རེ་སྒུག
མཚེར་ཤུལ་གྱི་ཐབ་རྡོ་བཞིན
ངས་ཁྱེད་ལ་སྒུག་ནས་བསྡད་ཡོད
ཉི་འོད་དྲོན་པོ་ཞིག་གི་བདེ་དྲོད་ལ་མ་རེག
ཟླ་འོད་བསིལ་མོ་ཞིག་ལ་སྙིང་གཏམ་མ་བརྗོད
ཨ་མ་ལྟ་བུའི་ཁྱེད་ཀྱི་འཛུམ་ཞལ་སྒོམ་སྟེ
རླུང་གི་བརྙས་བཅོས་མྱོང་བཞིན
མེ་ཏོག་སྐྱེས་མྱོང་བའི་སྤང་ལྗོངས་འདི་ན
ངས་ཁྱེད་ལ་བལྟས་ནས་བསྡད་ཡོད
ཤེའུ་ཆུང་རྔོན་པས་བདས་ཏེ་རི་ལ་བྲོས་ཐལ
ཁྲུང་ཁྲུང་སྟོན་ཟླས་དེད་ནས་རྒྱང་ལ་འཕུར་ཐལ
ངས་སྔར་བཞིན་རི་མགོ་མཐོ་ས་ཞིག་ན
ཁྱེད་ཀྱི་ལོག་ཕེབས་ལ་སྨོན་ཚིག་གཏོར་བཞིན
ངས་ཁྱེད་ལ་སྒུག་ནས་བསྡད་ཡོད
ས་རུབ་པའི་བར ནམ་ལངས་པའི་བར
ངས་སྐྱ་ཐིང་ཐིང་གི་མཚེར་ཤུལ་ན
སྐྱོ་ལྷང་ལྷང་གི་རྟ་ཕོའི་འཚེར་སྐད་ཀློང་ནས
ཁྱེད་རང་ཕེབས་པར་སྒུག་ནས་བསྡད་ཡོད
རྩོམ་ཁུངས། ༢༠༠༧ལོའི་གངས་རྒྱན་མེ་ཏོག