ཚོན་ལྡན་གྱི་རི་མོ་ཞིག
ཁོ་རང་འགུལ་ཙམ་ཡང་མི་བྱེད་པར་ཅེར་རེར་ལྟ་——-
འཕྲུལ་སྣང་ངམ་སྟོང་བསམ་གྱི་མཁའ་རུ་བཞད་པའི་འཆར་ཡན་གྱི་རི་མོ་ཞིག་སྟེ——སྨིག་ལོང་དལ་བུར་འཕྱོ་བའི་རྦ་ཀློང་རེ་རེའི་ཁྲོད་ན་འཕྲུལ་མཁར་གྱི་རྒྱ་ཕིབས་རེ་ཡམ་ཡོམ་དུ་མངོན། དེ་ལས་མཐོ་བ་ནི་གཡའ་དག་པའི་ནམ་མཁའ། རྒྱང་རིང་གི་སྤྲིན་རྩེ་ན་འཕྱོ་སྒེག་གི་ལྷ་མོ་འགས་གར་སྟབས་ངོམ་བཞིན་རྨི་ལམ་ལྟ་བུའི་རྩེད་མོར་གཡེང·······
ཁོ་རང་སྔོན་ལྟར་རི་མོ་དེའི་ཁ་གཏད་དུ་འགྲེང་ནས་ཅེར། གཡས་གཡོན་གྱི་མི་སྐོར་ཞིག་ཀྱང་འཚང་ཁ་ཤིག་ཤིག་གིས་གཅིག་ཏུ་རུབ་ནས་རི་མོ་དེར་ལྟ་ཞིང་། ཁོ་ཚོ་ཚང་མས་དེ་ལ་ཧ་ལས་ཧང་སང་གི་ཉམས་སྣ་ཚོགས་སྟོན་བཞིན་ཡིད་སྨོན་ཚད་མེད་བྱེད། རི་མོ་དེའི་ཡོན་ཏན་ནི་ངོ་མ་ཧ་ལས་པ་ཞིག་རེད། མི་འགའ་རེ་ཞིག་གི་རྣམ་ཤེས་སྔོན་ནས་བསླུས་ཟིན་པ་འདྲ། འགའ་རེ་གྱང་ཁའི་རྩྭ་ལྟར་འདར། ད་དུང་འགའ་ཞིག་གིས་ཐལ་མོ་སྙིང་ཁར་སྦྱར་ནས་གསོལ་བ་འདེབས།
ཁོ་རང་གིས་ཀྱང་ལྐོག་ཏུ་ཡིད་སྨོན་བྱེད། ཇི་འདྲའི་རང་དབང་གི་འཇིག་རྟེན་ཞིག་ཨང་། རང་ཉིད་ཀྱང་འདི་འདྲའི་ཁོར་ཡུག་ཅིག་ཏུ་གནས་ན་ཅིས་མི་ཆོག ཁོ་རང་གི་རྣམ་ཤེས་འཁྲུག་པར་གྱུར།
གློ་བུར་དུ། གློ་བུར་དུ། ཁོ་རང་གིས་ཅེར་ཅེར་བའི་སྐད་ཅིག་མའི་མཇུག་དེར། ཁོ་རང་ཡང་ཅི་བྱུང་མེད་པར་རི་མོ་དེའི་ངོས་སུ་བསླེབས་ཤིང་འཛུལ།
མི་ཚང་མས་ཁོ་རང་ལ་ལྟ། ཁོས་ཀྱང་ཁོ་ཚོའི་རྣམ་འགྱུར་ལ་བལྟས། ད་ནི་ཁོ་རང་གིས་ཕྱི་རོལ་གྱི་འཇིག་རྟེན་ཆེན་པོའི་འདུ་ལོང་ལ་འབྲེལ་ཐག་བཅད་ཚར་བས་ཁང་བའི་དྲ་སྒོ་ལྟ་བུའི་དབྱིབས་གཟུགས་འདི་ལས་ཕྱིར་ལྟ་བ་དང་བསམ་གཞིགས་བྱེད།
