༡

    ཁྱོད་རང་འཇིག་རྟེན་འདིར་སྐྱེས་སོང་བ་ཙམ་གྱིས་མི་ཆོག་ལ།མི་ཞིག་གི་མིང་ཐོ་ཐོབ་པ་ཙམ་གྱིས་ཀྱང་གང་ཡང་མི་ཕྱིན་ཏེ། ཆེས་ཡོད་དགོས་པ་ནི་དཔྱོད་ཤེས་ཀྱི་བློ་མིག་ཡིན་ཞིང༌། ཆེས་བསྒྲུབ་འོས་པ་ནི་མི་ཆོས་ཀྱི་བདེན་པ་འཚོལ་ཐབས་དེ་ཡིན་པས། མདུན་དུ་སྐྱོད་ཀྱིན་པའི་སྤྱི་ཚོགས་འདིའི་ཁྲོད་ནས་རང་ཉིད་ནམ་ཡིན་ཡང་རྗེས་སུ་ལྷག་ན་མི་འགྲིག

༢

ཁྱོད་ཉིད་མིའི་རིགས་སུ་གཏོགས་པའི་ཆ་ནས་འགྲོ་བ་མིའི་ཐོབ་ཐང་དང་བདག་དབང་ལོངས་སུ་སྤྱོད་དགོས་ལ། ཁྱོད་ཉིད་མི་རིགས་བྱེ་བྲག་པ་ཞིག་གི་རུས་རྒྱུད་ལས་མཆེད་པ་ཡིན་པའི་དབང་གིས་རང་མི་རིགས་ཀྱི་དུས་གསུམ་གྱི་ཆགས་འཇིག་ལ་འགན་འཁྲི་ཡོད་དགོས། དེ་བས། མི་ཞིག་གི་མི་ཚེ་ནི་རླབས་དང་ཕུན་ཚོགས་ཤིག་ལ་བརྩི་བཞིན་ཡོད་ནའང༌། རང་སྲུང་རང་བདག་ཙམ་ལས་ཅི་ཡང་མི་ནུས་པ་དག་གི་མི་ཚེ་ནི་ཅི་འདྲའི་ལས་སླ་མོ་ཞིག་རེད་ཨང༌།

༣

ཁྱོད་ཀྱིས་མི་གཞན་ངོ་ཤེས་དགོས་པ་བཞིན་དུ་རང་ཉིད་ཀྱང་ངོ་ཤེས་ན་འགྲིག་སྟེ། རང་གི་བསམ་བློའི་མཐོ་ཚད་དང་ཀུན་སྤྱོད་ཀྱི་མཛེས་བཙོག  རིན་ཐང་གི་ལྟ་བ་སོགས་ཅི་དང་ཅི་ལྟ་བུ་ཞིག་ཡིན་པ་དག་ལ་གསལ་ཆ་ངེས་ཅན་ཡོད་དགོས་པ་ལས།འོལ་ཚོད་ཀྱིས་མི་ཚེ་ཕུད་ཐབས་བྱེད་པ་ནི་རང་མགོ་རང་གིས་གཡོགས་པ་ཁོ་ན་ཉིད།

༤

དགག་སྒྲུབ་ནི་སྡིགས་དམོད་མ་ཡིན་ལ་དོགས་སློང་ནི་གཏོར་བཤིག་དེ་བས་མ་ཡིན་པས།དོགས་སློང་དང་དགག་སྒྲུབ་དག་གི་ཁྲོད་ནས་ཁྱོད་ཀྱིས་བསམ་བློ་རྙེད་སྲིད་ཅིང༌། བསམ་གཞིག་དང་འཚོལ་ཞིབ་ཀྱི་བར་ནས་ཁྱོད་ཀྱིས་བདེན་དོན་རྙེད་ཐུབ་ཕྱིར།མི་ཞིག་དྲང་ལམ་ལ་འགྲོ་བའི་སྔོན་འགྲོ་ནི་བསམ་བློའི་དོགས་སློང་དང་བསམ་བློའི་དགག་སྒྲུབ་ཡིན་པ་ལས།འུད་བསྟོད་དང་མཐུན་ཐབས་ལར་ནས་མིན།

