མི་ཚོགས་བཞུར་བའི་ཁྲོད་ནས་མགོ་བོ་བཏེགས་ཐེངས་ཤིག་ན།

བརྩེ་དུངས་ལ་ཉིས་ཤད་ཐོབ་ཅིང་རིང་དུ་ཕྱིན་པའི་

མིག་ཟུང་གཉིས།

སླར་ཡང་ཐོལ་གྱིས་ཕྲད་པས།

དྲན་ཡུལ་གྱི་ཡིག་ཚོགས་དབྱིངས་སུ་ཡལ།

གདམ་ངས་མ་ཟིན་པའི་ཐ་སྙད་མང་བོ་ཞིག

དབུགས་ཀྱི་གོང་བུར་བཏུམས་ནས།

མགྲིན་ཁོག་ཏུ་ཡང་ཡང་འདྲིལ་ཏེ་སོང་།

མིག་འདྲིས་སུ་སོང་བའི་ལག་སོར་དེས།

ཉི་གདུགས་ཀྱི་ཡུ་བ་དང་སྙིང་རྩ་མཉམ་གཅིག་ཏུ།

ཡང་སྡོམ་ལན་གཅིག་བྱས་པས།

ཟུངས་ཁྲག་གི་རླབས་རྒྱུན་ཡང་མོ་ཞིག་འཁྱོམ་པ་ཚོར།

དཔུང་བ་དང་ཕྲག་མགོ་འཕྲད་ལ་ཉེ་བའི་བར་ནས།

སེམས་མི་ཤེས་པའི་བསིལ་རླུང་ཞིག

འཚང་ཁ་རྒྱག་བཞིན་ཐོན་སོང་།

ཕྱི་མིག་གི་བརྗོད་བྱ་སུས་ཀྱང་རྟོགས་དཀའ་བས།

རྡོག་མགོ་གང་དུ་འཁོར་བའི་ཕྱོགས་དེར་མི་འགྲོ་

ཐབས་མེད་བྱུང་།

མགོ་བོ་སྨད་ནས་གློ་བུར་གྱི་བྱུང་བ་དེ།

ཡང་ཡང་ཚགས་སུ་བསྒྲིགས་ཀྱང་།

གོ་རིམ་དུ་སྡེབས་མ་བྱུང་། 

རྩོམ་ཁུངས། གངས་འདབས་ཀྱི་སེམས་པ།