རང་བྱུང་ནམ་མཁའི་ཡུལ་ལྗོངས་བོད་ཀྱི་ས།།
འཚེ་མེད་ཞི་བདེའི་བོད་བརྒྱུད་ནང་བའི་ཆོས།།
སྒེག་མཛེས་གཞུང་དྲང་བོད་པའི་བུ་མོ་སྟེ།།
ས་མཐོའི་ཡུལ་ན་མུ་ཏིག་རྣམ་གསུམ་སྣང་།།

དེ་ལས་གཞན་གྱི་ཡིད་ལ་མ་དྲན་པའི།།
སྐབས་བབ་མཐོ་སྒང་བུ་མོའི་ཡོན་ཏན་རྣམས།།
སྒྲོ་འདོགས་འུད་སྟོད་ལ་སོགས་ཉེར་སྤངས་ཏེ།།
སྣོད་བཅུད་དཔེ་རུ་འགོད་བཞིན་བདག་གིས་འབྲི།།

མཐོ་སྒང་བུ་མོ་དྭངས་གཙང་ཁ་བཏགས་རེད།།
མཐོ་སྒང་བུ་མོ་རྫ་ཆུ་ཟིལ་མ་རེད།།
མཐོ་སྒང་བུ་མོ་ཆུ་སྐྱེས་པདྨ་རེད།།
མཐོ་སྒང་བུ་མོ་ཆུ་ཤེལ་བུམ་པ་རེད།།

མཐོ་སྒང་བུ་མོ་བཅོ་ལྔའི་དུང་ཟླ་རེད།།
མཐོ་སྒང་བུ་མོ་ཐོ་རེངས་སྐར་ཆེན་རེད།།
མཐོ་སྒང་བུ་མོ་འཇའ་ཚོན་སྣ་ལྔ་རེད།།
མཐོ་སྒང་བུ་མོ་མུན་སེལ་སྒྲོན་མེ་རེད།།

མཐོ་སྒང་བུ་མོ་བྱུ་རུ་དམར་ཆུང་རེད།།
མཐོ་སྒང་བུ་མོ་གཡུ་ཆུང་དྲུག་དཀར་རེད།།
མཐོ་སྒང་བུ་མོ་གཟི་མིག་ཁྲ་བོ་རེད།།
མཐོ་སྒང་བུ་མོ་དུང་གི་སྒྲོག་གུ་རེད།།

མཐོ་སྒང་བུ་མོ་ལྷ་ཤིང་ཤུག་པ་རེད།།
མཐོ་སྒང་བུ་མོ་གསོམ་དཀར་སྡོང་བོ་རེད།།
མཐོ་སྒང་བུ་མོ་སྨྱུག་མ་ཚིགས་དྲུག་རེད།།
མཐོ་སྒང་བུ་མོ་ཨ་གར་ལྗོན་ཤིང་རེད།།

མཐོ་སྒང་བུ་མོ་ཁུ་བྱུག་སྔོན་མོ་རེད།།
མཐོ་སྒང་བུ་མོ་བྱེའུ་ཆུང་འཇོལ་མོ་རེད།།
མཐོ་སྒང་བུ་མོ་སྐྱ་ཀ་ཁྲ་མོ་རེད།།
མཐོ་སྒང་བུ་མོ་རྨ་བྱ་སྒྲོ་ཡག་རེད།།

མཐོ་སྒང་བུ་མོ་ཤ་མོ་དཀར་བོ་རེད།།
མཐོ་སྒང་བུ་མོ་ཤེའུ་དར་སེར་བོ་རེད།།
མཐོ་སྒང་བུ་མོ་འབྲུ་སིལ་དམར་བོ་རེད།།
མཐོ་སྒང་བུ་མོ་སྤང་རྒྱན་སྔོན་པོ་རེད།།

མཐོ་སྒང་བུ་མོ་འབྲི་ཞོ་མངར་མོ་རེད།།
མཐོ་སྒང་བུ་མོ་འོ་ཇ་ཞིམ་པོ་རེད།།
མཐོ་སྒང་བུ་མོ་སྦྲང་དཀར་རྩམ་པ་རེད།།
མཐོ་སྒང་བུ་མོ་མར་ལོ་ཆུང་ཆུང་རེད།།

