ལོ་འདི་ཚོར་སེམས་པ་འདི་རང་དབང་མེད་པར་དགའ་སྐྱོ་ཆགས་སྡང་གི་ཀློང་དུ་བྱིངས་ཏེ་ ཕྱིར་འོང་ཐབས་མེད་པར་གྱུར་ཚར་བས། སེམས་ཚོར་དེ་དག་དང་ཡང་ན་དགའ་སྐྱོ་ཆགས་སྡང་གང་གི་ཕྱོགས་སུ་ཡང་མ་ལྷུང་བའི་ སེམས་ཚོར་ཕུང་སུམ་དག་བེད་སྤྱད་དེ་སྙན་ངག་མང་པོ་ཞིག་བྲིས་པ་དང་། བྲིས་བྲིས་ཕལ་ཆེ་བ་དྲ་ངོས་སུ་སྤེལ་བ་ཡིན། དེ་ལ་དྲ་གྲོགས་ཚོའི་ངོས་ནས་དཔྱད་བརྗོད་དྲང་ལྡོག་ཅི་རིགས་ཀྱིས་སྤེལ་བ་མ་ཟད། ཐ་ན་ངའི་སྙན་ངག་རེ་ཟུང་ནི་སྙན་ངག་མིན་པར་སྒྲོག་མཁན་ཡང་ཡོད། དེ་ནི་ཁྱོད་ཀྱིས་བྲིས་བྲིས་ཚང་མ་སྙན་ངག་ག་ལ་ཡིན་ཞེས་པའི་ཐ་ཚིག་འདིས་གསལ་སྟོན་བྱས་ཡོད་པ་དང་། ཐ་ཚིག་འདིའི་བདག་པོ་དག་གི་སེམས་ཁོང་དུ་སྙན་ངག་ཅེས་པ་དེ་ནི་འདི་འདྲ་དང་དེ་ འདྲ་ཞིག་ཡིན་དགོས་ཞེས་པའི་སྡོམ་ཚིག་གམ་མཚན་ཉིད་ཅིག་ཨ་འཐས་སུ་བཟུང་ཡོད་པ་དེ་ ང་ཚོས་དེ་མ་ཐག་ཏུ་ཤེས་ཐུབ།
  གནའ་ནས་ད་བར་སྙན་ངག་ལ་མཚན་ཉིད་འཇོག་མཁན་ མང་པོ་ཞིག་བྱུང་དང་འབྱུང་བཞིན་ཡོད་ཅིང་། ཁོ་ཚོར་གུས་ཞབས་དོར་ཏེ་བརྗོད་ན་རང་སྣང་གང་དྲན་གྱིས་སྙན་ངག་ལ་མཚན་ཉིད་ཅིག་ བཞག་སྟེ་སྙན་ངག་གི་བཙོན་ཁང་ཞིག་བརྩིགས་པ་རེད། བཙོན་ཁང་སྙིང་རྗེ་བོ་དེ་བརྩིགས་མཁན་ཁོ་ཚོ་རེད་ལ་བཟང་བཙོན་དེའི་ནང་དུ་ཆེས་ ཐོག་མར་འཛུལ་མཁན་ཡང་ཁོ་ཚོ་འབའ་ཞིག་རེད་ལ་ཆེས་མཐའ་མར་དེའི་ནང་དུ་སྐུ་ཚེའི་ འཕེན་པ་རྫོགས་མཁན་ཡང་ཁོ་ཚོ་འབའ་ཞིག་ལོས་ཡིན།
   རྒྱ་གར་གྱི་སྙན་ངག་མཁན་དབྱུག་པ་ཅན་གྱིས། དེ་ནི་ད་ལྟའང་རྣམ་རྟོག་སྟེ། །དེ་དག་མ་ལུས་སུས་བརྗོད་ནུས། །ཞེས་སྙན་ངག་གི་ངོ་བོ་དང་ངེས་བསྟན་ཞེས་པ་དེ་ལ་སུ་ཞིག་གིས་མཐའ་མའི་ཐག་གཅོད་ བྱེད་ནུས་ཞེས་བརྗོད་ཡོད་པ་བཞིན། བརྩམས་ཆོས་གང་ཞིག་སྙན་ངག་ཡིན་མིན་གྱི་ས་མཚམས་འབྱེད་རྒྱུ་དེ་ནི་རྣམ་དཔྱོད་ མེད་པའི་རང་མཚང་ཞིག་དང་ལས་ཀ་མེད་པའི་ལས་ཀ་ཞིག་ཡིན་པ་སྨྲ་མི་དགོས།
