བཀྲ་ཤིས་པའི་ཉིན་ཞིག་ལ
ཨ་མྱེས   ངལ་བ་དང་དུབ་པ་མེད་པར
འཇིག་རྟེན་གྱི་བདེན་ལུགས་ཞེ་ལ་བཅགས་རྗེས
སྟེང་ཕྱོགས་ལྷ་ཡུལ་ནས་ཆས་ཏེ   མྱུར་བ་མྱུར་བར
མདོ་སྨད་སྤྱིའི་ཆགས་འཇིག་སྐྱོང་བའི་ལྷ་གཙོར་བྱོན

སྐབས་འདི་དག་ཏུ   ཨ་མྱེས
རྨ་ཆུ་འབྱུང་ས་ནས    གེགས་མེད་བདེ་ཐང་ངང
རྨ་རིགས་སུམ་བརྒྱ་དྲུག་ཅུ
རྨ་འཁོར་སྟོང་དང་ལྔ་བརྒྱ་ལས་བརྒལ་ཏེ
མཚོ་ངོས་ལས་ཆེས་མཐོ་བའི་ས་ན
དར་རྒུད་ཀྱི་སེམས་བསྐྱེད་དྲག་ཏུ་སྦྱོང་ཞོར
ཧ་ཅང་གཞུང་དྲང་གིས་དཀར་ལྷམ་མེར་བཞུགས

ཨ་མྱེས   ཁྱོད་ཉིད་འཚོ་ཞིང་གཞེས་པས
ངའི་ཉམས་སྣང་ལ
ཡངས་པ་ནམ་མཁའ་ནས་མཐོ་བ་རི་རབ
ཁྱེད་ཀྱི་མཁྱེན་པས་མ་ཤོང་བ་མེད་ལ
འགྲོ་བ་མིའི་རིགས་ནས་མ་རུང་འདྲེ་སྲིན་ཚོགས
ཁྱེད་ཀྱི་མཐུ་ཡིས་མ་བཏུལ་བའང་མེད་དེ
ཁྱོད་ནི་ནམ་ཡང    བདེ་བ་ནས་བདེ་བར་བགྲོད་པའི་རྐང་སྟེགས་ལ་གྲུབ་པས
སྔ་མོ་ཞིག་ནས     ང་ཚོར་མཁོ་བ་དེ་གཞན་ནས་འཚོལ་མི་དགོས་སྙམ
གང་ལྟར    ཨ་མྱེས   ཁྱེད་ཉིད་བཞུགས་པས
ང་ཚོས་རྨི་ལམ་སྐྱིད་པོ་རེ་རྨི་བཞིན་བསྡད་ཆོག་པ་ལ་ཨང
བསྔགས་བརྗོད་ཡིད་ཀྱི་མེ་ཏོག

རྩོམ་ཁུངས། ༢༠༠༣ལོའི་གངས་རྒྱན་མེ་ཏོག་དེབ་གཉིས་པ།