ལྗང་བུ།
དང་པོར་ཇག་པ་ཞིག་ཡིན
བར་དུ་ལྕགས་མགར་ཅིག་ཡིན
ཐ་མར་སྒོམ་ཆེན་ཞིག་ཡིན
       
          སྨན་བླ།
དང་པོར་གླང་རྫིའི་དོར་མ་གྱོན་ཏེ་གངས་འདབས་སུ་ཡོང
བར་དུ་གངས་འདབས་ནས་རུ་སྦྲ་ཕུབ
ཐ་མར་གངས་འདབས་ནས་ཆུ་ཐིགས་ཤིག་ཏུ་གྱུར

     སྐྱབས་ཆེན་བདེ་གྲོལ།
ཐོག་མར་མེ་ཏོག་གསོ་མཁན་ཞིག་ཡིན
བར་དུ་སྦྲང་མ་གསོ་མཁན་ཞིག་བྱས
ཐ་མར་སྦྲང་རྩི་འཚོང་མཁན་ཞིག་ཏུ་གྱུར

         དོན་གྲུབ་རྒྱལ།
མདུང་རིང་དང་འཁོར་གསུམ་སྐེད་པར་སྤྲས
དགྲ་ཚོགས་དང་དཔུང་ངན་བཅོམས
འཇིག་པ་མེད་པའི་རྒྱལ་རབས་ཤིག་བཙུགས

      འཇུ་སྐལ་བཟང་།
མིག་ཤེལ་གྱི་ལོང་བུ་རྩི་སྐུད་ཀྱིས་བྱས
མགུལ་ཡོངས་སུ་ཕྱག་མདུད་ཀྱིས་ཁེངས་པའི་ཁོ
གྲོང་ཁྱེར་དུ་སློབ་མཐར་ཕྱིན་རྗེས
རྨ་ཆེན་གངས་རའི་འདབས་སུ་ཡོང་སྟེ་དགོན་པ་ཞིག་བཏབ
རྡོ་གྲུབ་ཆེན་ནི་ཁོའི་གྲྭ་རྒྱུན་ཐོག་མ་དེ་ཡིན
       
          གངས་ཞུན།
ཐོག་མར་མཚམས་ཁང་ཞིག་གི་ནང་ནས
ཉེན་རྟོག་པ་འགས་ལྟོགས་འཆི་ལས་བསྐྱབས
བར་དུ་དགོན་པའི་དོ་དམ་ཁང་གི་གཙོ་བོར་བསྐོས
ཐ་མར་སྐྱ་ཆས་གྱོན་ཏེ་དགོན་འདབས་ནས་ཕག་ཤ་བཙོངས

         ཞི་བདེ་ཉི་མ།
ཕག་མགོ་ཅན་དང་ཟླ་བའི་ལྷ་མོ་གཉིས་ཀྱིས
རྐུ་འཁྲིག་བྱེད་དུས
ལྷ་ཞིག་གིས་གོང་མཛུབ་ལ་མཆིལ་མ་བསྐུས་ཏེ་སྒེའུ་ཁུང་བརྟོལ་ནས་རྐུ་ལྟ་བྱས་པས
ལྷ་དབང་གིས་ཚོར་ཏེ་ཕག་མགོ་ཅན་དང་ལྷན་དུ
མི་ཡུལ་དུ་སྤྱུགས་པ་དེའི་མིང་ལ་མི་རྣམས་ཀྱིས་ཞི་བདེ་ཉི་མ་ཞེས་སུ་བཏགས
       
       གཅན་མེ་སྟག
དབུས་ལ་འགྲོ་བའི་སྐྱ་མི་འགས
ཉག་ཁ་ཞིག་ནས་ཐབ་རྡོ་འབུབས་དུས
རྡོ་ལེབ་ཅིག་གི་ཁ་ཕྱེ་བ་ན་རུས་སྦལ་གྱི་ལྐོགས་ཤུན་ཞིག་རྙེད
དེ་དག་གིས་གནའ་རྫས་ཤིག་ཏུ་འཁྲུལ་ནས་ལྷ་སའི་སྐུ་ལྕམ་ཞིག་ལ་བཙོངས