ཚང་མས་མཆུ་ཏོ་འགུལ་འགུལ་གྱིས་ཁོ་རང་ལ་ལྟ་བཞིན་ཅི་ཞིག་གླེང་གིན་མཆིས། ཕལ་ཆེར་ཁོ་རང་ལ་བསྟོད་པ་བྱེད་ཀྱིན་པ་འདྲ། འོན་ཀྱང་ཁོ་རང་གིས་དེ་དག་གི་མཆུ་ཏོ་དང་ངོ་གདོང་གི་རྣམ་འགྱུར་ལ་ལྟ་བ་ལས་ཅི་ཡང་ཐོས་མི་ཐུབ། འཇིག་རྟེན་གཉིས་ཀྱི་མི་རུ་དབྱེར་ཕྱིན་ཕན་ཚུལན་ལ་སྨོན་པ་ལས་ཁ་བརྡ་བྱེད་ག་ལ་ཐུབ།
ཚང་མ་ཁོའི་ཁ་གཏད་དུ་ལངས་ནས་དད་གུས་ཚད་མེད་བྱས། དད་གུས་བྱེད་མཁན་གྱི་ཁྲོད་དུ་གོས་ཕྲུག་རྩ་ཆེན་གྱོན་པའི་དཔོན་པོ་དང་ཕྱུག་པོ་འདུག་ཅིང་། ན་བཟའ་དམར་སེར་བེ་བནབས་པའི་བླ་མ་དང་བན་དེའི་རིགས་ཀྱང་འདུག་པར་མ་ཟད། ཐ་ན་ཕྱུགས་རྫི་དང་བྱིས་པའང་འདུག ལོ་ན་རྒས་པའི་ཨ་ཡེ་རྒན་མོ་འགས་ཀྱང་ཕྲེང་བ་འདྲེན་ཞོར་དུ་ལག་རྟེན་ལ་ཁེན་ནས་ཁོ་ལ་ལྟ། ཕལ་ཆེར་མི་དེ་རིགས་ཀྱིས་ཀྱང་ཁོ་རང་གི་གམ་དུ་འགྲོ་ཐུབ་པར་རེ་སྨོན་བྱེད་ཀྱིན་པ་འདྲ།
ཁོ་རང་ལ་རང་དབང་མེད་པར་ང་རྒྱལ་ཞིག་སྐྱེས། ཁོའི་སེམས་ལ་རང་ཉིད་ནི་ཅི་འདྲའི་ལས་ཅན་ཞིག་རེད་ཨང་སྙམ། འོན་ཀྱང་ཁོས་སྔོན་ནས་བཟུང“ལས་ཅན”ཟེར་བ་དེ་ཅི་འདྲ་ཞིག་ལ་ཟེར་བའང་རྟོགས་མྱོང་མེད། ད་ལྟ་ཁོ་རང་ངོ་མཚར་གྱི་ཞིང་ཁམས——ཚོན་ལྡན་གྱི་རི་མོ་དེའི་ཁོར་ཡུག་ཏུ་བསླེབས་ནས་ཕྱི་རོལ་གྱི་མི་རྣམས་ཀྱི་ངང་ཚུལ་ལ་ལྟད་མོར་ལྟ་དུས། ཁོ་རང་ཡང་རང་ཉིད་ལ་ཡིད་སྨོན་སྐྱེས། ཁོ་རང་ལ་ཁོང་འཛུམ་ཞིག་ལངས།
ཁོ་རང་སྔར་མལ་དུ་ལངས་ཏེ་ལྟ་མཁན་དག་དང་ལྷན་དུ་ཧུར་རེར་ཅེར་འདུག ཚོན་ལྡན་གྱི་རི་མོ་ཞིག ཧ་ཅང་མཛེས་ཤིང་བློ་ཡུལ་ལས་འགོངས་པའི་སྒྱུ་རྩལ་གྱི་གསོན་ཉམས་ལྡན་པའི་སྣང་བཪྙན་དེས་ཁོ་རང་ཡང་ཟིལ་གྱིས་མནན་པ་འདྲ། ཁོ་རང་སྔོན་ཆད་དང་མི་འདྲ་བར་ཅུང་ཟད་བག་འཁུམས་པར་གྱུར།