སྙན་ངག་ལ་མཚན་ཉིད་འཇོག་ན་འདོད་མཁན་དེ་ ཚོའི་རྩ་བའི་མགོ་རྨོངས་ས་ནི་སྙན་ངག་ཅེས་པའི་ཐ་སྙད་རང་སྟེང་གི་གོ་དོན་ཙམ་ལས་ ནམ་ཡང་འདའ་མ་ཐུབ་པར། སྙན་ངག་ཡིན་ན་སྙན་མོ་ཞིག་དགོས་ཀྱི་ཡོད་ས་རེད་བསམ་པའི་ནོར་འཁྲུལ་དེའི་དབང་ དུ་སོང་སྟེ། ཚིག་རྒྱན་བྲིས་མེད་པ་དང་ཡང་ན་སྐབས་ཐོག་དེ་རང་ལ་སེམས་ནང་འབབ་རྒྱུ་ཅང་མེད་ན་ དེ་ནི་སྙན་ངག་ཅིག་ག་ལ་ཡིན་བསམས་པ་དེ་ལས་ཅི་ཞིག་གི་རྒྱབ་རྟེན་ཡོད་ཨང་།
གནའ་ནས་ད་བར་སྙན་ངག་མཁན་ཆེན་པོ་སྐོར་ ཞིག་གིས་སྣང་སྲིད་བརྡ་དང་དཔེ་ཆར་ཤར་བ་ཞེས་པའི་ཚིག་ཕྲེང་ཡི་གར་འབབ་ ཅིང་དོན་ལ་གནས་པ་ཞིག་ཡང་དང་ཡང་དུ་བསྐྱར་དང་སྐྱོར་བཞིན་ཡོད་ཅིང་། གལ་སྲིད་ཁྱོད་རང་སྙན་ངག་འབྲི་བ་ལ་རང་དབང་འབྱོར་ཡོད་པ་དང་རྟོགས་པ་ཀློང་དུ་ བརྡོལ་ཡོད་ཚེ། ཁྱོད་ཀྱིས་བྲིས་པ་ཐམས་ཅད་སྙན་ངག་མིན་པའི་ངེས་པ་ག་ལ་ཡོད་ཅིང་། ཁྱོད་ཀྱིས་བརྗོད་པ་ཐམས་ཅད་སྙན་ངག་ཏུ་མི་འགྱུར་པའི་གཏན་ཚིག་ཅིག་ཀྱང་གང་ནས་ རྙེད་ཨང་། ཤིང་གི་བསྟན་བཅོས་ལས། སྣང་བ་དཔེ་རུ་ཤར་བ་ཡི། །རྣལ་འབྱོར་དེ་ལ་གདམས་ངག་མང་། ཞེས་པ་འདིས་སྣང་སྲིད་སྙན་ངག་ཏུ་ཤར་ཟིན་པའི་སྙན་ངག་པ་ཞིག་ལ་མཚོན་ན་གང་སྣང་ སྙན་ངག་དང་གང་བྲིས་སྙན་ངག་མ་ཡིན་ན་ཅི་ཞིག་ཡིན་ནམ་ཞེས་པའི་དྲི་ཚིག་གནམ་ས་རལ་ བ་ཞིག་ཀྱང་བཞེངས་ཤིང་གྲུབ་པར་བྱས་ཡོད་དོ།།
དེ་བཞིན་ཚད་མ་རྣམ་འགྲེལ་ལས། སྒྲ་ནི་བརྗོད་འདོད་རྗེས་འབྲང་ཕྱིར། །མ་བརྗོད་ནའང་འདོད་པས་ཁྱབ། །ཅེས་པ་ཞིག་ཡོད་པ་འདིས་ཀྱང་སྙན་ངག་མཁན་གྱི་རྟོག་པའི་ངོ་བོར་བརྗོད་བྱ་གང་ ཞིག་སྙན་ངག་ཏུ་འཕོས་ཚར་བའི་རྗེས་སུ། ཁོས་སྙན་ངག་གི་བློས་བསླངས་དེ་ཡིག་ཐོག་ཏུ་བཀོད་དང་མ་བཀོད་ལ་ཁྱད་པར་ཅི་ཡང་ མེད་པར་དེ་ནི་སྙན་ངག་ཅིག་ཏུ་གྲུབ་ཚར་བའི་གནས་ལུགས་གསོན་རྗེན་མ་དེ་བསྟན་ཡོད་ པ་མ་ཡིན་ནམ།