མཐོ་སྒང་བུ་མོ་ནས་ཆང་སྔོན་མོ་རེད།།
མཐོ་སྒང་བུ་མོ་རྒུན་ཆང་དམར་བོ་རེད།།
མཐོ་སྒང་བུ་མོ་ཁ་བའི་ཝུ་ཆང་རེད།།
མཐོ་སྒང་བུ་མོ་ལོ་ཆང་ཁམ་པ་རེད།།

མཐོ་སྒང་བུ་མོ་བལ་དཀར་ཁ་ཆུ་རེད།།
མཐོ་སྒང་བུ་མོ་ལུག་ཆུང་ཚ་རུ་རེད།།
མཐོ་སྒང་བུ་མོ་བལ་གདན་འཇམ་པོ་རེད།།
མཐོ་སྒང་བུ་མོ་དགུན་རྩག་དྲོན་མོ་རེད།།

མཐོ་སྒང་བུ་མོ་དར་སྲབ་ཡོལ་བ་རེད།།
མཐོ་སྒང་བུ་མོ་རྒྱ་དར་དཀར་བོ་རེད།།
མཐོ་སྒང་བུ་མོ་སེང་རས་དམར་བོ་རེད།།
མཐོ་སྒང་བུ་མོ་གོས་ཆེན་ཟ་འོག་རེད།།

མཐོ་སྒང་བུ་མོ་རྗེ་བཙུན་སྒྲོལ་མ་རེད།།
མཐོ་སྒང་བུ་མོ་ནོར་བུ་སྦྱིན་མ་རེད།།
མཐོ་སྒང་བུ་མོ་ཚངས་པའི་སྲས་མོ་རེད།།
མཐོ་སྒང་བུ་མོ་མཆོད་པའི་ལྷ་མོ་རེད།།

མཐོ་སྒང་བུ་མོ་མིག་གི་བདུད་རྩི་རེད།།
མཐོ་སྒང་བུ་མོ་རྣ་བའི་བུ་རམ་རེད།།
མཐོ་སྒང་བུ་མོ་སེམས་ཀྱི་བསྟི་གནས་རེད།།
མཐོ་སྒང་བུ་མོ་ལུས་ཀྱི་ཕྱག་རྒྱ་རེད།།

མཐོ་སྒང་བུ་མོ་འདོད་ཡོན་སྣ་ལྔ་རེད།།
མཐོ་སྒང་བུ་མོ་ཕ་རོལ་ཕྱིན་དྲུག་རེད།།
མཐོ་སྒང་བུ་མོ་འཕགས་པའི་ནོར་བདུན་རེད།།
མཐོ་སྒང་བུ་མོ་རྣམ་ཤེས་ཚོགས་བརྒྱད་རེད།།

མཐོ་སྒང་བུ་མོ་བདག་གི་བླ་སྲོག་རེད།།
མཐོ་སྒང་བུ་མོ་བདག་གི་རྣམ་ཤེས་རེད།།
མཐོ་སྒང་བུ་མོ་བདག་གི་སེམས་རྟེན་རེད།།
མཐོ་སྒང་བུ་མོ་བདག་གི་གཅེས་ནོར་རེད།།

དེ་སྐད་མཐོ་སྒང་བུ་མོ་གླེང་བའི་གཏམ།།
དོན་ལ་གནས་མིན་བདེན་རྫུན་གང་ཡིན་སོགས།།
དོན་གྱི་གནས་ལུགས་མཐོང་བའི་རྣམ་དཔྱོད་དང་།།
མྱོང་བ་ཕྲ་མོས་ཞིབ་ཏུ་དཔྱད་ན་ཤེས།།

                                                                                             སྤྱི་ལོ་༢༠༡༡ལོའི་ཟླ༥ཚེས༢༩ཉིན།

རྩོམ་ཁུངས། ངེད་དྲ་བ།