ཉིན་མཚན་དེའི་རྒྱུད་དུ་བཏང་བའི་ང་རང་གཅིག་པུ །
ཉིན་མཚན་དེར
བསམ་གཞིགས་དང་བརྩེ་དུང་གང་ཡང་མེད
འོལ་ཚོད་ཀྱིས་བཏབ་པའི་ལམ་བྱང་ཚར་རེ
སྔར་ནས
མཆོད་སྦྱིན་དུ་རོལ་བའི་ལྕགས་མདེའུ་ཞིག
ཟུག་གཟེར་དང་འོ་དོད་ཆུ་ལ་འདྲེས་ཕྱིན
མཚམས་སྤྲིན་གྱི་ཡོལ་བ་རླུང་གིས་གཟིམ
ཁ་དོག་གི་སྒོམ་བྱ་མེ་རུ་འབར
གཟུགས་འགྱུར་དུ་རེག་པའི་ཕུང་བོའམ
གཏན་ཚིགས་སུ་རློམ་པའི་རང་གཤིས་ཚོགས
སླར་ཡང
རི་ཤོར་གྱི་དཔུང་ན་འཚུབ
སྨྱུག་རྩེ་བཙའ་ཡིས་ཟིན
མདུང་སྣེ་རྡོ་ཡིས་བསྣུན
ལམ་ཁ་མུན་པས་འཐབ
ཡོངས་སུ་རྫོགས་པའི་ལེའུ་འདི
སུ་ཞིག་གིས་བཟོས་པའི་གྲིབ་མ་དང
གྲིབ་མ་དེའི་ཁྲོད་ཀྱི་རྡོ་མཁར་ཡིན
གང་ལྟར
ད་ལྟ་བགྲོད་བཞིན་པ
ཡུལ་ཕྱོགས་དེའི་རྫོགས་པ་རུ
ཁྱུར་མིད་དུ་བཏང་བའི་ཉིན་མཚན་དེ་དག
ཉིན་མཚན་དེས་ཁྱུར་མིད་དུ་བཏང་བའི་ང་རང་གཅིག་པུ
༢༠༠༠.༡༠.༧
རྩོམ་ཁུངས། རྨ་ཆུའི་སྙན་ངག