       རེ་རྐང་གླིང་།
ཡིག་ནོར་དང་བརྡ་ལོག་གིས་ཁེངས་པའི་
བརྡ་འཕྲིན་ཅིག
རེབ་གོང་གི་ལུང་བ་ཞིག་གི་ནང་དུ་བབས
མི་ཞིག་གིས་གནམ་ཡིག་ཏུ་འཁྲུལ་ཏེ
དེ་གཟུངས་འཇུག་བྱས་ནས་རོང་བོ་དགོན་པའི་འདབས་སུ་མཆོད་རྟེན་ནག་པོ་ཞིག་བཞེངས

        མར་ཁུ་རྒྱལ་མཚན།
ཨ་ཆུང་གནམ་རྫོང་གི་ཨ་ནེ་ཇོ་མོ་དག་གི་མཆོད་རྐོང་ལས
ཙི་གུ་ཞིག་གིས་མར་ཞུན་བར་མེད་བརྐུས་ཏེ་འཐུང་པ་དེ་ནི་ཁོ་ཡིན་ཞིང
དགོན་པར་ཆོས་གླུ་ཉུང་ཙམ་ཐོས་པའི་དྲིན་གྱིས
དེས་ཀྱང་གནས་ལུགས་ཐན་ཐུན་ཞིག་འཆད་པར་བྱེད
གནས་ལུགས་ཁོ་ན་འཆད་བྱེད་ཀྱི་ཁ་དེ་གྲུ་བཞི་ཞིག་ཡིན
         
         བོང་སྟག་རིལ་བུ།
སྤྱང་ཀི་ཞིག་གིས་རྫ་འདབས་ཤིག་ནས་ལུག་ལྤགས་ཤིག་རྙེད
དེས་པགས་པ་གྱོན་ཏེ་ལུག་ཡིན་ཁུལ་གྱིས་ལུག་ཁྱུར་ཡོང
ལུག་རྫིས་ཁྲོམ་ཞིག་ཏུ་འཁྲུལ་ཏེ་རླིག་པ་བཅད
ལུག་རྫི་ཡིག་རྨོངས་དེས་ད་དུང་ཡང་ལུག་ཅིག་ཡིན་པར་འདོད
         
           གཉན།
རྟ་ཁྱུ་ཞོགས་པས་ཆུ་མོའི་ནང་གི་ཉེའུ་ཞིག་གཉིད་ལས་དཀྲོག
ཁྱུང་མཆུའི་རྩྭ་ཐང་གི་བུ་མོ་ཞིག་གིས་སྐྱོགས་ལ་བཅུས་ཏེ་སྦྲ་ནང་དུ་ཐོན
       
         རུ་ངན་བླ་མ་ཐར།
ན་བུན་བན་བུན་ཞིག་གིས་རྟ་ཕོའི་མིག་ལམ་བསྒྲིབས
ཡིན་ནའང་རྟ་ཕོའི་འཚེར་སྐད་ཀྱིས་རྐྱང་ཁྱུ་དག་འགུག་པར་བྱེད

     བྱ་མདོ་རབ་རྒྱས།
གྲྭ་ཕྲུག་གིས་གཟི་ཞིག་རྙེད
ཡིན་ནའང་གྲྭ་རྒན་གྱིས་གཞུང་བཞེས་བྱས
ཕྱིས་སུ་གྲྭ་ཕྲུག་དེས་སླར་ཡང་གཟི་ཞིག་རྙེད་མ་བྱུང
         
      རྨོག་བྱམས་པ།
གནའ་བོའི་གླེགས་བམ་ཞིག་ལས་ཤོག་ལྷེ་གཅིག་ཕར་སློག་ཚུར་སློག་ཚུར་བྱས་རྗེས
ཁོས་གཞི་ནས་རང་གི་མིང་ཡིག་དེ་རྙེད
     