རྒྱང་རིང་གི་མཛེས་པ་དེ་དག་གི་ཕྱི་མིག་ཀྱང་ཁོ་ཚོའི་སྟེང་དུ་འཕངས་ཡོད་པ་འདྲ། ཁོ་ཚོའི་སེམས་ཀྱང་དེ་དག་གིས་བཀུགས་པ་ཨེ་ཡིན། འོ་ན་དེ་དག་ལས་འདས་པའི་ལྐོག་གྱུར་གྱི་ནུས་མཐུ་གཞན་ཞིག་གིས་ཡིན། ཁོས་ཀྱང་མི་རྟོགས། ཁོ་རང་གི་སེམས་ལ་སྣ་ཚོགས་པའི་འཆར་སྣང་ཞིག་སྐྱེས།
ཁོ་རང་སྔོན་ལྟར་འགྲེང་སྟེ་ཅེ་རེར་ལྟ། ལྟ་མཁན་གཞན་དག་ཀྱང་ཁོ་རང་དང་འདྲ། ཅེ་རེར། མིག་རྡེབ་ཙམ་ཡང་མི་བྱེད།
ཅི་འདྲའི་ཞིང་མཆོག་ཅིག་ཨང་། ཁོས་ཀྱང་རང་སེམས་ནས་དེ་ལྟར་སྨོན་པ་ཡང་ཡང་སྐྱེས། ཁོ་རང་གིས་བལྟས་ཀྱིན་བལྟས་ཀྱིན་དུ་སླར་ཡང་རི་མོ་དེའི་ནང་དུ་སོང་། ཡོད་ཚད་ཀྱིས་སྔོན་ལྟར་ཁོ་རང་ལ་ལྟ། ཁོས་ཀྱང་ཁོ་ཚོར་བལྟས། སྔོན་གྱི་དེ་ཚོ་རེད། ཁོས་ཀྱང་སྔོན་ནས་བལྟས་ཟིན་པས་ངོ་གདོང་དེ་དག་རྒྱས་ཡོད་ཤ་སྟག་རེད། ཡིན་ཡང་ཁོ་ཚོས་ཅི་ཞིག་གླེང་གིན་ཡོད་པ་ཁོས་ཀྱང་སྔོན་ལྟར་ཐོས་མི་འདུག
མཆུ་ཏོ་འགུལ་འགུལ་བྱེད་པ་དེ་ཅི་ཡིན་ནམ། གསོལ་བ་འདེབས་ཀྱིན་པའམ་ཡང་ན་ཁ་བརྡ་བྱེད་པ་ཡིན?ངོ་མ་འཇིག་རྟེན་གཉིས་ན་གནས་པའི་མི་རུ་གྱུར་འདུག
ཁོའི་སེམས་ལ། ལྟ་མཁན་འདི་ཚོ་སྔོན་ལྟར་གཉའ་ཞུམ་བག་འཁུམས་ཀྱི་ངང་ཅེར་ནས་དུས་ཡུན་སྐར་ཆ་ཙམ་ལའང་ཕྱིར་བཀྱེད་རྩིས་མེད་པར་གཞིགས་ན། རང་ཉིད་ཀྱི་སྡོད་གནས་འདི་ནི་ཆེས་ངོ་མཚར་ཞིང་ཆེས་རླབས་ཆེན་གྱི་“ཞིང་ཁམས”ཤིག་ཡིན་རྒྱུ་རེད་སྙམ།
ཁོ་རང་ལ་སྔོན་ལྟར་ང་རྒྱལ་ཞིག་སྐྱེས། ངོ་མ་ཁོ་རང་གིས་སྡོད་གནས་དེ་ནས་ཕྱིར་ལྟ་དུས་ཁང་བའི་འདིའི་དྲ་སྒོ་ནས་ཕྱིར་ལྟ་བ་དང་གཉིས་སུ་མི་འདུག་སྟེ། ཁ་གཏད་དུ་ཡོད་པ་དེ་དག་ཁོ་ན་ལས་མཐོང་མི་ཐུབ།
ཁོ་རང་སྔོན་ནས་སྡོད་པའི་མི་དེ་དག་དང་ཁ་གཏད་དུ་བསྡད་ནས་ཞིབ་ལྟ་བྱས། བལྟས་ཀྱིན་བལྟས་ཀྱིན་དུ་ཁོས་མཉམ་འཇོག་བྱས་བྱུང་། ཁོ་རང་གི་ཁ་གཏད་དུ་ཡོད་པའི་འདྲ་མིན་གྱི་ངོ་གདོང་རེ་རེའི་དཀའ་སྤྱད་ཀྱི་གཉེར་རིས་དང་དཀར་ནག་བསྡེབས་པའི་སྐྲ་ལོ། ཆུ་འོད་འཚེར་བའི་མིག་མདངས་བཅས་ཀྱི་ཁྲོད་དུ་རེ་ཆད་དང་སྨྲེང་སེམས་ཀྱིས་ཁེངས་འདུག སྔོན་ལྟར་ཁོ་ལ་ཅེར་འདུག
