གཅིག
   ན་ནིང་ལུགས་རྙིང་གི་ཟླ་གསུམ་པའི་ཚེས་བརྒྱད་ཉིན།  དཀོན་མཆོག་གིས་རང་འགུལ་གྱིས་ཁོང་གི་ཁ་ལྕེ་བདེ་པོ་དང་ཆུ་ལྟར་བཞུར་ཆོག་པའི་དབྱིན་སྐད་དག་པོ་སོགས་ལ་བརྟེན་པའི་འབྲས་བུར་ཕྱི་རྒྱལ་གྱི་དགེ་དཀར་ཚོགས་པ་དང་མཉམ་འབྲེལ་གྱིས་བུད་མེད་རོགས་སྐྱོར་ཚོགས་པ་ཞིག་གཟབ་རྒྱས་ངང་བཙུགས།
   ཚོགས་གཙོ་དཀོན་མཆོག་ལ་རྒྱུ་ནོར་ལོངས་སྤྱོད་དང་གཞན་དགེ་སེམས་ཀྱིས་ཕྱུག་པ་མ་ཟད།  ཁོང་ལ་གཞུང་རྒྱུད་དྲང་ཞིང་གཤིས་རྒྱུད་འཇམ་པ། ཤེས་རྒྱ་དང་ཆོས་སེམས་ལྡན་པའི་ཆུང་མ་ཡིད་དུ་འོང་བ་ཞིག་ཀྱང་ཡོད།  མོའི་མིང་ལ་དགེ་འདུན་ལྷ་མོ་ཟེར།
ཡུལ་འདིའི་ཕོ་མོ་ཐམས་ཅད་ཀྱིས་ཚོགས་གཙོ་དཀོན་མཆོག་ལ་མགོ་ཡི་ཞྭ་དང་གོང་གི་བླ་སྤྲུལ་བཞིན་གུས་བཀུར་དང་བརྩི་འཇོག་བྱེད།  ནང་སྒོས་སུ་མིག་རྒྱང་རིང་བའི་བུད་མེད་བློ་གྲོས་ཅན་དག་ལ་མཚོན་ན།  མཚན་རྨི་ལམ་དུ་ཕན་སེམས་ཅན་དཀོན་མཆོག་དང་མཇལ་བ་བྱུང་ནའང་བདེ་ སྐྱིད་དང་ལོངས་སྤྱོད་དཔག་མེད་དུ་སེམས་ཀྱིན་ཡོད།  དེར་བརྟེན།  དགེ་འདུན་ལྷ་མོ་ལ་མཚོན་ན་བུད་མེད་ཚོས་ཡིད་སྨོན་འཆོར་བའི་སྐྱེས་ཕོ་རབ་དཀོན་མཆོག་གི་ཆུང་མར་ལས་ཀྱིས་བསྐོས་པ་ནི་ལས་དབང་དང་བསོད་ནམས་མི་དམན་པའི་རྟགས་སུ་གྲུབ་པས་དགའ་འོས་པའི་དོན་བཟང་ཞིག་ཏུ་བརྩི་ཆོག་ཆོག་ཡིན།   འོན་ཏེ།  དེ་འདྲ་ཞིག་གཏན་ནས་མིན།  ངོ་མ་མིན།
                               གཉིས།
   ཟླ་དགུ་པའི་ཚེས་༢༢ཉིན་གྱི་ཕྱི་དྲོ།  དགེ་འདུན་ལྷ་མོས་ཟི་ལིང་ནས་དྲུད་ཡོང་བའི་ཚོང་ཕོག་མ་ཚར་བས་ཁྱོ་ག་དཀོན་མཆོག་ལ་ཁ་པར་བཏང་ཡང་ཚོགས་འདུའི་སྐབས་ལ་ཐུག་པས་ཁོ་མོས་རྟབ་རྟབ་པོར་ཚོང་ཕོག་ཐབས་བྱས་པ་དང་བྱ་འཕུར་བ་ལྟར་བུ་མོ་སྐལ་བཟང་སྒྲོལ་མ་བསུ་རུ་རྒྱུག།  སློབ་བུ་ཆུང་ཆུང་ཐམས་ཅད་སྔ་ས་ནས་རང་རང་གི་ཁྱིམ་མི་ཚོས་ཁྱིམ་དུ་ཁྲིད་ཟིན།  བུ་མོ་སྐལ་བཟང་སྒྲོལ་མས་ཆེ་ལ་ལྕི་བའི་དཔེ་ཁུག་སྒྱིད་ཁུག་ཏུ་བསྣར་བ་དང་མིག་ཟུང་ལས་ཐལ་རྡུལ་འདྲེས་པའི་མིག་ཆུ་ནག་པོ་བཞུར།  
