ཉི་མ་དང་ཨ་མའི་སྤྱན།
ཉི་མ་ཤར་ཕྱོགས་ནས་དལ་གྱིས་འཛུལ་དུས།
ངས་ཐེངས་དང་པོར་འཇིག་རྟེན་འདིའི་སྒོ་གླེགས་བརྡུངས།
ཁྱོད་ཀྱི་འོད་ཟེར་བྱེ་བའི་ཀློང་ནས།
ངས་ས་ཆེན་དུ་གོམ་པ་དང་པོར་སྤོས་ཤིང་།
གོམ་པ་སྤོས་པ་ཙམ་ནས།
ང་ཁྱོད་ཀྱི་མངའ་ཐང་ལ་ཕྱོགས་ཏེ་སོང་།
འོད་དང་དྲོད་ཀྱི་གོང་བུ་ཁྱོད་སྒོམ་ན།
འཇིག་རྟེན་འདིར་འཁྱག་གྲང་དང་སྡུག་བསྔལ་གཏན་ནས་ཡོད་མི་སྲིད།
ངས་དེ་ལྟར་བསམས་ཤིང་། འོད་ཟེར་འབའ་ཞིག་འཚོལ་བར་ཆས།
ཉི་མ། རྟག་བརྟན་གྱི་རྨི་ལམ་སེར་པོ།
ཨ་མ་སྦྲ་སྒོ་རུ་ལངས་དུས།
ང་ཕྱི་རོལ་ཏུ་ཐོག་མར་མགྲོན་ལ་སོང་།
ཁྱོད་ཀྱི་བརྩེ་བའི་སྤྱན་ཟུང་གིས་འཚོས་པའི་མི་ཚེའི་བཤུལ་ལམ་ནས།
ངས་འགྲུལ་བཞུད་པའི་སྐྱེ་བ་ཐོག་མར་བླངས། སྐྱེ་བ་བླངས་པ་ཉིད་ནས།
ང་ཁྱོད་ཀྱི་བྱམས་སེམས་ཀྱིས་སྤྲུལ་པའི་ཁམས་སུ་ཕྱོགས་ཏེ་སོང་།
གཞན་ཕན་དང་རེ་ལྟོས་ཀྱིས་འཚེར་བའི་ཁྱོད་ཀྱི་སྤྱན་ཟུང་སྒོམ་ཚེ།
མི་ཡུལ་འདིར་ངུ་སྔངས་དང་མཆི་མས་ཕྱིར་དྲན་འཇོག་དོན་མེད།
དེ་ལྟར་བསམས་ཤིང་། བརྩེ་དུངས་ཁོ་ནའི་ས་བོན་བཏབ།
ཨ་མའི་སྤྱན་ཟུང་ནི། བྱམས་བརྩེ་དང་འོད་མདངས་འཁྱིལ་བའི་ཆུ་གཏེར་ལགས།
རྩོམ་ཁུངས། ༢༠༠༦ལོའི་སྦྲང་ཆར།