སེམས་མཇལ།
ཉི་མའི་བརྩེ་འཛུམ་མ་ཡལ་ཞིང་།།
ཟླ་བས་བསིལ་ཟེར་མ་སྤྲོས་གོང་།།
སྐར་ཚོགས་དགོད་པའི་ཧབ་སྒྲའི་ཀློང་།།
ཞིང་མཆོག་ལྷ་སར་སེམས་ནས་མཇལ།།
ས་ཆེན་གོམ་པས་མ་གཞལ་ཞིང་།།
རྒྱལ་ཁམས་རིག་པས་མ་བསྐོར་ཡང་།།
རྒྱང་རིང་ཉི་མ་ལྷ་སའི་གྲོང་།།
རྨི་ལམ་ནང་དུ་ཡང་ཡང་འཁོར།།
རྩྭ་ཟིལ་ཉི་མས་མ་སྐམ་པས།།
འབུ་སྦྲང་གཤོག་པ་ཆུ་ཡིས་བརླན།།
གནམ་འཕང་གཅོད་འདོད་ཕྱེ་ལེབ་དག།
གནམ་སའི་མཚམས་ན་འདར་ཞིང་ལྡས།།
གངས་ལ་ཉི་ཟེར་ཅོད་པན་མཛེས།།
འཛིན་མའི་གོས་ཀྱི་མེ་ཏོག་ཡག།
དྲི་ཞིམ་རླུང་དང་བསྡོངས་པ་ཡི།།
སྨན་གྱི་ལྗོངས་ནས་ལྷ་སར་སྨོན།།
གངས་རི་རླུང་གིས་བསྒུལ་ཀྱང་ཆོག།
རྒྱ་མཚོ་ཉི་མས་སྐམ་ཡང་རུང་།།
སེམས་གྱི་གནས་མཆོག་མཇལ་འདོད་ཀྱི།།
རེ་བའི་མིག་ཟུང་བཙུམ་པ་མེད།།
རི་བོས་གྲིབ་ནག་གྱོན་ནས་ཡོང་།།
ཆུ་བོས་སྨྲེང་གླུ་གྱེར་ནས་ཡོང་།།
སྒོ་ཁྱིའི་ཟུག་སྐད་གཉོམ་པོ་ལ།།
ན་ཟུག་ཟབ་མོའི་དབྱངས་རྟ་འཁྱིལ།།
ལྷིང་འཇགས་འཁྱིལ་བའི་རི་སུལ་ནས།།
བསམ་གཞིག་བརྩེགས་མའི་རླབས་ཕྲེང་གཡོ།།
མེས་པོའི་མཛད་པ་ཀློག་བཞིན་དུ།།
རྒྱང་རིང་ལྷ་སར་སེམས་ནས་མཇལ།།
༢༠༡༢ ༣ ༡༥ཉིན།
རྩོམ་ཁུངས། ངེད་དྲ་བ།