“ཨ་མ། ཨ་མ། ཨ་མ། ”བུ་མོ་སྐལ་བཟང་སྒྲོལ་མས་ངུ་སྔངས་དྲག་པོ་བྱེད།  སྟོན་རླུང་དང་རླངས་འཁོར་གྱི་འུར་སྒྲའི་ཁྲོད་བུ་མོ་སྐལ་སྒྲོལ་བཟང་མའི་ངུ་འབོད་དྲག་པོའི་སྒྲ་ཡང་ཧ་ཅང་ཉམ་ཆུང་ཤུགས་མེད་དུ་སྣང༌།  དགེ་འདུན་ལྷ་མོས་བུ་མོ་མཐོང་མ་ཐག་ཤ་ཚ་ལ་སྙིང་ཡང་རྗེ་བར་གྱུར་ཏེ་སེམས་སུ་ཙག་ཤད་རྒྱུག་པ་དང་མིག་གོང་མཆི་མས་བརླན།
                                གསུམ།
   “སྡུག་བསྔལ་མཐའ་དག་རང་བདེ་ལས་འབྱུང་བ་དང་བདེ་བ་ཚང་མ་གཞན་བདེ་ལས་འབྱུང༌།  རང་དོན་འབའ་ཞིག་གཉེར་བ་ནི་དུད་འགྲོ་དང་འདྲ།  སྙིང་རྗེ་ཆེ་བའི་བོད་མི་ཞིག་ཡིན་པས།  ང་ཚོས་ངེས་པར་དུ་དགེ་དཀར་གྱི་ལས་ལ་འབད་དེ་འཆི་ཁ་མི་འགྱོད་པ་ཞིག་བྱེད་དགོས།  རང་རེའི་ས་ཁུལ་གྱི་བུད་མེད་དང་བྱིས་པའི་ཁྲིམས་མཐུན་ཁེ་དབང་སྲུང་སྐྱོབ་བྱེད་པའི་བཅའ་ཁྲིམས་ཁྱབ་བསྒྲགས་དང་ལག་ལེན་བྱེད་རྒྱུ་ནི་འུ་ཅག་གི་ལས་འགན་རེད།  གྲོགས་པོ་ཚོ།  བུད་མེད་ནི་གནམ་ཕྱེད་ཀྱི་བདག་པོ་ཡིན་པས་ཕོ་མོ་འདྲ་མཉམ་ཡིན་ནི་རེད།  འདྲ་མཉམ”ཚོགས་འདུ་ཆེ་ཆུང་ཚོགས་ཐེངས་རེར་ཚིག་འདི་ནི་དཀོན་མཆོག་གིས་བསྐྱུར་དང་ནན་གྱིས་གསུངས་ངེས།  དེ་རིང་ཡང་དེ་ལྟར་རེད།
   ཚོགས་འདུ་གྲོལ་རྗེས་མི་ཚང་མ་རང་རང་སོ་སོའི་ཁྱིམ་དུ་བུད་སོང༌།  དཀོན་མཆོག་གིས་དུ་བ་རྐང་གཅིག་སྒྲོན་པ་དང་ཅི་ཞིག་ལ་བསམ་བློ་གཏོང་གིན་འདུག ཡུད་ཙམ་འགོར་རྗེས་ཚོགས་པའི་དྲུང་ཡིག་བདེ་སྐྱིད་ལ་ཁ་པར་བཏང༌། 
   “བདེ་སྐྱིད།  ཁྱོད་ཕྱིར་གཞུང་དོན་ཁང་དུ་ཤོག་དང་དོན་དག་ལག་ཆེན་ཞིག་ཡོད། རེམ་རེམ”
   “ཡ་ཡ་ང་ད་ལྟ་ཕྱིར་ཡོང༌།”
   བདེ་སྐྱིད་ནི་རྒྱ་བོད་དབྱིན་གྱི་སྐད་ལ་བྱང་བའི་སློབ་གྲྭ་ཆེན་མོ་བ་ཞིག་ཡིན་པ་དང༌།  བུད་མེད་རོགས་སྐྱོར་ཚོགས་པ་འདིའི་དྲུང་ཡིག་ཏུ་ཆེད་དུ་གདན་འདྲེན་བྱས་པ་རེད།  ཁོ་མོ་མོ་ལོ་ཉེར་གསུམ་ལ་སོན་མ་ཐག་ཡིན་མོད་དོན་དག་ཅི་ཞིག་བསྒྲུབ་ཀྱང་ཁོ་མོའི་བློ་སྤོབས་དང་ནུས་རྩལ་ལ་འགྲན་ཕོད་མཁན་ནི་ཧ་ཅང་དཀོན། དེ་བས་ཁོ་མོ་ནི་དཀོན་མཆོག་གི་ལག་ཡ་ལྟ་བུ་དང་ཞབས་འདེགས་ཚོགས་པ་འདིའི་ནང་མི་སྣ་གལ་ཆེན་ཞིག་ཏུ་གྱུར།
