གནས་ཡུལ་འགྲིམ་པའི་སྲིང་ཆུང་མ།
སྲིང་ཆུང་མ། བདག་གི་སྲིང་མོ་བཞི་བ།
མིག་ཟུང་གཉོམ་པོས་ང་ལ་ལྟ་དུས་ལམ་ལ་ཆས་རན།
སྐབས་དེར། ངའི་སེམས་པ་ཧ་ཅང་གྲང༌།
ཞག་གང་བོར། ཁོ་མོའི་འཇིག་རྟེན་བརླན་ཞིང་གཤེར།
ཆེས་ཐུང་བའི་རྨི་ལམ་གྱི་མེ་ཏོག་སྒྲུག་དུས།
ཐོ་རེངས་སྐར་ཆེན་གྱི་མིག་ཆུ་ཤམ་ཤམ་ཤོར།
གཡུ་བྱུར་དང་སྐྱོ་ངལ་འཁུར་བའི་སྲིང་ཆུང་མ།
ལམ་ལ་ཆས་དུས། ཁ་བ་ལྷབ་ལྷུབ་བབས།
སྐབས་དེར་ངའི་སེམས་པ་ཧ་ཅང་གྲང༌།
ངུ་དབྱངས་སྐྱུར་མོ་དེ་སུ་ཞིག་གི་དྲན་པར་ཐོགས།
ཕ་མས་ཀྱང་འབྱོར་ཕྱུག་གི་རྟོགས་བརྗོད་ཀློག་ས།
བྲང་གཞོང་ན་ལྩི་བའི་སྡུག་ཡུས་མཐུག་པོ་དེ་སུ་ལ་སྟོན།
མི་ལོ་བཅུ་དྲུག་ལ་སྤོས་པའི་སྲིང་ཆུང་མ།
རྐང་རྗེས་ཆུང་ཆུང་རེ་བསྐྱུར་ནས་རྒྱང་ལ་བུད་སོང༌།
སྐབས་དེར། ངའི་སེམས་པ་ཧ་ཅང་གྲང༌།
ཁོ་མོ་འདི་ལྟར་ཐག་རིང་ཞིག་ལ་བུད་སོང༌།
ཕྱི་མིག་གི་སེམས་པ་ཕྲ་མོ་སྐྱོར་ནས་བུད་སོང༌།
དེ་དུས། ངའི་སེམས་པ་ལྷག་ཏུ་གྲང་བྱུང༌།
དེ་ནས་བཟུང༌། ངའི་སྨྲ་བརྗོད་ཡོད་ཚད་སྐྱ་ཐིང་ཐིང༌།
ཁ་བ་ཇི་བཞིན། མེ་ཏོག་ཇི་བཞིན།
ཁ་དོག་མི་གཅིག་པའི་ན་ཟུག་མང་པོ་ཞིག་སྙིང་ཁར་སྤུངས།
རྩོམ་ཁུངས།