སྙན་ངག་ནི་མི་ཞིག་གིས་བོད་ལྭ་གྱོན་པ་དང་འདྲ་ན
ཁྱེད་ཀྱིས་ངེས་པར་དུ་སྐ་རགས་བཅིངས་དགོས་པའི་རེ་བ་འདོན་ངེས
ངས་བསམ་ན   སྐ་རགས་བཅིངས་པ་དེ་ནི
སྙན་ངག་གི་མིད་ཐག་བསྡམས་པ་དང་ཇི་འདྲའི་མཚུངས་ཨང
 
སྙན་ངག་ལ་དམར་ལྷེམ་ལྷེམ་གྱི་སྐ་རགས་ཤིག་མེད་ཀྱང་ཆོག
ཕུ་རོང་གིས་སྲང་ལམ་གྱི་གད་སྙིགས་འཐུ་ཞིང
འདབས་ཁ་ཡིས་ཤེལ་ངོས་ཀྱི་ས་རྡུལ་ཕྱིས་པས
སྐ་རགས་མ་བཅིངས་ཀྱང་སྙན་ངག་ལ་ལྷོད་ཤ་ཞིག་འདུག་གི
 
རྩ་བ་འཕགས་ཡུལ་ནས་འབུས་པའི་སྡོང་གོག་དེར
ཁེ་གྲི་ཡིས་གཞོམས་མི་ནུས་པའི་སྐ་རགས་ཤིག་འདུག་སྐད
སྐ་རགས་དེས   ཉིན་དཀར་ཡང་སྒྲེན་གཟུགས་སུ་སྤྲུལ་ཏེ
ཁྱེད་ཀྱི་སྨྲ་འདོད་ཀྱི་དབང་རྩར་ཟ་འཕྲུག་སློང་ངེས
 
ངས་སྐ་རགས་མི་དགོས་པའི་བོད་ལྭ་ཞིག་གྱོན་ཚེ
སྲང་ལ་མ་འཁོར་ཡང  མདེའུ་གང་མང་གིས
ངའི་ལྷིང་འཇགས་ཀྱི་བྱེའུ་ཆུང་གསོད་པར་བྱེད
 
སྙན་ངག་གིས་སྐ་རགས་ལ་མི་རེ་བར
སྙན་ངག་རང་རྐྱང་འཕེར་བའི་ངང་གང་དུ་ཡང་བགྲོད་ཆོག་པར་བྱ
འདི་ནི་སྙན་ངག་གི་རང་བཙན་ཞིག་ཡིན
                      2011.10.27.23:37ལན་དྲུག་ནས།

རྩོམ་ཁུངས། ངེད་དྲ་བ།