   བདེ་སྐྱིད་གཞུང་དོན་ཁང་དུ་འཛུལ་མ་ཐག་ཁོ་མོའི་ཁ་པར་གྲག་བྱུང༌།  ཁོ་མོས་དོགས་མ་བདེ་བར་དཀོན་མཆོག་ལ་ལྟ་ཙམ་བྱས།  དཀོན་མཆོག་གིས་བྲེལ་མྱུར་གྱིས་བདེ་སྐྱིད་ཀྱི་ཁ་པར་ཚུར་བླངས་པ་དང་མིག་ཟུང་ཆེ་རུ་བགྲད།  ཁ་པར་སླར་ཡང་བདེ་སྐྱིད་ཀྱི་ལག་ཏུ་བཞག་ནས  
    “སྐྱག་གཟན།  ཡང་ཁྱོད་ཀྱི་དགའ་རོགས་རྡོ་རྗེ་རེད།  ཁ་པར་ཨང་གྲངས་འདི་རིག་མ་ཐག་ང་སྙིང་འཚིག་ཟ་ནས་ཤི་འགྲོ ཕོ་གསར་ཀླད་མེད་འ དི་ཚོ་བུད་མེད་མེད་ཚེ་ཉི་མ་འཁྱོལ་གྱིན་མེད་པ་འདྲ།  སྐྱེས་ཕོ་རབ་ཅིག་གིས་དུས་ཚོད་ཚང་མ་ནག་མོ་ཚོའི་སྟེང་དུ་བེད་སྤྱད་ན་་་་་་ང་ཚོའི་མི་རིགས་འདི་ནམ་ཞིག་ལ་གཉིད་ལས་སད་ཐུབ་བམ།  ངོ་མ།  གླེན་ཕྲུག་ཀླད་མེད་ཏག་ཏག་རེད།  ཧུན།  གཞུང་དོན་ཁང་ནས་དོན་དག་ཡོད་ཅེས་ཤོད།  རེམ” ཞེས་ཁོང་ཁྲོའི་ངང་བཤད།
བདེ་སྐྱིད་ཀྱིས་ཧ་ཅང་སེམས་ཆུང་ངང་ཁ་པར་ལ་ཉན།
   “བདེ་སྐྱིད།  ང་རྡོ་རྗེ་ཡིན།  ཁྱོད་ལ་ཅི་བྱུང་སོང༌།  ཁ་པར་མི་ཉན་དོན་ཅི་ཡིན།” རྡོ་རྗེ་ཡི་སེམས་ཁུར་གྱི་འབོད་སྐད་སྙན་མོ་ཧ་ཅང་གསལ་ལྷང་ལྷང་རེད།
   “འོ།  ཐུགས་རྒྱལ་མ་བཞེངས།  གཞུང་དོན་ཁང་དུ་ད་དུང་དོན་ཆེན་ཞིག་ཡོད་པས་ང་རེམ་པར་ཡོང་མི་ཐུབ།  ཁྱོད་ཀྱིས་སྒུག་མི་དགོས།” བདེ་སྐྱིད་ཀྱི་གདོང་ལ་ཚ་ལམ་ལམ་དུ་གྱུར།
   “ཚོགས་འདུ་གྲོལ་ཟིན་པ་མ་ཡིན་ནམ།  དེ་རིང་ཁྱོད་ཀྱི་སྐྱེས་སྐར་རེད།  ངས་སློབ་གྲོགས་དང་གྲོགས་པོ་ཐམས་ཅད་བོས་ནས་ད་ལྟ་བཅུད་ལྡན་བོད་མིའི་ཟ་ཁང་ནས་ཁྱོད་ལ་སྒུག་ཡོད།  དོན་དག་ཅི་ཡོད་ན་སང་ཉིན་ངས་ཁྱོད་ལ་རོགས་བྱེད།  ཨེ་གོ་ཐལ།  ད་རེམ་མར་ཤོག”
   བདེ་སྐྱིད་གློ་འགྲོགས་ཤིག་ལངས་ནས་སྐད་གསང་མཐོན་པོས།