༥

ཁྱོད་ནི་ཡ་རབས་ལ་དགའ་ཞིང་དངོས་ཡོད་ལ་ཞེན་པའི་ཤེས་ཡོན་ཅན་གྱི་ལམ་ལ་ཞུགས་འདོད་ན། མཚན་ཉིད་རིག་པའི་གཞུང་ལུགས་ཀྱི་ངོ་བོ་ཤེས་ཀྱང་ཆོག་ལ། ཚན་རིག་ལག་རྩལ་གྱི་ཉམས་མྱོང་འཐོབ་ཀྱང་རུང་མོད། ཆེས་མེད་ཐབས་བྲལ་བ་ཞིག་ནི་བསམ་བློའི་སྒེར་ཚུགས་ཁྱད་པར་ཅན་ཞིག་དང༌། ལྷད་མེད་ཀྱི་ཀུན་སྤྱོད་སྔ་ན་མེད་པ་ཞིག་ཡོད་འོས་པ་ནི་རྩ་བའི་ཆ་རྐྱེན་ཡིན།

༦

མི་རིགས་དང་རིག་གནས་མི་མཚུངས་པའི་ཁོར་ཡུག་ཏུ་རང་རང་སོ་སོར་རིན་ཐང་གི་ལྟ་ཚུལ་མི་འདྲ་བ་རེ་རེ་ཡོད་ཆོག་པ་ནི་ཤིན་ཏུ་གལ་ཆེ་ནའང༌།དེ་དག་ལས་ཀྱང་ཡིད་འཇོག་བྱ་བ་ནི་བསམ་བློ་རང་དབང་དང་ལྟ་བ་མཉམ་གནས་ཀྱི་མཁའ་དབུགས་ཡག་པོ་ཞིག་ཆགས་དགོས་པ་ནི་ཐོག་མའི་རྨང་གཞི་ཡིན་སྟབས། ཁྱོད་ཀྱིས་རང་ཉིད་མ་གཏོགས་གཞན་གྱི་ལངས་ཕྱོགས་ལ་བརྩི་བཀུར་མི་ཐུབ་པ་ནི་དུས་གཏན་དུ་ནོར་འཁྲུལ་ཡིན།

༧

ཁྱོད་ཀྱིས་བདག་ཉིད་ལ་བརྩོན་པ་དང་འདྲ་བར་མི་རིགས་སྤྱི་ལའང་བརྩོན་ངེས་ཤིང༌། ཁྱོད་ནི་རང་གི་ཆེད་དུ་ཆེ་སྲོག་ཀྱང་འདོར་ཕོད་པ་བཞིན་དུ་མི་རིགས་ཀྱི་དོན་དུ་ཡང་རང་སྲོག་བློས་གཏོང་མཁན་ཞིག་ཡིན་ནའང་ཆོག་མོད། དེ་བས་ཀྱང་ཆེས་མཐོ་ཤོས་ནི་གནས་ལུགས་ཀྱི་རྒྱ་མའི་མདུན་ནས་རང་སྐྱོན་རང་གིས་ཁས་ལེན་ཕོད་པ་དེ་ཡིན་ན།ཁྱོད་རང་ཁ་ཕྱི་ལ་འཁོར་ཏེ་ལས་བྱ་གཉེར་རྒྱུ་དེ་མིན་པར་ཁ་ནང་ལ་འཁོར་ནས་མནོ་བསམ་གཏང་རྒྱུ་དེ་རེད།

