ལུང་མདོའི་དར་ལྕོག་གི་དབྱངས་རྟའི་ཁྲོད་ན
རི་རྒྱབ་ཀྱི་རྫི་བོའི་ཕུགས་འདུན་འཕུར
བགྲེས་སོང་བ་སུ་ཞིག་གིས་ཆོན་ཐག་དང་མཉམ་དུ་གློད་སོང

རྟ་མགྲིན་རྡོ་རྗེ   ངས་ཁྱོད་ལ་འདྲི

གངས་མཐའ་འགྲིམ་པའི་ནོར་ཁྱུ་དེ
ཡུལ་སྐོར་བ་སུ་ཞིག་གི་འཚོ་རྟེན་ཡིན
ལྷ་གཡག་དཀར་བོ་ཞིག་སྤྱང་ཀིས་བསད་འདུག
ད་དུང་སྲུང་འབྲི་མ་དམར་བོ་ཞིག་ཀྱང
མཐའ་འཁོར་ན་བེའུ་དང་ཕོ་རོག་འགས་འཚང་ཁ་ཤིག་ཤིག

རྟ་མགྲིན་རྡོ་རྗེ   ངས་ཁྱོད་ལ་འདྲ

གངས་འདབས་སུ་འཐེན་པའི་རྐང་ལམ་ཕྲ་མོ
ཨ་ནེས་རྒྱང་ཕུད་བཏང་བའི་མནའ་མ་ཚོའི་སེམས་པ་ཨེ་ཡིན
ན་ཆུང་མ་གང་མང་ཞིག་གི་ཡིད་ཆེས་དང་ཕམ་ཁ
གནས་འདི་ནས་བཞུད་འགོ་ཚུགས་ཤིང
གནས་འདི་དང་འབྲལ་དགོས་བྱུང་སོང

རྟ་མགྲིན་རྡོ་རྗེ    ངས་ཁྱོད་ལ་འདྲ

སྟག་ཤར་གྲངས་མེད་ཅིག
ཕུ་ནུའི་གྲི་རྩེ་ན་མཆི་མ་ཤར་རེ
རང་ངོས་མི་ཟིན་པའི་གླེན་པ་དེ་ཚོ
ཁྱོད་ཀྱི་མེས་པོ་ཨེ་ཡིན

མགོ་མཇུག་མི་གསལ་བའི་ཡུལ་ལྗོངས་གྱ་གྱུ་འདི
འགྲུལ་བཞུད་པའི་བསམ་གཞིགས་འཐོར་བའི
རྨི་ལམ་འཇིགས་པོ་ཞིག
 

རྩོམ་ཁུངས། སྙན་ངག་དེབ