གྲོང་རྡལ་ཆུང་ཆུང་འདི་ནས
ང་ཚོས་རང་གི་འདོད་པ་ལྟར་ཆང་འཐུང་མྱོང
ཆང་གིས་བད་ཅིང་སྦྲིད་པའི་མཐའ་མར
ང་ཚོས་རང་རང་གི་ཨམ་ཕྲག་ལས
ལྟེབ་ཆག་ཤོར་བའི་ཤོག་བུ་རེ་བླངས་ཏེ
ལུས་ཀྱི་ན་ཟུག་མཚོན་བྱེད་ཀྱི་སྙན་ངག་ཟེར་བ་ཞིག་ཕན་ཚུན་ལ་བསྟན་མྱོང

གྲོང་རྡལ་ཆུང་ཆུང་འདི་ན
ང་ཚོ་མིག་ལ་རན་པའི་མི་གཅིག་ཀྱང་མེད་པ་འདྲ
དགོན་གྱི་གྲྭ་བ་དང་གྲོང་གི་རྒན་པོ
ཐ་ན་ང་ཚོའི་སྙན་ངག་གི་བརྗོད་བྱར་གྱུར་བའི་ཞབས་ཞུ་མ་ཚོས་ཀྱང
ང་ཚོ་ནི་ཆང་གིས་མྱོས་པའི་ཁྱི་སྨྱོན་སྐོར་ཅིག་ལ་བརྩིས་མྱོང

གྲོང་རྡལ་ཆུང་ཆུང་འདི
ཨར་འདམ་དང་འཕྲུལ་འཁོར་གྱི་འཇིག་རྟེན་ལ་ཉེ་བར་བཏུད་ཅིང
འུར་ཟིང་དང་སྤྲེལ་ལད་ཀྱི་རྣམ་པས་ཡོངས་སུ་བཏུམས་དུས
ང་ཚོས་སྔར་བཞིན་ཆང་རག་འཐུང་ཞིང་སྙན་ངག་བྲིས་ཏེ
གཉུག་མའི་སེམས་པ་ཁོ་ན་རང་ལ་དབང་བར་བྱས

གྲོང་རྡལ་ཆུང་ཆུང་འདི་ན
ང་ཚོར་སྙིང་ཉེ་བའི་ཅ་དངོས་ག་ཚོད་ཡོད
ཤོག་དངུལ་དང་མཛེས་མ་དང་དབང་ཐང
འདི་དག་ནི་སྨིག་རྒྱུའི་ཀློང་གི་ཆུ་རྡུལ་ལྟར
ཉི་མའི་འོད་རླབས་དང་འགྲོགས་ཏེ་ཡལ་བར་གྱུར་བ་མ་ཡིན་ནམ

གྲོང་རྡལ་ཆུང་ཆུང་འདི་ནས
འདང་བརྩེ་ཟེར་བའི་ཐ་སྙད་ཅིག་ཆང་ལ་བསྙལ་ཏེ་ལོ་མང་འགོར་བས
ང་ཚོ་སུ་ལ་འང་འདི་ལས་ལྷག་པའི་ཚེ་ནོམ་ཞིག་ཡོད་མི་སྲིད
གྲོང་རྡལ་ཆུང་ཆུང་འདི་ནས
སྙན་ངག་ཟེར་བའི་གདུང་གླུ་ཞིག་ཧུར་གྱིས་བྲིས་ལོ་མང་འདས་པས
ང་ཚོ་སུ་ལའང་འདི་ལས་ལྷག་པའི་སེམས་རྟེན་ཞིག་ག་བར་ཡོད
                          2016ལོའི་ཟླ་དང་པོར་བཅོས།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།