ཅིའི་ཕྱིར་དུ་ཡིན་ནམ ཁོ་རང་གི་ང་རྒྱལ་གྱི་བསམ་པ་དེ་ཡང་རིམ་བཞིན་ཡ་མཚར་བའི་དོགས་སྣང་ཞིག་ཏུ་འགྱུར་སོང་།
ལྟ་མཁན་དེ་དག་སྔོན་ལྟར་དལ་བྲེལ་ཅི་ཡང་མེད་པར་དད་གུས་དང་གསོལ་འདེབས་བྱེད་བཞིན་འགྲེང་ནས་འདུག་ཅིང་། ཁོ་ཚོའི་རྒྱབ་ངོས་ན་མི་ཧ་ཅང་མང་པོ་ཞིག་བྲེལ་བྲེལ་ངང་ཕར་ཚུར་འགྲོ་འོང་གི་འཚུབ་ལོང་དཀྲིགས་ཀྱིན་སྣང་། ཁོ་ཚོ་ཅི་ཞིག་ལ་བྲེལ་འཚབ་ལངས་པ་ཁོ་རང་གིས་ཀྱང་མི་རྟོག ཁོ་ཚོ་གང་ནས་འོང་བ་དང་གང་དུ་འགྲོ་བའང་ཁོ་རང་གིས་རྟོགས་མི་འདོད།
ཁོ་རང་སྔར་མལ་དུ་འགྲེང་ནས་ཅེ་རེར་ལྟ། ཚོན་ལྡན་གྱི་རི་མོ་ཞིག མིང་བྱང་དུ<<དག་པའི་ཞིང>>ཞེས་པའི་གཡོན་ཕྱོགས་ཀྱི་སྣེ་ཟུར་དུ་འཁོད་འདུག དལ་བུར་འཕྱུར་བའི་སྨིག་ལོང་། ཡམ་ཡོམ་དུ་མངོན་པའི་འཕྲུལ་མཁར་གྱི་རྒྱ་ཕིབས། གར་སྟབས་དང་སྒེགས་ཉམས་ངོམ་པའི་ལྷ་མོ······ངོ་མ་དག་པའི་ཞིང་ཁམས་རེད།
ཁོ་རང་གིས་ལྟ་བཞིན་དུ་རྨི་ལམ་ལྟ་བུའི་བཤད་རྒྱུན་རིང་མོ་ཞིག་རྣ་ལམ་ཏུ་འཁོར་བྱུང་། ······ཟོས་གོས་ཐམས་ཅད་རང་འགྲུབ་ཡིན་པ······ཚེ་ལོ་ཁྲི་ཕྲག་ཐུབ་པ······མཁའ་རུ་འཕུར་ཞིང་སྤྲོ་རྩེད་ལ་གཡེང་བ་ཁོ་རང་གི་སྣང་རྟོག་གི་ལམ་དུ་ཤར་ཞིང་སྨོན་པ་བྱེད་མྱོང་བ་དེ་དག་དང་ཨ་ན་མ་ན་རེད།
ཁོ་རང་གིས་ལུས་པོ་འགུལ་ཙམ་ཡང་མི་བྱེད་པར་ཅེར་ནས་སྡོད། བལྟས་ཀྱིན་བལྟས་ཀྱིན་མིག་ལམ་གྱི<<དག་པའི་ཞིང>>དེ་རིམ་བཞིན་ཇེ་ཆེར་འགྲོ་བཞིན་པ་འདྲ། གཡོ་འགུལ་བྱས་བྱུང་། དངོས་ནས་གཟུགས་ཅན་ཇི་བཞིན་ཚེ་སྲོག་གི་རྒྱུན་ཞུགས་བཞིན་པར་སྣང་། ཁོས་མྱུར་མོར་ལག་པས་མིག་གཉིས་ཀ་ཕུར་ཕུར་ཙམ་བྱས་ནས་བལྟས་ཚེ་སྔོན་ལྟར་འདུག
