ལས་ཀྱི་ལྗོན་པའི་རྩ་བ་ས་སྲོད་དུ་ཟུག
བསེར་བུ་གྲང་མོས་འདུན་པའི་རི་མོ་བསྒུལ
སྤྲིན་པ་རྣམས་གློ་ཁུག་ནང་དུ་བཅུག་རྗེས
བར་ཐག་གི་ཝུ་བ་ནམ་མཁར་འཕྱོ
དེ་ལྟ་ནའང    ཁྱོད་མཚོན་བྱེད་ཀྱི་རླུང་བུ་གཡུག་བྱུང

ཁྱོད་ཀྱི་གདོང་གི་རས་ཡུག་ནག་པོ
སེམས་ཀྱི་དཀར་འཇམ་ལ་བརྡར་ནས་རལ
ཁྱོད་ཀྱི་དཔྱིད་ཀའི་ནང་ལོག་པ་ནང་བཞིན་གྱི
ཆུ་ལ་སྦངས་པའི་ལག་པ་ཡོལ་བས་བསྒྲིབས
དེ་ལྟ་ནའང   རྡོ་བའི་ངོས་ནས་ཁྱོད་ཀྱི་སེམས་པ་ཚུར་བསྲིངས་བྱུང

དེ་ནས་བཟུང   ཁྱོད་ཀྱི་གྲིབ་མར་དོན་སྙིང་ཅི་ཡང་མི་འདུག
སེམས་ནང་གི་ལམ་སྣེས་བྱེ་མའི་སྐོམ་གདུང་ཁུར

ཕྲ་ཞིང་མཉེན་པའི་ལག་པ་ཡལ་ཟིན་པའི་དུས་ཚོད་ལ་ཐུག
དེའི་ནང་སྙིང་ནི་འགྱུར་བ་རྒོད་པའི་ལྕང་སྡོང་ཞིག
ལྕང་སྡོང་གི་གྲིབ་མ་མ་འོང་པའི་ས་སྲོད་དང་འདྲེས
དེ་ལྟ་ནའང   ས་འོག་གི་རྨི་ལམ་ཁྱོད་ཀྱི་ལུས་པོའི་སྲུབས་ཀར་ཟགས
                        ༢༠༡༦ ༡༠ ༢༠་ཉིན་བྲིས།

                              ངའི་སྙན་ངག

མུ་གེས་དྲོས་པའི་གདོང་ལ
ཝུ་བའི་མེ་ཏོག་དཀར་པོ
འདབ་མར་ཟིལ་བ
ཟིལ་བའི་དཀྱིལ་དུ་ཤི་བའི་སྦྲང་མའི་རོ་འོད་འཁྱུག་གེར
གྲིབ་མའི་ནང་ལོག་པའི་རི་མོ
གདོང་གཞན་ཞིག་དུ་ཤར

ཡུགས་སར་ལུས་པའི
རྩིག་སྡེབས་ན་འགུལ་གྱིན་པའི་འབུ་སྲིན
ཤ་ཁྲག་འཕྲུལ་སྣང་གི་ཁང་ཆག
མངོན་ཆུང་གིས་བར་སྣང་ལ་ཁྲག་དམར་བྱུགས
སྤྲིན་དང་གློག་གི་འདབ་མ
རྣམ་ཤེས་གཞན་ཞིག་ལ་ཐིམ
               ༢༠༡༦ ༡༠ ༡༩ མཚན་མོར་བྲིས།

                             ཨ་ཕ།         

ཆག་གས་སུ་སོང་བའི
ཉི་འོད་དང་མུན་པའི་གས་ཁར་འགྲེང་སྟེ
ཤེལ་དམ་དུ་མཚན་མདོག་གི་མར་མེ་བླུགས
རྡོ་ཡི་ཉི་མ་བླུགས
མར་ཟགས་བཞིན་པའི་འཁོར་བའི་ཆོ་ངེ་བླུགས
རྟ་ཁ་བསྒགས་ཏེ་ལུས་པའི་དུས་ཚོད་བླུགས
རྨིས་པར་འགྱུར་བའི་སྐད་ཅིག་མའི་དྲན་པ་བླུགས
མཐའ་མཇུག་གི་རྨ་ཁ་བླུགས་ཀྱང་སྟོང་སང་ངེར་གནས

མུན་པ་བརྒལ་ཏེ་ལོག་ཀྱང་སྙིང་བོས་སྟོང
དགའ་སྐྱོས་མ་ཐེག་པའི་བསྐལ་བའི་མཐའ་ནས
ཤེལ་དམ་དུ་མིག་ལོང་བའི་དྲན་གདུང་བླུགས
ས་ལ་འགྱེལ་བ་ནང་བཞིན་གྱི་མཚན་མོ་བླུགས
                 ༢༠༡༦ ༡༠ ༡༩ མཚན་མོར་བྲིས།

རྩོམ་སྒྲིག་པ། སྐྱ་བོ།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།