐབས་དེ་དག་ཏུ།
ངེད་གཉིས་ཀྱི་འཇིག་རྟེན་ཡོད་ཚད་འཛུམ་མདངས་དང་དགོད་སྒྲ་ཡིན་ལ།

ངེད་གཉིས་ཀྱི་འཇིག་རྟེན་ཡོད་ཚད་དུངས་སེམས་དང་མཉེས་གཤིན་ཁོ་ན་ཡིན།
ལས་དབང་ལ་གདོང་གཏད་དགོས་པའི་མཐའ་མཇུག་གི་མཚན་མོ་དེར།
སྨྲ་བ་མེད་ཅིང་དབུགས་རིང་མང་བའི་གནམ་གྲུའི་འབབ་ཚིགས་དེར།
མིག་ཆུས་ཡོངས་སུ་ཁེངས་པའི་ཁྱེད་ཀྱི་འཁྲེང་ཞེན་གྱི་མིག་མདངས་དེ་དང་།
ཅི་ཞིག་གིས་བསྣངས་པའི་ཁྱེད་ཀྱི་སྨྲ་བརྗོད་ལ་ག་ལེར་སེམས་པ་གླན་དུས།
བདག་གི་འཇིག་རྟེན་ཡོད་ཚད་བརྩེ་དུང་གིས་ཤིག་ཤིག་འདར་བྱུང་ཨང་།
མིག་ཆུ་དང་ཁ་བཏགས་ཁྲོད་ནས་བཞུད་ཟིན་པའི་ཀོ་རི་ཡའི་བུ་མོ་ལགས།
                                                            ༢༣/༠༧/༢༠༡༡

 

རྩོམ་ཁུངས། ངེད་དྲ་བ།