ས་སྲོད་ལ་ཐག་རིང་མཐོང་ནའང
ལག་པས་སྙོབ་ཐབས་བྲལ་བའི་ས་གཞི
སྨུག་པས་བཏུམས་པ་དང་འདྲ་བར
ང་ཡི་རྨི་ལམ་ལས་བོར

ཕྲེང་ཐག་ཆད་པའི་ཕྱི་དྲོ
ཡུགས་ས་མ་ཞིག་དང་འདྲ་བར
ཁྲོམ་སྲང་གི་དགོད་སྒྲ་མ་ཐོས་ཤིང
ཆུང་མའི་བརྩེ་འཛུམ་མ་མཐོང
བུ་མོའི་རྩེད་དགོད་ཀྱང་བརྗེད

ལྷ་ས་ཞེས་པའི་གསེང་དུ་ཀེང་རུས་དང་རྣམ་ཤེས
ལྷམ་གོན་མེད་པའི་བུ་མོ་དག་བསྐུངས་ཡོད
པོ་ཏཱ་ལ་དང་དམར་པོའི་རིར
རྐང་རྗེས་རབ་རིབ་ཅན་གྱི་སྐྱེས་པ་ཚོ་ཡིབ་ཡོད
ཟླ་འོད་ལས་མཐོང་འོང་བའི་མི་དག
ཉི་འོད་ལ་ཞེན་འདང་གིས  རང་ཉིད་བཟི་བར་བྱེད

ཚོས་གཞི་དམར་པོ་ཅན་གྱི་ཁྱིམ་གཞིས
ཉི་འོད་ཀྱིས་མི་སྣང་བར་གཏང་བར་དོགས་ཏེ
ཚིག་གི་ཁེབས་མ་མཐུག་ཐག་ཆོད་རེ་བརྒྱབ་ནའང
དུས་ཀྱི་རླུང་བུ་རྩི་ཤིིང་རེ་རེའི་སྦུབས་སུ་སྦས

ཆུ་ཕྲན་གྱི་འུར་སྒྲས་རྨི་ལམ་དཀྲོགས་ཤིང
རྩྭ་ཕྲན་གྱི་སྐྱེ་སྟོབས་ཀྱིས་སྙིང་རུས་བསྩལ
རྨི་ལམ་མ་བཅོམ་བར་དུ
རེ་བ་མ་འགགས་བར་དུ
རང་དབང་གི་གཤོག་པ་མཁའ་ལ་བརྐྱང་ངེས
ཧུར་ཐག་གི་གོམ་ཁ་རི་བོར་ཐིམ
       ༢༠༡༢་ལོའི་ཟླ་༤པའི་ཚེས་༡༧དགོང་མོ་རང་མགྲོན་ཁང་དུ་སྦྱར།

རྩོམ་ཁུངས། ངེད་དྲ་བ།