ཁོ་རང་གིས་མུ་མཐུད་དུ་ཅེར་ཞིང་སྡོད། མིག་རྡེབ་ཙམ་ཡང་མི་བྱེད། དེ་ལྟར། དེ་ལྟར་ངང་ཁོ་རང་སླར་ཡང་རི་མོ་དེའི་ནང་དུ་འཛུལ། ཚང་མས་ཁོ་ལ་ལྟ། ཁོས་ཀྱང་ཚང་མར་བལྟས། ངོ་མ་ཁང་བའི་དྲ་སྒོ་ཕྱེ་སྟེ་ཕྱི་རོལ་ཡུལ་གྱི་འཇིག་རྟེན་ལ་ལྟ་བ་དང་མཚུངས། ཁོ་རང་གི་ཁ་གཏད་དུ་ཡོབ་པ་ནི་སྔོན་གྱི་མི་དེ་དག་ཁོ་ན་རེད། ཁོ་ཚོས་སྔོནལྟར་ཁོ་རང་གི་སྡོད་གནས་དེར་ཡིད་སྨོན་དང་བཅས་གསོལ་བ་འདེབས། ལོ་ན་རྒས་པའི་ཨ་ཡེ་རྒན་མོ་དེ་ཚོས་ཕྱག་འཚལ་འོང་།
ཅིའི་ཕྱིར་དུ་ཡི་ནམ། ཅིའི་ཕྱིར་ཁོ་ཚོས་འདི་ལྟར་ཡིད་སྨོན་བྱེད་པ་ཡིན? འོན་ཀྱང་ཁོ་ཚོའི་རྒྱབ་ཕྱོགས་སུ་ཤར་རེར་ཤར་རེར་འགྲོ་འོང་བྱེད་པའི་མི་དེ་དག་གིས་རང་ཉིད་ལ་བལྟ་ཙམ་ཡང་མི་བྱེད་པ་ཅི? ཁོ་ཚོ་འཚུབ་འཚུབ་ངང་སྐད་ཅིག་ལ་མངོན་ཞིང་དེ་འཕྲལ་ཡལ་འགྲོ ཅི་ཞིག་ལ་བྲེལ་བ་ཡིན་ནམ།
ཁོ་རང་གིས་དེ་ལྟར་བསམ་བློ་གཏོང་། སྔོན་གྱི་མི་དེ་དག་སྔར་བཞིན་ཁོའི་ཁ་གཏད་དུ་བསྡད། ཕལ་ཆེར་ཁོ་ཚོ་ནམ་ཡིན་ཡང་དེ་ལྟར་སྡོད་རྒྱུ་ཡིན་པ་འདྲ། ཁོ་རང་ལ་སླར་ཡང་ང་རྒྱལ་གྱི་སྣང་བ་ཞིག་སྐྱེས་འོང་།
ཡུད་ཙམ་ནས། སྐེ་དཀྲིས་དམར་བོ་བཏགས་པའི་བྱིས་པ་འགའ་རྩེད་བཞིན་དུ་ཁོ་རང་གི་མདུན་རོལ་ཏུ་ཐོན། ཁོ་ཚོས་མཛུབ་མོ་ཀེར་ཀེར་གྱིས་ཁོ་རང་ལ་ལྟ་བཞིན་གད་མོ་དགོད། ཁོ་རང་ལ་དེ་འཕྲད་ཁོང་ཁྲོ་ཞིག་ལངས་ཤིང་ཁོ་ཚོ་སྡིགས་མོ་བྱེད་རྩིས་བྱས་ཚེ། ཁོས་ད་གཟོད་རྟོགས་བྱུང་། —ཁོ་རང་ལ་སྔོན་ནས་ཚེ་སྲོག་གིས་བཏང་ཟིན། ཁོ་རང་ནི་ཚོན་ལྡན་གྱི་རི་མོ་ཞིག་རེད། བྱིས་པ་ཚོའི་དགོད་སྒྲ་དེ་རིམ་བཞིན་རྒྱང་རིང་དུ་ལ་སོང·······
རྩོམ་ཁུངས། རིག་འབྱུང་དྲ་བ།