   “ཨ་ཡ།  དེ་རིང་ཟླ༩པའི་ཚེས༢༢མ་ཡིན་ནམ། ཅུང་མིན་ན་ངས་རང་གི་སྐྱེས་སྐར་ཡང་བརྗེད་འདུག  ང་ད་ལྟ་ངེས་པར་དུ་རྡོ་རྗེ་སར་འགྲོ་དགོས།  དོ་དགོང་ང་མ་སོང་ཚེ།  ཁོང་ཚོ་ཁོང་ཁྲོ་ལངས་སྲིད་ལ་ང་ཡང་སེམས་མི་སྤྲོ” ཞེས་བཤད་མ་ཐག་དཀོན་མཆོག་གི་ཁུར་མགོར་འོ་ཞིག་སྦྱིན་པ་དང་ཁ་ཕྱིར་འཁོར་ཏེ་འགྲོ་གྲབས་བྱས།
   སྐབས་དེར་ཚོགས་གཙོ་དཀོན་མཆོག་བདེ་སྐྱིད་ཀྱི་སྐེད་པར་དམ་དུ་འཁྱུད།  ལག་ཟུང་སྦོམ་ལ་ཤུགས་ཆེ་བ་དེས་བདེ་སྐྱིད་ཀྱི་ཕྲ་ལ་མཉེན་པའི་སྐེད་ནས་དམ་དུ་བསྡམས།  ངག་ཇེ་ལྷོད་དང་ཇེ་འཇམ་དུ་བཏང་སྟེ།
   “ངའི་གཅེས་ཕྲུག་མ།  དེ་རིང་གོ་སྐབས་འདི་ལྟ་བུ་འུ་གཉིས་ལ་ཡོད་དཀའ་བས་འུ་གཉིས་ཀྱི་བརྩེ་འདང་གི་ཆེད་དུ་དོ་དགོང་གི་སྐྱེས་སྐར་དེ་རེ་ཞིག་བློས་གཏོང་རྒྱུ་བྱོས།” 
   “ངོ་མ་བཤད་ན།  སྐྱེས་སྐར་ཁོ་ནའི་ཆེད་དུ་མིན།  རྡོ་རྗེ་ལ་ཆ་རྐྱེན་མེད་ན་ཡང་ཁོ་རང་ང་ལ་ཧ་ཅང་དགའ།  ཆུང་ནས་ད་བར།  ང་ནི་ཁོང་གི་ཚེ་སྲོག་ལྟ་བུ་ཡིན་པས་ངས་ཀྱང་ཁོ་རང་སྡུག་ཏུ་འཇུག་མི་འདོད།  དེ་མི་ཚད་ད་ལོའི་ལོ་སར་ལ་ངེད་གཉིས་གཉིན་སྒྲིག་བྱེད་རྩི་ཡོད།”
   “ངས་ཤེས།  ངས་ཤེས་ཡོད།  འོན་ཀྱང་ཁྱོད་ཀྱིས་དོན་དག་གལ་ཆེན་ཞིག་བརྗེད་འདུག   ང་ཡང་ཁྱོད་ལ་ཤིན་ཏུ་དགའ་བ་དང་ཁྱོད་ནི་ངའི་ཡོད་ཚད་ཡིན།”
   “འོན་ཀྱང་་་་་་འོན་ཀྱང་་་་་་་”
   “ད་ཁྱོད་ཀྱིས་འ་ཀྱ་འོན་ཀྱང་མ་ཟེར་དྲིན་ཆེན་མ།  ངས་ནམ་ཡང་ཁྱོད་ཀྱི་མདུན་ལམ་དང་འཚོ་བ་ལ་སེམས་ཁྲལ་བྱེད་བཞིན་ཡོད།  གོ་ཐོས་ལ་ཁྱོད་ཀྱི་ཨ་མའི་ནད་དེ་ད་རུང་སངས་དྲག་མ་རེད་ཟེར།  ཁྱོད་ཀྱི་ཨ་ཅེ་ལ་ཡང་བྱ་བ་མེད་པས་ཁྱོད་ཀྱི་ཨ་མ་སྨན་ཁང་དུ་སྟོན་བྱེད་ཀྱང་ཡོད་དཀའ་རྒྱུ་རེད།  དེ་རིང་ངས་ཁྱོད་ཕྱིར་འབོད་དོན་ཡང་སྒོར་རྡོག་འགས་ཁྱོད་ཚང་ལ་རོགས་བྱེད་བསམ་པ་ཡིན།  ད་རུང་ཉིན་འདི་དག་ལ་དོན་དག་འགའ་བྲེལ་བ་ཆེ་བས་ཁྱོད་དང་མཉམ་དུ་ཁ་བརྡ་ཡིད་ཚིམ་པ་ཞིག་ལབ་མ་ཐུབ།  གཞན།  ཨ་མེ་རི་ཁ་ཕྱོགས་ཀྱི་དོན་བཟང་དེ་ཡང་ཕལ་ཆེར་འགྲུབ་རྒྱུ་རེད།  དེའི་ཕྱོགས་ནས་ཀྱང་འུ་གཉིས་གྲོས་ཤིག་ཀྱང་བྱེད་དགོས།  ཨེ་གོ་ཐལ་སྙིང་ཉེ་མ།  དེ་རིང་འུ་གཉིས་ལ་དོན་དག་མང་པོ་ཡོད། ” 
