བྱུ་རུ་དམར་པོ་སྒེག་ཉམས་ཀྱི་རླབས་ངོགས་སུ་རྩེན
བར་ཐག་ཨར་འདམ་གྱིས་གྲུབ་ཀྱང
རྐང་བ་མེད་པའི་མཚོ་གྲུ་གྲོག་མ་ལྟར་ཨར་འདམ་དུ་འགོས

བྱུ་རུ་དམར་པོར་ཁུང་བུ་ཞིག་གཏད
མཛེས་རྟོག་གི་བྲང་གཞུང་ནས་ལྷེམ་ལྷེམ་དུ་འགུལ་ཡང
སྲོག་མེད་པའི་རྡོ་དམར་ཞིག་རེད་བསམ་ན
ཀ་རྡོ་རུ་བཞག་སྟེ་ཧྲུག་ཆགས་སུ་གཏོང་འདོད

བྱུ་རུ་དམར་པོ་རྡོ་བ་རུ་གྱུར་ཚར
བེད་སྤྱོད་དུ་མི་རུང་བའི་རྡོ་འཛེར་དུ་གྱུར
གལ་ཏེ་ངོས་འཇམ་ཟླུམ་དབྱིབས་ཤིག་ཡིན་ཚེ
བདག་གིས་འཕོངས་ཁ་བཤུས་ཆོག

བྱུ་རུ་དམར་པོ་དམར་བོ་ཡིན་ཡང
མགོ་མཇུག་ན་ཁུང་བུ་ཡོད
ཁུང་བུ་གྱ་གྱུ་མིན་པར་ཉི་འོད་ཐད་གར་འཕྲོ་ཐུབ
ཕྲེང་ཐག་གིས་རྒྱུན་མེད་པ་ཡིན་ན
བྱུ་རུ་དམར་པོ་མུན་ནག་གི་ཀློང་ལ་འཐོར་སྲིད
          2012.12.12ལན་གྲུ་ནས།

       དེ་རིང་ནི་ཚེས12རེད
དེ་རིང་ནི་ཚེས12རེད
2012ལོའི་ཟླ12བའི་ཚེས12རེད
འཇིགས་ཟིལ་གྱི་གཡོ་སྐྱོམས་ལོངས་སུ་སྤྱད་དེ
སྙན་ངག་དང་མཉམ་དུ་ཤི་བར་འདོད་ཀྱང
སའི་གོ་ལ་འཕག་རྒྱུ་མ་བྱུང

སའི་གོ་ལ་ལ་ངོ་ཚ་མི་འདུག
ཕྱེད་ལྷོ་མའི་ལོ་མ་ཞིག་ཀྱང་ས་རུ་མ་བབས
དེ་རིང་ནི་ཚེས12རེད
2012ལོའི་ཟླ12བའི་ཚེས12རེད
ངས་དགུན་ཉི་ལྡོག་གི་ལྡིང་ཁང་ནས
ཁ་ཆེམས་ཀྱི་སྙན་ངག་འབྲི་གིན་ཡོད

སའི་གོ་ལ་སྐྱོམས་ཡ
ངས་གྲ་སྒྲིག་བྱས་ཡོད
ཚེས12ཀྱི་ཉིན་འདིར་ཤོག་བུ་དང་ལྕགས་སྨྱུག་གྲ་སྒྲིག་བྱས་ཡོད
འཛེམ་དོགས་མེད་པར་སྐྱོམས་དང
ངས་ཁྱོད་ཀྱི་འཕག་འཚག་གི་སྟངས་སྟབས་མྱོང་བར་འདོད
          2012.12.12ལན་གྲུ་ནས།


       ང་འཆུགས་མེད།
ཁ་པར་གྱིས་ཁ་སེམས་སྐྱིད་པར་བྱེད་མོད
ཁེ་ཉིན་གྱི་མོ་གྲངས་ལས
སང་ཉིན་གྱི་གདོང་ལ་བད་མོ་མ་བརྐུ

མལ་ཐུལ་གྱི་ནང་ནས་མིག་ཆུ་བཞུར་ཡང་ཆོག་མོད
མ་འཐད་པའི་ཁེར་རྐྱང་ལས
ཁ་གཏད་ཀྱི་ཁྱོ་གར་དོགས་པ་མ་ཟ

ཞིམ་མངར་གྱི་མཆུ་སྒྲོས་ཁྱེད་ཀྱི་རྣ་རྩར་ཐོན་ཡོད
མཉེན་འཇམ་གྱི་སེམས་པ་ཁྱོད་ཀྱི་ལང་ཚོར་ཕུལ་ཡོད
མགོ་རུམ་ནས་མ་འདུག་ཕྱི་ལ་བལྟ་རོགས

ཕྱི་རོལ་ནི་སྒོག་དྲིས་ཁྱབ་པའི་ཞིང་གྲོང་ཞིག་ཡིན
ར་མ   ཁུ་བྱུག   དྲས་མའི་མེ་ཏོག
ཞིང་གྲོང་གི་ལང་ཚོ་ཡིན   ཁྱོད་ཀྱི་ལང་ཚོའང་ཡིན
དེ་བས་ང་འཆུགས་མེད
     2012.12.02ལན་གྲུ་ནས།

          འབུ་ཏོ་ལོ་དང་སྙན་ངག་པ།
ལུང་བ་དེ་རུ་རྩྭ་དང་བསིལ་རླུང་མི་འདུག
ཚ་རྡུང་གིས་མནར་བའི་འབུ་ཏོ་ལོས
ལུང་མཐིལ་ནས་སྙན་ངག་པའི་ཅི་གསུངས་ལ་བལྟས

ལུང་བ་དེ་རུ་ཉི་འོད་དང་ནམ་མཁའ་མི་འདུག
ཚོར་འདུས་བརྟས་པའི་སྙན་ངག་པས
ལུང་ཁ་ནས་འབུ་ཏོ་ལོའི་འཕག་འཚག་ལ་བལྟས

འབུ་ཏོ་ལོའི་ལུས་པོ་ཡང་ཡང་སྟེང་འོག་བརྗེས
སྙན་ངག་པའི་ཚོར་བ་ཡང་ཡང་ལྕི་ལོག་བརྒྱབས
འབུ་ཏོ་ལོ་འཆི་ལ་ཉེ་ཡང་སྙན་ངག་པའི་གསུངས་སྐད་མ་གོ
སྙན་ངག་པ་སྨྱོ་ལ་ཉེ་ཡང་འབུ་ཏོ་ལོར་སེམས་གཏམ་མ་བཤད

ལུང་མཐིལ་ནས་འབུ་ཏོ་ལོ་ཤི
ལུང་ཁ་ནས་སྙན་ངག་པ་སྨྱོན་པར་གྱུར
ད་ལྟ་ལུང་བ་ནི་ཅི་ཡང་མི་འདུག
         2012.12.02ལན་གྲུ

རྩོམ་ཁུངས། ངེད་དྲ་བ།