2022-03-19 སྦྲ་འཚོ།(ཉག་རོང) ཀློག་གྲངས། མཆན ཡོད།

ངས་ཉི་ནུབ་ཀྱི་མཚམས་སུ་ལྟ་མི་ཕོད།
ངའི་དྲི་མ་ནག་རོག་གེ་བ།
སུ་ཞིག་གིས་དྲུད་དེ་ཐག་རིང་ལ་སོང་ནས།
སླར་སྒོ་རྩར་བསླེབས་འདུག

ས་སྲོད་ཀྱི་ཀློང་དུ་མིག་ཟུང་བཙུམས་ནས།
བྲང་གཞུང་གི་གདུང་བས་ནམ་མཁའ་སིལ་བུར་བཅག

ད་དུང་གདུང་བ་ལྷག་མ་རྣམས་ཀྱིས།
གྱང་རའི་ངོས་སུ་ཡིག་འབྲུ་ཁ་ཤས་བྲིས་ཏེ།
ཕུང་པོ་འདི་གཅོང་རོང་ལ་ཕུད།

ང་ཡི་མིག་ཟུང་ལོང་བ་གྱུར་ན་ཡང་།
མལ་ས་འཁྱག་པ་ནང་ནས་ཁྱོད་ལ་ལྟ་སྙིང་འདོད།
            ༢༠༢༡/ ༡༢/ ༢༢ 
                                                                                    ---ཡང་ན་ཡུམ་ཆེན་ཆོས་དགའ་དྲན་པ།

དྲན་པ་མགོ་ཐོག་ལ་མི་འདུག
ཆར་ནང་ལའང་མི་འདུག
དྲན་པ་སེམས་ཀྱི་གཏིང་རིང་ན་འདུག

དྲན་པ་མིག་ནང་ལ་མི་འདུག
ལྕེ་ཐོག་ལའང་མི་འདུག
དྲན་པ་སེམས་ཀྱི་གཏིང་རིང་ན་འདུག

དྲན་པ་བར་ཐག་གི་གསེབ་ན་མི་འདུག
ཐག་རིང་ལའང་མི་འདུག
དྲན་པ་སེམས་ཀྱི་གཏིང་རིང་ན་འདུག

དྲན་པ་མཚམས་སྤྲིན་གྱི་ཀློང་ན་མི་འདུག
ཆུ་འཁྱག་པ་ནང་ལའང་མི་འདུག
དྲན་པ་སེམས་ཀྱི་གཏིང་རིང་ན་འདུག

དྲན་པ་ཁེར་རྐྱང་གི་ཁྲོད་དུ་མི་འདུག
གློ་སྙིང་གི་བར་ནའང་མི་འདུག
དྲན་པ་སེམས་ཀྱི་གཏིང་རིང་ན་འདུག
          ༢༠༢༡/༡༢/༥   

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

རུས་མིང་།

གསང་ཨང་། མིང་མི་འགོད་པར་སྤེལ།

ར་སྤྲོད་ཨང་།

དཔྱད་མཆན།