གནམ་ས་འདིའི་ཕ་རོལ་ན་ཅི་ཞིག་ཡོད།

ཉི་ཟླ་ཟུང་གི་ཕ་རོལ་ན་ད་དུང་གཞན་ཅི་ཞིག་ཡོད།

རྔམ་ཆེན་གྱིས།  མེ་ལྟར་འབར་བའི་སེམས་པ།

སེམས་པ་མེ་སྟག་འབར་ནས།

རི་རབ་དང་རྒྱ་མཚོ་ཡང་བསྲེགས་སོང་།

ལྐོག་གྱུར་གྱི་སྟོན་ཁ་དེ་ཁ་ཐག་རིང་ངོ་།།

རང་ཉིད་ཀྱིས་ལམ་བུ་ཞིག་བཙལ་བའང་ད་དུང་རྙེད་མ་སོང་།

འཕྲུལ་སྣང་གི་གཤོག་འོག་ནས།

ངས།  ངའི་མི་དམངས་ཀྱི་རེ་བཅོལ་འཁུར་ནས།

དཀའ་ཁག་གི་ལོ་ཟླ་ག་ཚོད་འགོར་ཡོད་ཨང་།

སེམས་འཕང་གྱེན་ལ་བསྟད་དེ།

ཨམ་གཙིགས་དམ་དུ་བསྡམས་ནས།

གདོང་མཆོང་གི་རལ་གྲི་གང་སར་གཡུགས་དུས།

ཐོབ་ཤོར་ཡོད་ཚད་རང་ཉིད་ལ་བཞག་ཅིང་།

རྒྱལ་ཕམ་ཅི་བྱུང་སྙིང་སྟོབས་ལ་བསྟིམས་ཡོད།

འཛུམ་མདངས་ཤིག་རྒྱབ་ཏུ།

འཇིགས་རུང་གི་ལྐོག་གཡོ་ཅི་ཙམ་སྦས་ཤིང་།

གོམ་སྟབས་གཅིག་གི་འོག་ཏུ།

གདུག་རྩུབ་ཀྱི་དམིགས་ཡུལ་ཅི་ཙམ་གབ་སྟེ།

རྨི་ལམ་གང་མང་སིལ་བུར་གཏོར་ནའང་།

ངའི་སྙིང་ཁམས་ཅུང་ཙམ་ཡང་འདར་བ་མ་བྱུང་།

ཐོབ་ཐང་དང་རྒྱུ་ནོར།

ད་དུང་མཚན་སྙན་དང་ཆོ་ལོ།

མཇུག་མཐར་ང་རང་ཉིད་ལས་ཐར་དུས།

འཇིག་རྟེན་ཇི་འདྲར་རྒྱ་ཆེ་ཞིང་།

ངའི་མི་དམངས་ཇི་འདྲར་སྙིང་དུ་སྡུག་ཨང་།

གནས་ལུགས་བཙལ་རྒྱུ་དེ་དཀའ་སོང་།

གཞན་ངོ་སྲུང་རྒྱུ་དེ་ཤིན་ཏུ་དཀའ་སོང་།

ཡིན་ནའང་དེ་ནི་ངའི་བཀག་རྒྱ་མིན།

དེ་ནི་ངའི་ཁ་ཕྱོགས་ཀྱི་གདམས་ངག་ལགས་པས།

ནད་དུག་དང་མཚོན་དུག

ཁ་དུག་དང་སེམས་སྡུག་གི་ན་བུན་ཀློང་ནས།

དག་གཙང་གི    མཛེས་སྡུག་གི

ཁེར་རྐྱང་གི་མེ་ཏོག་རྐང་གཅིག་འཐུ་ནུས་ན།

དེ་ནི་ངས་མི་དམངས་ལ་ཕུལ་བའི་དྲིན་བཟོ་དང་།

འཇིག་རྟེན་གཞན་ལ་ཞིག་གི་བློས་བསླངས་བྱེད་འདོད།

གནམ་གྱི་ཕ་རོལ་ན་གནམ་ཡོད་ཅིང་།

ཉི་ཟླའི་ཕ་རོལ་ན་ད་དུང་ཉི་ཟླ་ཡོད་ཨང་།

འཇིག་ངེས་ཤ་ཁྲག་གི་ཕུང་བོ་འདི།

ཐུང་ཐུང་མི་ཚེ་གཅིག་གི་དུས་ཡུན་ནང་།

རང་ཉིད་ཆེས་སྤྲོ་བའི།

འཇམ་གཉེན་གྱི་བྱ་བཞག་ཅིག་ལ་བསྟིམ་མ་ཐུབ་ན།

དེ་ནི་ངའི་སྲིད་པ་ཧྲིལ་བོའི་སྡུག་བསྔལ་ལོ།།

རྩོམ་ཁུངས། ༢༠༠༣ལོའི་སྦྲང་ཆར།