མཐོང་སྣང་།
རྒྱུ་ནོར་གྱི་སྐོམ་པས་གཟིར་བའི་མི་ཚོགས་ལས
ངས་ཀྱང་དབུགས་ཧལ་ཧལ་དུ
འཁོར་བ་ཞིག་སྐྱོང་བའི་མ་རྩ་འཚོལ་བར་བྱས
ལ་ལ་དག་འཇེབ་འཁོར་ལས་ཕེབས་དུས
ངའི་རྐང་མཐིལ་ལ་ན་ཟུག་གི་སྨུག་སྤྲིན་ལྡིང་ཞིང
ལ་ལ་དག་རྐང་རྗེན་དུ་བཞུད་དུས
ངའི་ཡ་ཁོག་ལ་ལྷོད་བག་གི་མཚོ་མོ་འཁྱིལ་སོང
དེ་ནས་ཀྱང་བབ་བརླིང་གི་གདན་ལ་བཞུགས་ཏེ
འོ་ཇ་ཞིག་འཐུང་འདོད་སྐྱེས་བྱུང
མ་གཞི སྐོམ་པ་དེ་གང་ནས་བྱུང་ངམ
ངས་ཡུན་རིང་ལ་བསམ་བློ་བཏང་ཞིང
ངས་ཡུན་རིང་དུ་ཞིབ་རྩིས་རྒྱག་དུས
འོ དེ་ནི་འདོད་ཡོན་གྱི་ཟིལ་ཤུགས་ཡིན་འདུག
དེ་ནི་ལོངས་སྤྱོད་ཀྱི་བསླུ་བྲིད་ཡིན་འདུག ད་དུང
དུས་ཚོད་ཀྱི་ཀུ་རེ་དང་དངོས་ཡོད་ཀྱི་ཚོད་བགམ་ཡང་ཡིན་འདུག
རྩོམ་ཁུངས། ༢༠༠༧ལོའི་གངས་རྒྱན་མེ་ཏོག