སྙན་ངག་ཅེས་པ་དང་རྒྱན་ཞེས་པ་འདི་གཉིས་ ཀྱིས་ཁོ་བོས་བྲིས་པའི་སྙན་ངག་ཡོད་ཚད་ཟིན་ཡོད་ཅེས་ཀྱང་བརྗོད་ཆོག་པ་སྟེ། མེ་ལོང་མ་ལས་བསྟན་པའི་རང་བཞིན་བརྗོད་པའི་རྒྱན་ཞེས་པ་དེས་ཁོ་བོའི་སྙན་ངག་གི་ བརྒྱ་ཆའི་ཚད་གཞི་ངེས་ཅན་ཞིག་ཁྱབ་བསྡད་ཡོད་ལ། གལ་སྲིད་སྙན་ངག་ལ་མཚན་ཉིད་འཇོག་མཁན་དག་གིས་ཀྱང་རང་བཞིན་ཅེས་པའི་མིང་ཚིག་ འདིའི་གོ་དོན་ངོ་མ་དེ་ཅུང་ཙམ་རེ་རྟོགས་ཡོད་ཀྱི་ན་ཡང་སྙན་ངག་ཅེས་པའི་རིག་ པའི་གཞུང་ལུགས་གཏིང་མཐའ་བྲལ་བ་འདིར་གུ་དོག་གི་མཚན་ཉིད་དགོད་བྲོ་བ་རེ་ངོ་ཚ་ རྒྱབ་ལ་གཡུགས་ནས་མི་འཇོག་ཁོ་ཐག་ཡིན།
   མཐའ་དོན་ནི་སྙན་ངག་ཅེས་པ་ནི་རྩོམ་པ་ པོའི་སེམས་ཚོར་ཞིག་གིས་བཞེང་སྐྲུན་བྱེད་དགོས་པ་མ་གཏོགས་ཀློག་མཁན་གྱིས་ཐག་གཅོད་བྱེད་དགོས་པ་ཞིག་ནམ་ཡང་མ་ཡིན་པས། ཁོ་བོའི་སྙན་ངག་གི་འཇིག་རྟེན་དུ་ཕེབས་ཏེ་རྩོམ་ཡིག་གང་ཞིག་སྙན་ངག་ཡིན་དང་ མིན་གྱི་ས་མཚམས་འབྱེད་པའི་ཀློག་པ་པོ་ཁྱེད་ཅག་གིས་དོན་མེད་པའི་ངལ་བ་དེ་མ་ བསྟེན་པར། གཏིང་མཐའ་བྲལ་བའི་ཁོ་བོའི་སྙན་ངག་གི་བློས་བསླངས་ཆེན་པོ་དེའི་ངོས་དང་ཟུར་གང་ རུང་རེ་ནས་ལྷ་ལ་བདུད་རྩི་དང་མི་ལ་འོ་ཆུ། ཡི་དྭགས་ལ་རྣག་ཁྲག་སོགས་རིགས་དྲུག་གི་མྱོང་སྣང་མི་འདྲ་བ་དག་ལ་ལོངས་སུ་ སྤྱོད་པར་འཚལ། འདི་ནི་ང་རྒྱལ་དང་ངར་ཤུགས་ཀྱིས་བརྗོད་པའི་ཐལ་དྲགས་པའི་སྐད་ཆ་ཞིག་མ་ཡིན་པར། སྙན་ངག་རྩོམ་འབྲིའི་ལས་ཀ་ཡིས་མི་ཚེ་བསྐྱལ་བའི་སྐྱེ་བོ་ཞིག་གི་མྱོང་ཚོར་དམར་ རྗེན་མ་དེའོ།།

རྩོམ་ཁུངས། ཀླུ་སྨྱོན་གྱི་ཟིན་བྲིས།