གླུ་པ་ཚོས་འགྱུར་ཁུག་གི་གླུ་སྒྲའི་ཁྲོད་ལས་སྙན་འཇེབས་བདུད་བརྩི་ཡིས་བསྟོད་དབྱངས་གྱེར་བའི་ཨ་མ།
སྙན་ངག་པ་ཚོས་ཀ་ཁའི་མུ་ཏིག་སྟར་ཕྲེང་གི་སྒྱུ་རྩལ་ཚིག་ལས་བསྟོད་བསྔགས་ཀྱི་མེ་ཏོག་འཁྲུངས་པའི་ཨ་མ།
ས་སྟེང་འདི་ན་སུང་ཀྱང་དགའ་བའི་ཨ་མ།
དེ་རིང་ང་ཡང་ཟོལ་མེད་ཀྱི་སེམས་པ་དམར་པོར་ལག་ཆུང་ན་ཐོགས་པའི་སྨྱུ་གུ་འགུལ་ཏེ་ཁྱེད་རང་གླེང་འདོད་ཀྱི་སྐུལ་སློང་ཞིག་ངང་གིས་སྐྱེས་བྱུང་།
ཁྱེད་ནི།    ངའི་སྙིང་ཁ་རུ་བཞད་པའི་འཛམ་གླིང་ན་ཆེས་ལྷག་པར་མཛེས་པའི་མེ་ཏོག་ཅིག
ཁྱེད་ཡོད་པས།          ངའི་འཇིག་རྟེན་ནམ་ཡང་དཔྱིད་དཔལ་བཞིན་དུ་རྣམ་པར་བཀྲ།
ཁྱེད་ནི་ནམ་མཁའ་ལས་ཟགས་པའི་ཁ་བའི་འདབ་མ་རེ་རེ་བཞིན།
ལྷག་བསམ་དཀར་པོའི་བྱམས་བརྩེའི་བཀའ་དྲིན།
ངའི་ལུས་ཟུངས་ཀྱི་ཁྲག་རྒྱུན་དང་མཉམ་དུ་བཞུར་ནས་དྲོད་རླབས་འཕྱུར་ཞིང་ཚེ་སྲོག་ལ་རྒྱུན་སྐྱོང་བྱེད།
ཁྱེད་ནི་མཁའ་དབྱིངས་ནས་མཛེས་པའི་སྐར་མ་འོད་ཆེན་ཞིག
ཟུམ་ཟུམ་མིག་མདའ་ཕངས་ཐེངས་རེ་རེར།
མག་མོག་གི་མདུན་བསྐྱོད་ལམ་ཁར་ལམ་སྣེ་བསྟན།
གང་ལྟར།
ནམ་མཁར་ཁ་ཞེང་ཇི་ཙམ་ཡོད་པ་ངས་ཤོད་ཐབས་བྲལ་ལ།
རྒྱ་མཚོ་ཆེན་པོར་གཏིང་མཐའ་ཇི་ཙམ་ཡོད་པའང་དེ་བས་དཔོག་པར་དཀའ།
དེ་ལྟར་བཞིན།
ཁྱེད་ཀྱིས་རང་ཕྲུག་ལ་གདུང་བ་ཅི་ཙམ་ཡོད་པའང་ངས་སྨྱུ་གུ་འགུལ་ཐེངས་གཅིག་གིས་བརྗོད་ག་ལ་ཚར།
དེས་ན།
ཁྱེད་ཀྱིས་རང་ཕྲུག་ལ་གདུང་བའི་བླ་ན་མེད་པའི་གཟི་བརྗིད་ཀྱི་འོད་ཀོང་དེ་དུས་ཞག་གི་ཁོར་མོ་ཡུག་ཏུ་སྐྱེ་རྒུའི་སེམས་ན་རྟ་བདུན་དབང་པོའི་འོད་ཟེར་བཞིན།
གསལ་འཚེར་ལེར་་་་་་་་་་་་་་་་་་་་་་་་་་་་་་་་་་
                                          ༢༠༡༢ལོའི་ཟླ་བ་༥ཚེས་༢༨ཉིན།
                                         ཝུའུ་ཧན་དུ་བྲིས།



          ཕྱིར་བལྟ་ཞིག་ལས།
ཞ་འཐེང་གི་གོམ་བགྲོས་ཁྲོད་ལས།
ངལ་གསོས་ཀྱི་མདུན་པ་ཞིག་ངང་གིས་སྐྱེས་བྱུང་།
ངལ་གསོས་ཁྲོད་ཀྱི་སྟེས་དབང་གི་ཕྱིར་བལྟ་ཞིག་ལས།
མངར་བསྐྱུར་འདྲེས་མའི་དོན་དག་དུ་མ་ཞིག

སྐད་ཅིག་ཉིད་དུ་ནང་སེམས་ལ་འཚང་ཁ་ཤིག་ཤིག་གིས།
བྱུར་བུར་བཏམས།
དགའ་བ་དང་སྐྱོ་བ་ དགོད་སྒྲ་དང་ངུ་འབོད་རྒྱལ་ཁ་དང་ཕམ་ཁ་ཐོབ་པ་ཤོར་བ།

དབང་པོའི་གཞུ་རིས་ལྟར་བཀྲ་བའི་འདས་དོན།

རྒྱུ་འབྲས་ཀྱི་གཏན་ཚིགས་གསལ་བའི་འདས་དོན།

ནང་སེམས་ཀྱི་བསམ་གཞིག་འདུ་ལོང་དྲག་པོའི་ཁྲོད་ནས།

དོན་ཞིག་རྟོགས་པ་སྟེ།
ང་ཚོ་མདུན་བསྐྱོད་ཀྱི་ལམ་ཁར་དཀའ་ཚེགས་ཀྱིས་མནར་གཅོད་ལ་བཟོད་སྲན་མ་ཐུབ་པའི་ཚེ།

ང་ཚོ་མདུན་བསྐྱོད་ལ་རེ་ཐག་ཆད་ནས་ཡིད་རྨུག་པའི་སྐབས་སུ།

ང་ཚོའི་ནང་སེམས་ཀྱི་ངོགས་སུ།
རི་བོར་བསྙེགས་པའི་བརྩེ་བའི་ཕ་མའི་རེ་བ།

རྒྱ་མཚོ་ལས་ཟབ་པའི་གྲོགས་པོའི་སྨོན་ལམ།

ས་གཞི་ལས་ཁྱོན་ཡངས་པའི་མཛའ་མོའི་བློ་བརྟན།

ནམ་ཡང་ཡིད་ཀྱི་རུམ་དུ་བཅུག་ནས་བོར་བརླག་ཏུ་མ་སོང་བར་གསལ་པོར་ངེས་ནས།
ནམ་ཡང་ཞུམ་པ་མེད་པར་གོམ་འཇགས་བརྟན་པོས་མུ་མཐུད་མདུན་བསྐྱོད་བྱེད་དགོས་སྙམ་བྱུང་།།


                             
            ༢༠༡༣ལོའི་ཟླ་བ་༡པོའི་ཚེས་༢ཉིན་
ཝུའུ་ཧན་དུ་བྲིས་།

རྩོམ་ཁུངས། ངེད་དྲ་བ།