          སྨྲེང་བུ།
སྒྲིག་ལམ་ལ་བཟང་བའི་སློབ་མ་ཞིག
གསུམ་བཟང་སློབ་མར་བདམས
སློབ་མ་དེས་ཀྱང་སྒྲིག་ལམ་ཆ་ཚང་ལྡན་པའི་ལས་བྱ་དང་གནང་ཞུ་ཡི་གེ་མང་དུ་བྲིས
          
        འབྲོང་།
གེ་སར་རྒྱལ་བོའི་དམག་སྒར་གྱི་འདབས་སུ
དགའ་ཡང་མ་མྱོང་ལ་སྐྱོ་ཡང་མ་མྱོང་ཞིང
སྡུག་ཀྱང་མ་མྱོང་ཞིང་ངུ་ཡང་མ་མྱོང་པའི་
རྒན་པོ་ཁེར་འདུག་ཅིག་གིས
རས་གུར་ཅིག་ཕུབ་སྟེ་ཚེ་གང་བོར་དེ་ནས་བསྡད

        རོང་བོ་དགེ་འདུན་ལྷུན་གྲུབ།
གནའ་དགོན་གྱི་དཔེ་ཁང་ནང་དུ་ཙི་གུ་ཞིག་ཡོད
གློ་བུར་དུ་ཅོང་རྙིང་གི་འདོག་ཐག་ཆད་དེ་ལྷུང་པས་ཙི་གུ་ནང་དུ་བཅུག
ཁོས་དེ་བརྡུངས་པས་སྙན་ངག་ལྟ་བུ་འགའ་གྲགས                                     
 
         ལྡོང་ཡོན་ཏན།
ལུང་ཚིག་འགའ་ཤོག་ངོས་སུ་བྲིས་ཏེ་རུམ་ལ་བཅུག
ཤོག་ངོས་དང་ཐིག་ཕྲེང་བློར་བཟུང
སུར་འཕྲད་ན་དེ་འདོན
ཨ་མར་འཕྲད་པས
ཁ་ཆུ་གཏོར་བཞིན་བཤད
གཞན་གྱི་མགོ་བོ་འབུར་འབུར་བྱེད་དུས
ཞེ་སྡང་སྦྲུལ་གྱི་མགོ་བོ་ཅན་ཞིག་ཏུ་གྱུར་ཏེ
དུག་ལྕེ་དམར་པོ་དེ་འཕེན་པར་སྲིད

          རོང་བོ་གངས་དཀར།

གནའ་བོའི་དགོན་ཤུལ་གྱི་བྱེ་ཐང་དུ་
གྲྭ་ཕྲུག་ཞིག་གིས་དྲིལ་བུ་ཆག་པོ་ཞིག་རྙེད་
ཁོས་ཤག་ཏུ་ཁྱེར་ཏེ་གཡུག་པས་སྔར་བཞིན་གྲགས
       
       བྱ་གཞུང་གཡང་བྷ།
སྐབས་འགར་མ་བོས་ཀྱང་གྲགས་ལ
སྐབས་འགར་བོས་ཀྱང་མི་གྲགས་པའི་གླིང་བུ་ཞིག

        རྒྱ་གྲོལ།
སྟོན་པ་བཅོམ་ལྡན་འདས་ཀླུ་ཚང་དགོན་དུ་ཕེབས
རྒྱ་གྲོལ་གྱིས་ཞིབ་འཇུག་སློབ་མ་ར་སྐོར་གང་ལ་སློབ་ཁྲིད་བྱེད་ཀྱིན་གདའ
ཅི་ཡིན་དྲིས་པར་ནང་བསྟན་དཔལ་འབྱོར་རིག་པ ་དང་དམག་དོན་རིག་པ་ཡིན་ཅེས་བཤད
སངས་རྒྱས་ཀྱིས་མ་མཁྱེན
ཁོས་མདོ་སྔགས་གཉིས་ཀ་ལས་ལུང་རེ་དྲངས
སངས་རྒྱས་ཀྱིས་ད་དུང་ཡང་མ་མཁྱེན་པར་དབུ་ཞལ་ཐད་དུ་གཡུག

        ༢༠༡༣--༧--༡༡