བྱ་རྒོད་ཀྱི་གཤོག་པས་མུན་ནག་བཀར་བས
ང་ཡིས་མཚན་མོའི་ཁྲོད་དུ་མེ་ཁ་གསོ་བཞིན་ཡོད

སྤྲིན་པ་ནི་ལུང་མདོའི་ཚེ་རོགས་ཤིག་དང་འདྲ
ནམ་མཁའ་གཡའ་དག་པའི་དུས་སུ་སྤྱན་ཆབ་རིང་དུ་བསིལ

ཟླ་བ་དང་ཁ་བྲལ་བའི་ཕོ་བྲང་ནང་གི་ང་རང
མི་ཚོགས་ཀྱི་ལྟོག་གྲིབ་བར་སྐྱེས་པའི་མེ་ཏོག་ལས་གཟིམས་པར་བྱས

བདག་གི་སེམས་སུ་ཁེར་རྐྱང་གི་ལོ་མ་ཞིག་སྐྱེས
ལོ་མ་དེ་སྐྱེས་པའི་གོ་རིམ་དུ་ཆར་བ་ཤག་ཤག་བབས

སྙིང་ཉེ་ལགས ངལ་གསོ་ཕྲན་ཙམ་གནོངས་དང
བདག་གི་ནགས་ཚལ་དུ་ཁ་བ་བབས་པས་ད་ལྟ་ཤིན་ཏུ་འཁྱག

རྨི་ལམ་དུ་ང་ཡིས་དགུན་ཁ་ཞིག་བཟོས
ཁྱོད་ཀྱིས་ཕྱིར་མིག་གིས་བསྲེགས་པའི་གཙང་བོ་བཞུར

མིག་བཙུམས་ཚེ་ང་ཡི་སྙིང་ཁར་རྐང་རྗེས་མང་དུ་དོད
སྣང་བའི་སྟེང་དུ་ངོ་གདོང་རེ་རེ གཤོག་པ་ཆད་པའི་གདུང་ཡས་རེ་རེ

ཁེར་རྐྱང་གི་ང་ལ་ལོ་བཅུའི་སྔོན་གྱི་སྨོན་ལམ་ཞིག་ཡོད
པི་ཝང་ཞིག་གིས་རྒྱུད་སྐུད་ཆད་རྗེས་ཚེ་རབས་མེ་ལ་སྦྱངས

འཇིག་རྟེན་འདི་དེ་སྔ་ནང་བཞིན་ཡིན་ཡང
རྨི་ལམ་ནང་གི་ལུག་ཁྱུ་ཆུ་ལ་ལྷུང་གྲབས་འདུག

དཔྱིད་ཟླ་དང་པོའི་ནང་དུ་ང་ལ་ཅི་ཡང་མེད
ས་ཡོངས་སུ་རུབ་རྗེས་ཟླ་བ་ད་དུང་ཤར་མི་འདུག

                     2015.3.16

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།