གྲོང་ཁྱེར་འདིའི་མགུལ་ན་ཉི་འོད་ལྡག་བཞིན་པ་ནི

ང་དང་ཁྱེད  ད་དུང་ཁོ

ད་དུང་རླངས་འཁོར་དང་མེ་ཏོག   ཆུ་བོ

ད་དུང་དུས་ཚོད

གྲོང་གསེབ་ནས་འོངས་པའི་སྤོ་བོ་ཞིག་གིས

རང་གིས་བཙག་པའི་ནས་ཆང་ལའང་བྲོ་བ་མི་འདུག་ཅེས

སྐོམ་པ་དང་ཆང་དམ་གཉིས་ཀ

མདོ་དབུས་མཐོ་སྒང་ནས་མདོ་དབུས་མཐོ་སྒང་ལ་གཡུག་གིན་འདུག

སྤྱི་སྤྱོད་རླངས་འཁོར་གྱི་དྲ་མའི་ཕྱི་རོལ་དུ

ངའི་མིག་ལམ་ཏུ་ཐོགས་པ་དག་ནི

ངའི་བརྗེད་བཞིན་པ་དང

ངས་དྲན་བཞིན་པ་གཉིས་ཀྱི་ཞེན་ཆགས་དང་འདྲ

གཞུང་ལས་གྲོལ་བ་ན

མི་ཚེ་ལྟ་བུའི་ཇ་ཁང་དུ་ཕྱིན་ཏེ

དེ་རིང་གི་ངལ་བ

དེ་རིང་གི་མཛེས་སྡུག་ལ་སྤྲད

རྩོམ་ཁུངས། ༢༠༠༨ལོའི་གངས་རྒྱན་མེ་ཏོག