སྲང་ལམ་གྱི་མཚན་ནམ་སྐྱ་བོ
ལོ་མ་དང་སྡོང་བོ་ལས་མེད
ཁེར་རྐྱང་གི་ན་བུན་དམར་པོ
འགྲོ་ཤུལ་དུ་རབ་རིབ་ངང་གདའ
སྨྲེང་སེམས་ཀྱི་འཁུན་སྒྲ་མནར་མ
ལུས་སྟེང་དུ་ནད་རྟགས་བཞིན་ལྷག་གདའ
གོད་ཆག་གི་ཚེ་སྲོག་རྨས་མ
གཏམ་རྒྱུད་དུ་ན་ཟུག་གི་རི་མོ
འུ་གཉིས་ཀྱི་ཉི་ནུབ་མཐའ་དག
རྒྱང་རིང་གི་བར་ཐག་འབྱུང་ཟིན
ཐོབ་ཤོར་གྱི་བརྩེ་དུང་ལྷག་མ
ངུ་སྐད་ཀྱིས་འཇགས་ཐབས་མི་འདུག

                      2018/5/9རི་བོ་རྩེ་ལྔ།

                     ལམ་བར་དུ།

ལམ་བར་དུ
ངས་རྩམ་པའི་དྲི་ཚོར་བྱུང
རང་ཡུལ་གྱི་ཁ་བ་མཐོང་བྱུང
ང་རང་ཡུལ་གྱི་ཁ་བ་ལ་དུངས
ངས་རང་ཡུལ་ལ་ས་སྲོད་བྲིས
ནུབ་ལ་ཉེ་བའི་ས་སྲོད་ཅིག་བྲིས

ལམ་བར་དུ______
ང་ལ་ཟླ་འོད་དང་ཉི་འོད་ལས་མེད
གཞན་དག་གི་བྱང་སེམས་དང
མིག་ལམ་གྱི་མཛེས་པ་མེད
ང་རང་ཡུལ་གྱི་ཁ་བ་ལ་ཆགས་ཡོད

                       2018/6/4

                       སྙིང་དུ་སྡུག་པའི་མི།

                                      ___SWཕུལ།

མཚན་མོ་འདི་འཆར་ཡན་གྱིས་གྲུབ་ཡོད
དེ་ནི་འུ་གཉིས་ཀྱི་སྐད་ཆའི་གསེང་ནས
སྙིང་འདྲ་བའི་ནང་ཚིག་བཤད་པས་ཡིན
སྲར་ལམ་དག་ན་མེ་ཏོག་བཞད་འདུག
དེ་ནི་འུ་གཉིས་ཀྱི་རྐང་རྗེས་ཤུལ་དུ་ལྷག་པས་ཡིན
སྡོང་བོ་དག་ལ་ཁེར་རྐྱང་གི་ལྭ་བ་བཟོས་བས་ཡིན

སྙིང་དུ་སྡུག་པའི་མི་ལགས
ཁྱོད་ནི་སྐད་ཆས་མཚོན་མི་ནུས་པ་ཞིག་རེད

                        2018/7/14མཚན་མོར་བྲིས།  

རྩོམ་སྒྲིག་པ། ལྷ་སྐྱིད།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།