འདི་ནི་འཇའ་ཟེར་ཞིག་གི་ཡས་སྣེ་ཡིན་འདྲ།།
འདི་ནི་འཇའ་ཟེར་ཞིག་གི་མས་སྣེ་ཡིན་འདྲ།
སློང་སློང་གཙང་བོའི་ཀློང་ནས་ཆད་དེ་ཡོང་འདྲ།
དཀར་ཟིལ་ཆིལ་བ་ཞིག་གི་ངོ་བོ་ཡིན་འདྲ།།

གནམ་ས་གཅིག་ཏུ་བསྣོལ་བའི་མཐའ་མཚམས་དེ་ན།།
སྒྲོན་མེ་སྙིམ་པར་བཏེགས་པའི་ཁྱེད་རང་ཡོད་སྐད།།
སེམས་གདུང་ལུས་པོར་བཅོལ་བའི་མི་ཡི་རིགས་ལ།།
སྙིང་གི་གྲོགས་ཁྱེད་ཡོད་ནོ་བསོད་ནམས་ཆེན་པོ།།

དེ་རིང་སྲིད་པའི་ལྷ་མོའི་ཕྱག་ཟུང་དྲན་བྱུང་།།
དེ་རིང་དགུ་ཚིགས་མཁའ་ཡི་ཟླ་གཞོན་དྲན་བྱུང་།།
སྙིང་ལ་རབ་ཏུ་སོང་བའི་བྱམས་པ་དྲན་བྱུང་།།
སྔོན་སྨོན་ལས་ཀྱིས་འབྲེལ་བའི་ཡིད་མཐུན་དྲན་བྱུང་།།

ང་ནི་འཇག་རྩྭ་ཞིག་གི་ཟླ་བོ་ཡིན་རེ།།
ང་ནི་རླབས་རྒྱུན་ཞིོག་གི་ཆ་ཤས་ཡིན་རེ།།
ངེས་གཏན་ཁྱོན་ནས་མེད་པའི་འཁོར་བ་འདི་ལ།།
བརྩེ་གདུང་དབྱིངས་ནས་འགུག་པ་གཅིག་གཅིག་གཉིས་གཉིས།།

དྲན་པའི་ཡིད་མཁར་སྨུག་པོ་གཉོམ་ཞིང་དུངས་པ།།
སྣང་བའི་རྒྱལ་ཁམས་འདི་ལ་ང་རང་མི་དགོས།།
ས་ཆའི་གོ་ལ་འདི་ཡི་གས་སྲུབ་ཞིག་ན༎
གཞོན་ཆུང་ང་ལ་དབང་བའི་སྟེགས་ཤིག་ཡོད་དམ།།

མ་ལོའི་ཕྱག་མཐིལ་དྲན་མོའི་སྟོང་ཉིད་དཀར་བོ།།
རྩ་དང་ཚོར་བ་བརྒྱུད་ནས་གང་སར་ཁྱབ་སོང་།།
དབུ་མའི་རྟ་རྒོད་རྒྱུགས་སའི་ཐང་ཆེན་དག་ལ།།
ང་རེ་འགྲོ་བའི་དགོས་པ་མེད་དོ་སྙམ་མོ།།

གདོད་མའི་རྒྱལ་ཁམས་ཞིག་གི་ནང་བརྙན་མངོན་བྱུང་།།
མཆོག་གི་བུ་དང་བུ་མོའི་དགའ་བདེ་མཐོང་བྱུང་།།
རླུང་དང་རླུང་གི་བཞོན་པའི་སྲོག་དབུག་བརྒྱུད་དེ།།
རྩ་མདུད་ཁྲེགས་གེར་ཆོད་པའི་རྟེན་འབྲེལ་ཡོད་དོ།།

རྩོམ་ཁུངས། ངེད་དྲ་བ།