དཀོན་མཆོག་གི་རུམ་ཁ་ནས་བདེ་སྐྱིད་ནི་བྱེའུ་ཆུང་གཟེབ་ཏུ་ཚུད་པ་ལྟར་རང་དབང་གིས་ཐར་ཐབས་ནི་ག་ལ་ཡོད།
                               བཞི།
   ཁྱིམ་དུ་ལོག་མ་ཐག་དགེ་འདུན་ལྷ་མོས་བུ་མོ་སྐལ་བཟང་སྒྲོལ་མའི་ཁ་ངོ་དང་ལག་ཆུང་གཙང་མར་བཀྲུས་པ་དང་བུ་མོ་ལ་ཁ་བརྡ་སྣ་ཚོགས་བྱེད་ཞོར་བཅུད་ལྡན་ཟས་རིགས་སྣ་མང་ལས།  ཟས་སྣ་མང་པོ་ཅོག་ཙེའི་སྟེང་བསྒྲིགས་པ་དང་ཁྱོ་ག་དཀོན་མཆོག་ལ་ཁ་པར་བཏང༌།
   “དཀོན་མཆོག  དེ་རིང་གཟའ་མཇུག་ཡིན་པས་ངེད་བཟའ་མི་གང་བོས་མཉམ་དུ་ཟ་མ་ཟ་བའི་ཉིན་མོ་རེད།  ངེད་མ་སྨད་གཉིས་ཀྱིས་ཁྱོད་ལ་སྒུག་ཡོད།”
   “གཟའ་མཇུག  ཡང་གཟའ་མཇུག་ལ་ཐོན་ཟིན་ནམ།  ང་འདི།  ཡང་བརྗེད་འདུག  བུད་མེད་དང་བྱིས་པའི་ཁེ་དབང་ལ་སྲུང་སྐྱོབ་བྱེད་རྒྱུའི་བཅའ་ཁྲིམས་ཁྱབ་བསྒྲགས་ཀྱི་ལས་གཞི་ཐད་ད་དུང་ཁུལ་བུད་མེད་མཉམ་འབྲེལ་ལས་ཁུངས་ཀྱི་ཀྲུའུ་རིན་གྱི་རོགས་རམ་མཁོ་བས་ང་ད་ལྟ་ཀྲུའུ་རིན་གྱི་ཁྱིམ་ལ་ཐོན་མ་ཐག་ཡིན།  ཆུ་ཚོད་ཕྱེད་ཀའི་རྗེས་སུ་ང་ཁྱིམ་དུ་ཐོན་ཡོང༌།”
   “མིན་མིན།  དོན་དག་བསྒྲུབ་རྒྱུ་གལ་ཆེ།  གཟའ་འཁོར་རྗེས་མའི་ནང་དུ་འུ་གསུམ་གྱིས་མཉམ་དུ་ཟ་མ་ཟ་ཆོག ངོ་མ་བཤད་པ་ཡིན།  བློ་བདེ་བདེ་བྱས་ཏེ་དོན་དག་སྒྲུབས།  བདེ་མོ་བྱོས།”དགེ་འདུན་ལྷ་མོའི་གདོང་ལ་ཡིད་ཆད་དང་ཁེར་རྐྱང་གི་རྣམ་པས་རེ་ཞིག་གཡོགས་པར་གྱུར།  འོན་ཀྱང་བློ་དཀྱེལ་ཆེ་བའི་ཁོ་མོས་ཨུ་ཚུགས་དང་བཙན་གྱིས་འཛུམ་ཞིག་གཡར་ཏེ་བུ་མོ་སྐལ་བཟང་སྒྲོལ་མར་སེམས་གསོ་གནང༌།
   “ཨ་མའི་གཅེས་ཕྲུག  ཁྱོད་ཀྱི་ཨ་ཕར་དོན་དག་ཡོད་པས་ངེད་གཉིས་དང་མཉམ་དུ་ཟ་མ་ཟ་ཁོམ་མེད་ཟེར།  སང་ཉིན་ཨ་ཕས་ཁྱེད་ལ་ཅི་དགོས་ཉོ་ཟེར།”