༨

ཁྱོད་རང་རྩོམ་རིག་པ་ཞིག་ཡིན་ཡང་ཆོག་ལ། དེ་བཞིན་དུ་སྒྱུ་རྩལ་བ་དང་ཚན་རིག་པ། མཚན་ཉིད་རིག་པ་བ་སོགས་ཡིན་ཡང་ཆོག་སྟེ། ཐ་ན་གནག་རྫི་ཞིག་ལས་མ་ཡིན་ནའང༌།དུས་ནམ་ཡང་བརྗེད་མི་རུང་བ་ལས་གཅིག་ནི་གཞན་ལ་ཉེས་འགེལ་གྱི་ཞྭ་མོ་མི་བསྐོན་རྒྱུ་དང༌།ཅིག་ཤོས་ནི་གཞན་གྱི་དཔལ་ཡོན་རང་ཉིད་ཀྱི་ཡིན་ཁུལ་མི་བྱེད་རྒྱུ་དེའོ།།

༩

མི་ཚེ་ནི་བདེ་སྐྱིད་ཀྱི་ཕྱིར་དུ་བསྐྱེད་པ་ཞིག་མིན་ཞིང༌།སྡུག་བསྔལ་ཁོ་ནའི་ཆེད་དུ་བྱུང་བ་ཞིག་ཀྱང་མ་ཡིན་མོད།མི་ཚེ་བདེ་སྐྱིད་ལ་བསྐུལ་བར་འདོད་པ་ནི་མི་རྣམས་ཀྱི་ཕུགས་བསམ་གྱི་གྲྭ་ཟུར་ཆེ་ས་ཞིག་ཡིན་པས།ཁྱོད་ལ་འཚོ་བ་དང་གྲགས་སྙན། ཐོབ་ཐང་དང་ཡོན་ཏན་སོགས་ཀྱིས་ཀུན་ནས་དབེན་འདུག་ཀྱང༌།རང་སེམས་རང་གིས་སྐྱིད་ལ་སྐུལ་བ་ནི་ཚེ་ཐོག་འདིའི་ལས་རིགས་ཉག་གཅིག་ཡིན་ངེས།

༡༠

ཁྱོད་ནི་རང་ཡུལ་དང་མེས་རྒྱལ་སྲུང་སྐྱོབ་བྱེད་པར་སྤྲོ་བ་ཡོད་མཁན་ཞིག་ཡིན་ན། མི་རིགས་རང་གི་སྐད་ཡིག་ཁྱབ་སྤེལ་དང་སྤྱོད་བཟང་མཐོར་འདེགས།གོམས་གཤིས་ལེགས་པོ་རྒྱུན་སྐྱོང་མཛད་དགོས་པ་མ་ཟད།བྱ་དངོས་གསར་བ་དང་རིག་གནས་གསར་བ་དག་ཚུལ་ལེན་བྱེད་པའི་བློ་སྤོབས་ཡོད་དགོས་ལ།ལྷག་ཏུ་རིག་དངོས་འགངས་ཆེན་དག་མྱུར་སྐྱོབ་དང་སླར་གསོ་བྱེད་པ་སོགས་ནི་ཁ་ཚ་དགོས་གཏུག་གི་ལས་དོན་ཡིན་པ་སྟེ། 

མདོར་ན། རྒྱ་ནག་གི་ཉེ་རབས་མཁས་པ་ལུའུ་ཞུན་ལགས་ཀྱིས་གསུངས་པ་ལྟར། མི་རིགས་ཉམས་རྒུད་ཀྱི་དུས་སུ་ཀི་འདེབས་མཁན་གྱིས་ཀི་ཐོབ། ཤེད་འདོན་མཁན་གྱིས་ཤེད་ཐོན། དྲོད་ཅི་ཙམ་ཡོད་ན་འོད་དེ་ཙམ་སྤྲོས་ཤིག་ཅེས་པ་འདི་ལ་གོ་བ་གཏིང་ཟབ་ཅིག་ལེན་པར་རིགས་སོ།།

                                                                  2009 08 6ཉིན་གསེར་ཐང་བླ་རུང་དུ་བྲིས།

རྩོམ་ཁུངས། ངེད་དྲ་བ།