ཁྱོད་རང་ངའི་འགྲོ་རོགས་ཡིན་པ་བདེན་དུ་ཆུགས་དང་ཉལ་རོགས་ཡིན་ཚུལ་ཅི་ལྟར་ལབ།འོད་སྣང་དང་མཉམ་དུ་ཁྱོད་རང་མདུན་དུ་སོང་ནས་ང་ལ་ལམ་སྟོན་མཛད་ཅིང་།རྗེས་སུ་བསྙེགས་ཏེ་གསང་མྱུལ་བྱས།ཚེ་གཅིག་ལུས་གཅིག་འདི་ལ་འགྲོགས་པ་ཆེས་སྔ་ཞིང་འདྲིས་པ་ཆེས་དལ་བ་འུ་གཉིས་ཀའི་བདེན་ཁ་སུ་ལ་སྟེར།འོན་ཀྱང་ཟླ་འོད་མེད་པའི་མཚན་མོ་དེར་ཁྱེད་ཀྱིས་ངའི་རིང་ཐུང་འཇལ་མྱོང་ངམ།ངས་མི་ཚེ་ལ་རྒྱང་བཞུད་གཏོང་དུས་ཁྱེད་ཉིད་ཁ་རོག་གེར་ལམ་ལ་ཆས་ཟིན།མི་ཚེའི་ལམ་ཕྱེད་ལ་སླེབས་ཟིན་ཀྱང་ཁྱེད་ཀྱིས་ང་ལ་སྐད་ཆ་ཚིག་གཅིག་ཀྱང་མི་བརྗོད་དོན་ཅི་ཡིན།འཇིག་རྟེན་གྱི་མི་ཁར་སྐྲག་པའམ་རླུང་ཁའི་དར་ལྕོག་བཞིན་ཟད་པའི་མི་གཤིས་འདི་ལ་ཡིད་རྟོན་མེད་པ་ཤེས་པར་ལོས་ཡིན།རང་ཁེར་རྐྱང་གིས་འགྲོ་དུས་སྡུག་ཡུས་གླེང་སའི་གྲོགས་ཤིག་ཇི་འདྲའི་མཁོ་ཨང་།

མལ་ས་ནས་གན་རྐྱལ་དུ་ཉལ་ནས་དེའི་སྐོར་ལ་བསམ་གཞིག་བྱེད་དུས་ང་ངོ་མ་སྐྲག་གི གལ་ཏེ་ཁྱོད་ཀྱང་གདོང་འབག་གྱོན་པའི་མི་ཚོགས་སུ་ཞུགས་ཏེ་ང་ལ་རྡེའུ་ནག་སྤུངས་ཚེ་ངའི་མངོན་ལྐོག་གི་བགྱི་བ་མཐའ་དག་དང་ཕྱི་ནང་གི་གསང་བ་ཡོད་ཚད་སྒོག་ཤུན་བཞིན་བཤུས་འགྲོ།འུ་གཉིས་ད་རུང་མུ་མཐུད་དུ་འགྲོ་དགོས།ཐག་རིང་ཐག་རིང་ལ་འགྲོ་དགོས།མི་ཚེ་འདིར་རྐང་བ་རྡོ་ལ་ཐོགས་པར་འཛེམ་དགོས་ཤིང་གསང་བ་རླུང་གིས་འཁུར་བར་དོགས་དགོས་པས།ལྷ་ཆེན་གྱིས་ངའི་འགྲོ་རོགས་སུ་མངགས་པ་ཁྱོད་ཁོ་ནར་ངེས།གསང་བར་དཀར་མེ་མ་བཀར་ལ་བདེན་པ་ར་སྤྲོད་ཀྱང་མ་བྱས་པར་“ཆུ་དཀྱིལ་གྱི་ཕ་བོང་”བཞིན་རང་ཚུགས་མ་བོར་བ་ཁྱོད་གཅིག་པུ་ཡིན།

གོ་ཁ་དྲོ་སར་འཛོམས་པའི་མ་སྲི་ཚོའི་འུད་བརྗོད།ཉལ་ས་བདེ་མོར་ཁེན་པའི་རྒན་པོ་ཚོའི་དཀྱོག་ཚོགས།ཐམས་ཅད་འདི་ཁྱོད་ཀྱི་བརྟུལ་ཞུགས་སུ་འགྱུར་འགྲོ་ན།མི་ཡུལ་ན་རྙོག་འཛིང་ཨེ་ཡོད།མི་ལུས་ལ་སྐྱོན་མཚང་ཨེ་ཡོད།མི་ཁ་ན་འཕྱ་སྨོད་ཨེ་ཡོད།ད་དུང་་་་་

རྩོམ་ཁུངས། རྩོམ་རིག་འདབས་བརྒྱའི་ཚལ་ཡངས །