བདེན་ལུགས་སྐམ་པོའི་བྱེ་ཐང་མྱུལ་དུས།
____ཨ་དཀོན་རིན་པོ་ཆེ་སྐུ་གཤེགས་པར།
༡
མི་རིགས་ཤིག་གི་ཤ་དྲོད་ལ་འཐིམས་པའི་འོད་ཀྱི་གོང་བུ།
གློ་བུར་དུ།
ལོ་རྒྱུས་ཀྱི་གླེགས་བམ་ཁྲོད་དམར་ཧྲེང་ཧྲེང་དུ་བཞུད་དུས།
བརྩེ་བ་མིག་ཆུར་འདྲེས། ནོངས་འགྱོད་སྙིང་ལ་ཟུག
ཞེ་སྡང་ཁྲག་ལྟར་གདུ།
༢
ཀྱི་ཧུད། ཡ་ང་བའི། ཞེ་མར་བའི།
སྤྱི་ཚོགས་ཀྱི་འཁྲབ་སྟོན་རེ་རེས།
བྱིས་པ་སྣབས་ལུག་དག་དགོད་མ་ཤེས་ལ།
གཞོན་ནུ་འཁྱམ་པོ་དག་རྩེ་མ་ཤེས།
ལག་རྟེན་བོར་བའི་རྒན་འཁོགས་རྣམས་ཀྱང་།
ལུས་ཀྱི་ཤ་དྲོད་ཡལ་ཏེ་དྲན་མེད་དུ་བརྒྱལ།
༣
བལྟས་ཀྱིན་བལྟས་ཀྱིན། ཉན་བཞིན་ཉན་བཞིན།
བསམ་གྱིན་བསམ་གྱིན།
ཕོ་བ་གཏིང་ནས་གཟེར།
ཨ་མའི་བྱམས་བརྩེ་ཁྲག་ལ་བརྫི་མཁན་ཚོས།
ང་ཚོར་སྡུག་གི་མགོ་བོ་འཇོག་སའི་ཕྲག་པ་ཞིག་ཀྱང་གང་ནས་སྟེར།
༤
དྲག་ཏུ་འབར་བའི་སེམས་པ་ཐུར་དུ་མནན་ནས།
བདེན་ལུགས་སྐམ་པོའི་བྱེ་ཐང་མྱུལ་དུས།
རྐང་པ་རྡོ་ལ་འཐོགས་ཤིང་།
སྨྲེ་ངག་ཐམས་ཅད་མགྲིན་པ་ནས་ལུས།
རྣམ་ཤེས་ཁོ་ན།
ད་གཟོད། ཡང་ཟོར་འཛོམས་པོས་གང་སར་བརྒྱུགས་འགྲོའང་།
རྩོམ་ཁུངས། ངེད་དྲ་བ།