འགྲུལ་བཞུད།
གྲུ་གཟིངས་ཆེན་པོ་འདིས
ང་རང་བིས་ཏའོ་ལིས་ཡ་མཚོ་ཁུགས་སུ་ཁྲིད་ནས
མཚན་མོའི་གློག་ཞུན་ཁྲོད་ཀྱི
ཁོ་མོའི་མཛེས་སྡུག་ལ་ཉམས་སད་བྱེད་དུ་བཅུག
གྲུ་གཟིངས་ཆེན་པོ་འདིས
ང་རང་ཁང་བརྩེགས་མང་པོའི་འཚང་ཁའི་ཁྲོད་ཁྲིད་ནས
དེ་གའི་ཚ་གདུག་དང་ངལ་དུབ་བཏུང་བའི
ཁོ་མོའི་གསང་བའི་སྒོ་མོ་ཕྱེ་རུ་བཅུག
གྲུ་གཟིངས་ཆེན་པོ་འདིས
ང་རང་ཚོང་ར་མང་པོར་ཁྲིད་ནས
གསེར་དཀར་གྱི་མགུལ་རྒྱན་ཉོས་ཟེར
དངུལ་དཀར་གྱི་རྣ་ལོང་ཉོས་ཟེར
མུ་ཏིག་གི་ལག་གདུབ་ཉོས་ཟེར
གྲུ་གཟིངས་ཆེན་པོ་འདིས
ཕར་འགྲོ་ཚུར་འོང་གི་རླངས་འཁོར་མང་པོར
རང་རང་གི་མགྱོགས་ཚད་འགྲན་དུ་བཅུག་སྟེ
ངའི་སྔུན་ནས་སུ་ཞིག་གི་ར་མདའ་སྦྲན་སོང
གྲུ་གཟིངས་ཆེན་པོ་འདིས
ལམ་བར་དུ་གླུ་གཞས་མང་པོ་བླངས་ཤིང
ཕྱུག་པོ་རྣམས་ཀྱི་མ་རྩ་དང
སྒེག་མོ་རྣམས་ཀྱི་ལང་ཚོ་གླེང་ནས
ང་ལ་བརྙས་བཅོས་ཚད་མེད་བཏང་སོང
བིས་ཏའོ་ལིས་ཡ་མཚོ་ཁུགས་དང་བྲལ་རྗེས
ངས་རང་ཉིད་ཁེར་རྐྱང་གི་འབྱོར་མེད་པ་ཞིག་ཡིན་པ་རྟོགས་ལ
དེ་གའི་མཛེས་སྡུག་གི་རྨི་ལམ་དག་ཀྱང
འཆར་ཡན་གྱི་སྙན་ངག་ཅིག་ཏུ་གཞི་ནས་ཚོར་བྱུང
རྩོམ་ཁུངས། ༢༠༠༧ལོའི་གངས་རྒྱན་མེ་ཏོག