ང་ཡི་གངས་དགའ་རིག་གྲོལ།
ཨ་ཕས་བླང་བའི་གླུ།
རི་མཐོན་པོ་ཞིག་གི་རྩེ་ནས་རྒྱང་བལྟ་བྱེད་དོན
ཐང་ཡངས་ས་ཞིག་གི་ཕྱོགས་སུ་ཕྱི་མིག་འཁྲེང་དོན
ལུ་གུའི་འབའ་སྒྲ་ཐོས་ན་སྙིང་ཉེ་དོན
འབྲི་མོའི་ངུར་སྒྲ་ཐོས་དུས་སེམས་ན་དོན
ཨ་ཕའི་བུ་ལོ་ཁྱོད་རྒྱང་རིང་ན་ཡོད་པས་ལོས་ཡིན
ཞིང་གྲོང་གི་ཐོ་རེངས་ལ་ཐོས་པའི་བྱ་ཕོའི་གསུང་སྐད
སྒོ་ཁྱིས་དཀྲོག་པའི་རྩྭ་ཐང་གི་ཞོགས་པ་རེ་རེ་དང་འདྲ་བར
ངས་ཁྱོད་ཀྱིས་གཉིད་གོང་ནས་ཨ་ཕ་འབོད་པའི་ཉམས་སྣང་དེ་དྲན་བྱུང
ངས་ཁྱོད་ཀྱིས་གཉིང་གོང་ནས་ཨ་མར་འཐམ་པའི་བདེ་སྣང་དེ་དྲན་བྱུང
ད་ལྟ ཨ་ཕས་རི་ཆུས་བཅད་པའི་མཐོང་ལམ་གྱི་སྣེ་མོ་ནས
བུ་ལོ་ཁྱོད་དགའ་དུས་ཀྱི་དགོད་སྒྲ་དང་སྡུག་དུས་ཀྱི་ངུ་སྐད་ཐོས་ཡོང
རིག་རིག་གི་མིག་ཟུང་ཆེ་ཆེར་ཕྱེས་ནས་ཨ་ཕ་འཚོལ་བ་མཐོང་ཡོང
ལྡེམ་ལྡེམ་གྱི་ལག་ཟུང་མྱུར་མྱུར་སྲིང་ནས་ཨ་མ་འབོད་པ་ཐོས་ཡོང
ཇི་ལྟར་ངུས་ཀྱང་མིག་ཆུ་མེད་པའི་ལོ་ཟླ་འདིའི་ནང་དུ
ཁྱོད་ཀྱི་ཕ་མ་གཉིས་ཀ་ནམ་ཡང་ཐག་རིང་ལ་འགྲོ་དགོས
བྱིས་སྒྲུང་ཁྱུ་ཞིག་གི་རྫི་བོར་འགྲོ་དགོས
ཁྱོད་དང་ཁྱོད་ཀྱི་མ་འོངས་པ་བསམ་ཞིང་དྲན་ནས
ཁྱོད་ཀྱི་ཨ་ཅེ་དང་ཕུ་བོ་དག་གི་མ་འོངས་པ་སྲུང་དུ་འགྲོ་དགོས
ཨ་མས་བླང་བའི་གླུ།
ཞག་གསུམ་གྱི་རྨི་ལམ་ཁྲོད་ནས་ཁྱོད་རང་བྲང་ལ་སྦྱོར་དོན
ཉིན་གསུམ་གྱི་སྟོང་འདང་ཁྲོད་ནས་ཁྱོད་ལ་འོ་ཞིག་བྱེད་དོན
ཉིན་མཚན་དུས་དྲུག་ཏུ ཁྱོད་རང་དེ་འདྲའི་པྲ་ཚགས་ཀྱིས
ཨ་ཕའི་བྱམས་བརྩེའི་ཁུགས་ནས་རྩེད་འཇོར་རོལ་ལ
ཨ་མའི་འཁྲེང་ཞེན་དབུས་ནས་དགའ་དགོད་རྩེན་པས་ལོས་ཡིན
རྨི་ལམ་དུ
ཁྱོད་ཀྱིས་སྐད་གདངས་གཉོམ་པོས་ཨ་མ་འབོད་སྟངས་དེ
མེ་ཏོག་ག་ལེར་བཞད་པའི་སྒྲ་དབྱངས་ལས་སྙན་འདུག
ཁྱོད་རང་ལྷུག་ལྷུག་དགོད་པའི་འཛུམ་ཆུང་དེ
འཆར་ཀའི་ཉི་གཞོན་ལས་ཀྱང་མཛེས་འདུག
ད་དུང ལུ་གུ་ཆུང་ཆུང་དང་བེའུ་ཐོད་དཀར་གཉིས་ཀྱི་གམ་དུ
ཁྱོད་རང་ཇི་འདྲའི་སྙིང་དུ་སྡུག་ཨང
ཁྱོད་ཀྱིས་ཀྱང་ཉིན་དཀར་གྱི་ཡོལ་བ་དམ་པོར་བརྒྱབ་ཏེ
ཞེ་དུང་དུང་གིས་མཚན་མོའི་སྒོ་ཆེན་ཕྱེས་ནས
གོམ་ཁ་ཡང་མོས་རང་ཁྱིམ་གྱི་ཕྱོགས་སུ་ཡོང་གིན་ཡོད་དམ
རྒྱབ་རི་ལྟ་བུའི་ཨ་ཕ་སྙེགས་བཞིན་ཡོང་གིན་ཡོད་དམ
བྱམས་བརྩེས་གཏམས་པའི་ཨ་མ་བཙལ་ནས་ཡོང་གིན་ཡོད་དམ
ང་ཡི་གངས་དགའ་རིག་གྲོལ
རྩོམ་ཁུངས། ༢༠༠༩ལོའི་འོད་འབར་དེབ།