   “ཨ་མ།  ང་ལ་ཅི་ཡང་མི་དགོས།  ངས་ཨ་ཕ་དང་མཉམ་པོས་ཟ་མ་ཞིག་ཀྱང་ཟ་མི་ཐུབ།  སློབ་གྲོགས་ཚང་མ་ནམ་ཡང་ཁོ་ཚོའི་ཨ་ཕ་དག་གིས་སྐྱེལ་བསུ་བྱེད་བཞིན་འདུག  ངའི་ཨ་ཕས་ང་ལ་སྒོར་མོ་སྟེར་བ་དང་རྩེད་སྤྱད་ཉོ་བ་ལས་ཁ་ཡ་གཏན་ནས་བྱེད་མ་མྱོང༌།  ཨ་ཕས་དགོང་མོ་དོན་དག་ཅི་ཞིག་བསྒྲུབ་དགོས།”
   “ཁྱོད་ཀྱི་ཨ་ཕ་ནི་གྲོང་ཁྱེར་འདིའི་མི་དབུལ་བོ་དང་བུད་མེད།  བྱིས་པ་ཚོ་ལ་རོགས་སྐྱོར་བྱེད་མཁན་གྱི་མི་བཟང་ཞིག་ཡིན་པས།  ཁོ་ནི་འུ་མ་སྨད་གཉིས་ཀྱི་ལ་རྒྱ་དང་གཟི་བརྗིད་ཡིན་པ་མ་ཟད།  ང་ཚོ་བོད་མི་རིགས་ཀྱི་ལ་རྒྱ་ཡང་ཡིན།”
“ཨ་མ།  བུད་མེད་ནི་ཅི་ཞིག་རེད།”
   “བུད་མེད་ནི་ང་ལྟ་བུ་རེད།”
   “འོ་ན་བྱིས་པ་ཅི་ཞིག་རེད།”
   “བུ་མོ་ཁྱོད་ལྟ་བུ་རེད།”
   “འོ་ན་ཨ་ཕས་ངེད་གཉིས་ལ་རོགས་རམ་མི་བྱེད་དོན་ཅི་རེད།”
   “དོན་དག་གལ་ཆེན་བསྒྲུབ་ནས་ཁོམ་པ་མེད”
   “འོ་ན་ལ་རྒྱ་དང་གཟི་བརྗིད་ནི་ཅི་རེད།”
   “ཁ་བདེ་ཁ་མང་བོ།  འདི་མོ་འདྲི་རྒྱུ་མང་པོ་ཞིག་གང་ནས་དྲན་བྱུང༌།  རེམ་པར་ལས་བྱ་ཕྲིས།”
   “སང་ཉིན་ངལ་གསོ་ཡིན་པས་སང་ཉིན་བྲིས་ན་ཆོག”
   “ཨ་མའི་གཅེས་ཕྲུག  དེས་ན་ངེད་གཉིས་སྔ་མོ་ནས་ཉལ།   སང་ཉིན་ཨ་མས་ཁྱོད་རང་རྩེད་མོ་རྩེ་རུ་འཁྲིད”
   “ཡ་ཨ་མ།  ངས་ཁྱོད་ཀྱི་ཁ་ལ་ཉན།  ཨ་མས་ང་ལ་རྫུན་བཤད་མ་མྱོང”
   སྐར་མ་ལྔ་ཡང་མ་འགོར་བར་བུ་མོ་སྐལ་བཟང་སྒྲོལ་མ་གཉིད་དུ་ཡུར་ནས་སྣ་ཁུང་ཆུང་ཆུང་ལས་དབུགས་ཐུང་ཐུང་ཕྱི་རུ་ཕྱུར་བའི་སྒྲ་ཆུང་ཆུང་ཞིག་ཀྱང་གྲག་ཡོང༌།  སྒེའུ་ཁུང་ཕྱི་རོལ་ནས་སྟོན་གྱི་རླུང་བུ་ནག་པོ་ཡང་གློ་བུར་དུ་ལྡིང་བས་བུ་མོ་སྐལ་བཟང་སྒྲོལ་མའི་སྣ་སྒྲ་སྙན་མོ་དེ་ཡོངས་སུ་བཅོམ།
    ངལ་དུབ་ཀྱིས་མནར་བའི་དགེ་འདུན་ལྷ་མོས་རྨི་ལམ་ཞིག་ཀྱང་མ་རྨིས།  མཚན་ཕྱེད་ལ་ཁོ་མོ་གཉིད་ལས་ཐེངས་ཤིག་སད།  སྐབས་དེར་ཕྱི་རོལ་སྨག་རུམ་གྱི་འཇིག་རྟེན་ནས་དྲག་རླུང་འར་འུར་ལྡང་བའི་སྒྲ་ཚམ་རྔམ་ཅན་ཞིག་ཀྱང་ཐོས།  མཐོ་སྒང་གི་མཚན་མོར་སྣང་ཚུལ་འདི་འདྲ་བྱུང་བ་ཧ་ཅང་རྒྱུན་ལྡན་ཡིན་པས།  སྒྲ་ངན་དེས་དགེ་འདུན་ལྷ་མོའི་སེམས་ལ་གནོད་པ་དང་སྡུག་བསྔལ་བསྐྲུན་མ་ནུསཏེ་ཁོ་མོ་སླར་ཡང་རྨི་ལམ་མེད་པའི་གཉིད་ཀྱི་བདེ་བར་ཞུགས།
