《སྨྲེང་བ》སོགས་སྙན་ངག་ཚན་པ་བཞི།
གཞས་ཤིག་གི་ཁོག་པའི་ནང་དུ་མི་གཅིག་གཉིད
མཚན་མོའི་ཟླ་བ་སྨྲ་བ་མེད་པར་ལྷིང་འཇགས་སུ་གནས
མི་ཐམས་ཅད་ཁང་མིག་ཏུ་འཛུལ་ནས་ཁུ་སིམ་མེར་དགུན་ཁ་འབྲི
ཁ་བ་དང་རྐང་རྗེས་གཉིས་སླར་ཡང་ངོ་སྤྲོད་བྱས་སོང
ཉི་མ་ཤར་རྗེས་ཁ་བ་ཞུ་ལ་རྐང་རྗེས་ཀྱང་བསུབས་འདུག
2019.11.30
མེ་ཏོག
མེ་ཏོག་གཅིག་ལ་འདབ་མ་དུ་ཡོད་བྲིས
མཚམས་རེར་ཉི་ནུབ་ནང་དུ་འཆི་ཨེ་འགྲོ་བསམ་ནས་སེམས་ཁྲལ་ཡོང
ཡིན་ན་ཡང
གློ་བུར་དུ་ཐང་ཆེན་ག་ན་རླུང་བསིལ་བུ་ལྡང
རླུང་ལྡང་ཐེངས་རེ་ལ་མེ་ཏོག་གི་འདབ་མ་འགུལ
དེ་ནི་གཉིས་ཀྱི་སེམས་གཅོང་ལྷག་མ་རེད་འདུག
2019.12.1
གྲྭ་ཤག་ལ་གློག་ཆད་སོང་།
སྡོང་བོ་ལྟར་ཡུན་རིང་ལ་ཁེར་རྐྱང་དུ་ལུས
འཇའ་ཚོན་གྱི་སྒེའུ་ཡོལ་འཐེན་ཏེ་ཁ་རོག་གེར་བསྡད
ཅུང་ཙམ་ནས་ས་རུབ་སོང
ས་རུབ་རྗེས་གྲྭ་ཤག་ལ་གློག་ཆད་འདུག
དོ་ནུབ་ཚང་མས་དབྱར་ཁ་དྲན་བྱུང
ཁག་མེད དགུན་ཁ་ཧ་ཅང་འཁྱག་ལ་ཟླ་བའང་དེ་བཞིན་གཟིམས་འདུག
2019.12.2
ཁེར་རྐྱང་དང་དགུན་ཁ།
ངེད་ཚང་གི་སྒོ་ཁའི་ཟམ་ཆུང་སྟེང་དུ་ཁ་བ་བབས
ཁྱིམ་མི་དག་གི་བཤད་ན་རྟེན་འབྲེལ་ཡག་ཟེར
ཉི་ཤུའི་སྨག་རུམ་ཁྲོད་དུ་གྲིབ་མ་ལ་ཚོན་རྩི་བྱུགས
སྲང་མདོའི་ཟིང་ཆ་འཁྲུགས་པོ་དེ་ཞི་འཇགས་སུ་ཕབས་ཏེ
ཁྱོད་ཀྱི་རྣ་ལམ་དུ་ཁྱི་སྐད་གྲག་ཡོང
མཚམས་རེ་ཁྱི་སྐད་ནི་དྲིལ་ཆུང་བཞིན་དུ་སྙན་སྲིད
ཐམས་ཅད་སོང་ཤུལ་ན
སོ་སོའི་རྨི་ལམ་དང་འབྲེལ་བའི་སྒྲུང་རིང་ཞིག་སྲ་མཁྲེགས་སུ་ཡོད
2019.12.2
རྩོམ་སྒྲིག་པ། ལྷ་སྐྱིད།
(མཆོད་མེའི་དཔར་དབང་གཞན་གྱིས་དགོལ་མི་རུང)
(མཆོད་མེའི་དཔར་དབང་གཞན་གྱིས་དགོལ་མི་རུང)
རྩོམ་ཁུངས། ངེད་དྲ་བ།