རྡུལ་ཕྲན་ལ་བརྡར་གིན་པའི་འཆར་ཡན་རེ་རེ།
དངངས་འཚབ་ཀྱི་ཟད་འགྲོ་བའི་བདེན་པ་རེ་རེ།
གྲོད་པ་རལ་བའི་མཁར་གྲོང་གི་རྩེ་མོ་ནས།
ཁྲག་གི་འཚོས་པའི་ལག་པ་དམར་པོ་ཞིག་ལ་འཁྱུད།
དམར་དྲི་འཐུལ་བའི་དུས་ཚིགས་ཀྱི་ཕ་རོལ་ནས།
ང་ལ་ལྗི་ཚད་མཇལ་བའི་རྒྱ་མ་དེ་ད་དུང་མ་རྙེད་པས།
མག་མོག་གི་སེམས་པ་དེ།    ཟི་ལིང་གི་རྒྱ་མོ་བཞིན།
འཁྱར་འཁྱོར་གྱི་ལུས་པོ་དེ།   འཕྱོན་མ་ཚོའི་བརླ་ཤ་བཞིན།
སྤྱི་བསྒྲགས་སུ་ངོམ་ཆོག་ལ་གསང་བ་རུ་རྩི་ཆོག    
དམར་སྨུག་གི་ལྕེ་རིང་དེ་དཔོན་ཆེན་གྱི་སྒོ་ཁར་ཡང་ཡང་བསྣར་རྗེས།
འོ་མས་བྲིས་པའི་མཆིངས་ཡིག་དེ་ལ་མཛུབ་མཐེལ་བརྒྱབ་རྗེས།
ཨུ་ཚུགས་ཚ་བའི་ཁོར་ཡུག་དེའི་ངོ་རིས་བླ་མར་སྒོམ།
ང་ཤི་སོང་།  ཁ་ཆེམས་ཀྱང་རྫུན་མ་ཞིག་བཞག་ནས་ཤི་སོང་།
ངས་ང་རང་ལ་དུར་བྱང་ཞིག་མ་བྲིས་གོང་ང་རོ་ལ་འགྱུར།
ངན་དྲི་ཙམ་ལས་གཞན་ཅི་ཡང་མེད་པའི་རོ་ཁོག་ལ་འགྱུར།
མཐོ་སྒང་གི་རྒོད་པོས་མིག་ཟུར་ཡང་འཕེན་མི་འདོད་པའི་ངའི་རོ་ཕུང་།
སྣག་ཤོག་རྫུན་མ་དང་མཉམ་དུ་སྐམ་ངེས་པ་གཏན་འཁེལ་ཟིན།
གདོན་འདྲེས་འདེད་པའི་ངའི་རྣམ་ཤེས་ལ་མཁོ་བ་ནི།
ཆེས་གདོད་མའི་སྙན་ངག་རྣལ་མའི་སེམས་གསོ་ཁོ་ནའོ།།