                                 ལྔ།
   ཞོགས་པའི་ཆུ་ཚོད་དྲུག་སྟེང་དགེ་འདུན་ལྷ་མོ་མལ་ལས་ལངས་ཏེ་ལུས་ཟུངས་གསོ་བར་མཁོ་བའི་འབྲི་ཤའི་ཤ་ཁུ་དཀར་ཡོལ་གང་བསྐོལ་བ་དང་རྐང་འཇབ་ལག་འཇབ་ཀྱིས་དབུགས་ཀྱང་དལ་གྱིས་གཏོང་ཞོར་ཤ་ཁུ་དཀར་ཡོལ་གང་དེ་འགྱིག་ཤོག་གཙང་མས་བཏུམས་ཏེ་ཁྱིམ་སྒོ་ཡང་མོར་ཕྱེས་པ་དང་དལ་གྱིས་བརྒྱབ།   སེམས་སུ་སྤྲོ་བས་བརྟས་ནས་དཀོན་མཆོག་གི་གཞུང་དོན་ཁང་ཕྱོགས་སུ་སོང༌།    བརྩེ་འདང་གིས་གྲུབ་པའི་ཤ་ཁུ་དཀར་ཡོལ་གང་དེ་སེམས་ཆུང་གིས་ཁྱེར་ཏེ་ཁོ་མོའི་ཁྱོ་གའི་ཕྱོགས་སུ་སོང༌།  ལམ་བར་དུ་ཁོ་མོས་ཁེར་ལབ་ཅིག་བརྒྱབ།
   “དཀོན་མཆོག་ཡ་དཀོན་མཆོག གཞན་ཕན་དགེ་དཀར་གྱི་བྱ་བར་བརྩོན་པ་ནི་བསོད་ནམས་བསག་པའི་རྒྱུ་རུ་སྲིད་མོད།  འཁོར་བ་སྐྱོང་བའི་བུ་རྒྱུད་དང་བཟའ་ཚང་ཡོད་པའི་འཇིག་རྟེན་གྱི་སྐྱེ་བོ་ཕལ་བ་ཡིན་ཙ་ན།  རང་ཁྱིམ་དང་བུ་ཕྲུག་ལའང་་་་་་ཨ་ཡ།  འདྲེ་མོ་ངའི་སེམས་འདི།  རང་སེམས་ཕྲ་མོའང་འདུལ་མི་ཐུབ། ངའི་སེམས་འདི་ནམ་ཡང་་་་་་ཚོང་གི་བྱ་བ་འདི་ཚེགས་ཆེ་བས་ངས་ནམ་རྒྱུན་ཁོང་ལ་བཟའ་བཏུང་ཡིད་ཚིམ་པ་ཞིག་ཀྱང་་་་་་ང་རང་ཡང་བདག་མོ་ནུས་ལྡན་ཞིག་དང་ཆུང་མ་བཟང་མོ་ཞིག་གཏན་ནས་མིན།”
   འདི་ལྟར་དགེ་འདུན་ལྷ་མོས་རང་ཉིད་དཀོན་མཆོག་གི་གཞུང་དོན་ཁང་གི་སྒོ་ཁར་ཇི་ལྟར་འབྱོར་བའང་མ་ཤེས།
   གཞུང་དོན་ཁང་འདིའི་བྱང་ཕྱོགས་སུ་སྦུག་ཁང་ཆུང་ཆུང་ཞིག་ཡོད་ལ་དེ་ནི་བཀྲ་ཤིས་ཐང་ཆད་དུས་མལ་གསོ་ཡུལ་སྒེར་ཁང་ཡིན།
    དགེ་འདུན་ལྷ་མོས་མཁྲིག་མའི་ཆུ་ཚོད་ལྟ་ཙམ་བྱས།  ཤ་ཁུའི་སྣོད་ལ་རེག་ཙམ་བྱས།  ལག་ཡང་མོས་སྒོ་བརྡུངས།  སྦུག་ཁང་གི་སྒོ་ཕྱེས་བྱུང་། སྒོ་ཕྱེ་མཁན་བདེ་སྐྱིད་རེད། བདེ་སྐྱིད་ཀྱིས་སྟོད་ཐུང་ལྭ་བའི་སྒྲོག་གུ་སྒྲོག་ཚར་མེད་ཅིང་ཐུང་ཞིང་དམར་སེར་དུ་བསྒྱུར་བའི་སྐྲ་ལོ་ཕྲག་པ་གཡས་གཡོན་དུ་ཤོམ་འདུག
