རྒོད་པོ་འཕུར་སོང   རྒོད་པོ་འདི་ལྟར
ཐག་རིང་ལ་འཕུར་སོང
རི་རབ་ཀྱི་བརྟན་བརླིང་དང་ང་རྒྱལ་ཁུར་ནས
རླུང་ངོགས་ཀྱི་གྲོང་ཚོ་རེ་རེ
མིག་གིས་བསྐྱུར་གྱིན   བསྐྱུར་གྱིན
རྒོད་པོ་འདི་ལྟར   ཕྱི་མིག་དང་ཉམ་ང་མེད་པར
ཐག་རིང་ཐག་རིང་གི
སྤྲིན་དཀར་གྱི་འདུ་ལོང་འཁྲིགས་པའི་མཁར་ནང་ལ་འཕུར་སོང

རྒོད་པོ་འཕུར་སོང    རྒོད་པོ་འདི་ལྟར
ཐག་རིང་ལ་འཕུར་སོང
མཁའ་དབུགས་ངན་ངོན་གྱི་སྡིག་ཉེས་འདོར་བཞིན
མི་ཡུལ་གྱི་འཇིགས་སྣང་རེ་རེ
གཟུགས་མེད་ཀྱི་རླུང་ལ་བསྐུར་གྱིན  བསྐུར་གྱིན
རྒོད་པོ་འདི་ལྟར  ཆགས་སྲེད་དང་ཕྱི་འགྱོད་མེད་པར
རྒྱང་རིང་རྒྱང་རིང་གི
སུམ་ཅུ་རྩ་གསུམ་གྱི་ཉི་ཟླའི་འོད་ཁྱིམ་ལ་འཕུར་སོང

རྒོད་པོ་འཕུར་སོང   རྒོད་པོ་འདི་ལྟར
འཕུར་ཟིན་པའི་དུས་ཚོད་ཀྱི་མཐའ་མར
ཡང་བསྐྱར    རྒོད་པོ་གཞན་ཞིག་ཀྱང
ནམ་མཁར་ལྡིང་འོས

རྩོམ་ཁུངས། ༢༠༠༠ལོའི་གངས་རྒྱན་མེ་ཏོག་དེབ་བཞི་བ།