   དགེ་འདུན་ལྷ་མོ་མཐོང་མ་ཐག་བདེ་སྐྱིད་ཧ་ལས་ཤིང་དངངས་ཐག་ཆོད་པས་ཡུད་ཙམ་ལ་དབུགས་ཀྱང་གཏོང་མ་ནུས།  དགེ་འདུན་ལྷ་མོའི་རྐང་པའི་ཉྭ་ཡང་ལྷུག་ལྷུག་འདར།  དཀོན་མཆོག་ད་དུང་ཉལ་ཁྲིའི་སྟེང་ཕག་བཞིན་གཉིད་དེ་སྔུར་བ་རིང་མོ་འཐེན་གྱིན་གདའ། 
   “ཨ་ཅེ་་་་་་ཁྱོད་ཁོང་ཁྲོ་ལངས་མི་ཉན།  ང་ལ་ལན་པ་ཡིན།” བདེ་སྐྱིད་སྒོ་ཕྱིར་རྒྱུག།
                                    དྲུག
   དགེ་འདུན་ལྷ་མོའི་སེམས་ནི་སྟོན་སྤྲིན་ནག་པོ་ལྟར་འཁྲིགས་ཤིང་རླུང་ནང་དར་ལྕོག་བཞིན་སྤུར། ཡ་མཚན་དང༌། སྐྱོ་གདུང༌། ཐེ་ཚོམ། ཡིད་ཆད་སོགས་འཆར་སྣང་སྣ་ཚོགས་ཀྱིས་དགེ་འདུན་ལྷ་མོའི་དྭངས་གཙང་ལྷད་མེད་ཀྱི་བརྩེ་དུང་སྐད་ཅིག་ཉིད་ལ་རྨེག་མེད་དུ་བཟོས།  དགེ་འདུན་ལྷ་མོས་མགོ་བོ་དལ་བུར་གཡུག་ཙམ་བྱས་པ་དང་གོམ་ཁ་དལ་བུར་སྒོ་ཕྱིར་བསྒྱུར།
  “དཀོན་མཆོག་ཡ་དཀོན་མཆོག    ཁྱེད་ནི་ངའི་འཚོ་བའི་ཁྲོད་ནས་གཏན་དུ་གཡུགས་དགོས་པའི་གད་སྙིགས་འབའ་ཞིག་ལགས”ལམ་བར་དུ་དགེ་འདུན་ལྷ་མོས་རང་སེམས་ལ་དེ་ལྟར་བཤད།
   རྒྱ་སྲང་ནས།  རླངས་འཁོར་སྣ་ཚོགས་གྱིས་སྒྲ་སྣ་ཚོགས་གཏོང་བཞིན་ནུབ་ནས་ཤར་ལ་རྒྱུག་པ་དང་བྱང་ནས་ལྷོ་རུ་འཕུར་བའམ་བགྲང་ལས་འདས།  རྒྱ་ལམ་བཞི་མདོ་རུ་རླངས་འཁོར་འཚུབ་འཚུབ་བྱེད།
རླངས་འཁོར་མང་པོའི་གསེབ་ན་སྤུ་ནག་ཕག་མ་སྣ་རིང་ཞིག་གྲ་འགྲིགས་པའི་ནུ་མ་དེ་ས་ལ་ཐུག་ལ་ཁད་ཀྱིས་གོམ་པ་མྱུར་མྱུར་ངང་སྤོ་བཞིན་མགོ་བོ་སྒུར་སྒུར་གྱིས་མདུན་དུ་སྐྱོད།     དེའི་རྗེས་སུ་ཕག་ཕྲུག་བདུན་བརྒྱད་ཀྱིས་ཀྱང་རྒྱ་ལམ་དཀྱིལ་ནས་གོམ་པའི་འདེགས་སྟབས་སྒྱུར་བཞིན་ཁོ་ཚོའི་དྲིན་ཅན་ཨ་མའི་རྗེས་སུ་སྙེག་གིན་འདུག
                                                                                                                          2008ལོར་སྐྱེ་རྒུ་ནས་བྲིས།                           

རྩོམ་ཁུངས། ངེད་དྲ་བ།