ཡིག་རྨོངས་མང་བའི་རྒྱལ་ཁབ་དང་མི་རིགས་ཀྱི་སྤྱི་དམངས་བྱང་ཚད་དུས་རབས་ཀྱི་རྗེས་སུ་ལུས་ཅིང་།   དཔལ་འབྱོར་དང་སྤྱི་ཚོགས་ཁྱོན་ཡོངས་ཀྱི་སྟོབས་ཤུགས་ཀྱང་རྒྱལ་ཁབ་དང་།     མི་རིགས་ཁྲོད་དུ་དམའ་རིམ་ལ་ལུས་སྲིད་པ་ནི་མ་ བཤད་ཀྱང་ཚང་མས་ཤེས་ཀྱི་རེད །  འོན་ཀྱང་ཡིག་རྨོངས་སེལ་བའི་ལས་དོན་སྤེལ་ནས་སྤྱི་དམངས་ཕལ་མོ་ཆེ།   ཡི་གེ་ཤེས་ཀྱང་སྤྱི་ཚོགས་ཀྱི་ངོས་གང་དང་།  ཟུར་ཅི་ལའང་དཔེ་དེབ་ཀློག་པའི་ཚ་རླབས་ཤིག་འཕྱུར་གྱི་མི་འདུག་པས།  ངོ་མ་ང་ཚོ་ནི་དཔེ་ཆ་ལ་མི་དགའ་བའི་མི་རིགས་ཤིག་རེད་ཨང་སྙམ།    གང་ལྟར་རྒྱལ་ཁབ་ཀྱི་ཡིག་རྨོངས་སེལ་བའི་དམིགས་ཡུལ་དང་།   མི་ཚང་མས་ཡི་གེ་ཤེས་པའི་དགོས་པ་ནི་དཔེ་ཐོག་གི་ཤེས་བྱ་མང་པོར་ལྟ་ཀློག་དང་།    སློབ་སྦྱོང་བྱས་ནས་རང་གི་བསམ་བློའི་གོ་རྟོགས་གོང་མཐོར་གཏོང་རྒྱུའི་ཆེད་དུ་ཡིན་པས།  དཔེ་དེབ་མ་ཀློག་ན་སྔར་བཞིན་ཡིག་རྨོངས་པ་ཡིན་པ་ལས།   བྱང་ཚད་ལྡན་པའི་སྤྱི་དམངས་སམ་མི་རིགས་ཤིག་རྩ་བ་ནས་མ་ཡིན།   དེར་བརྟེན་རང་གི་མཐོང་ཐོས་ལ་བརྟེན་ནས་དཔེ་དེབ་ལྟ་ཀློག་ཐད་ཀྱི་སྐད་ཆ་ཁ་ཤས་ཟིན་བྲིས་སུ་ཕབ་པར་འདོད།
            དང་པོ།     སྤྱི་ཚོགས་ཐོག་གི་མཐོང་ཐོས།
   ལས་ཁུངས་ཀྱི་འཆར་གཞི་དང་།    ལས་ཀའི་ཕྱོགས་བསྡོམས།  སློབ་སྦྱོང་སྣ་ཚོགས་བྱས་པའི་མྱོང་ཚོར་རམ་ཉམས་མྱོང་།  གོང་རིམ་ཡིག་ཆའི་དགོངས་དོན་བརྒྱུད་བསྒྲགས་བྱས་པའི་ཟིན་ཐོ་སོགས།  ཚང་མ་ཕར་བཤུ་ཚུར་བཤུ་དང་།  དྲ་ཐོག་ནས་ཕབ་ལེན་སོགས་མིག་མདུན་གྱི་ཁུངས་འཁྱོལ་ཐབས་ཁོ་ནའི།   བྱེད་སྟངས་དེས་ལས་བྱེད་པའི་དཔེ་དེབ་བལྟ་ཀློག་གི་བྱད་ཚད་ཧ་གོ་ཤིང་། དགེ་རྒན་གྱིས་ཁྲིད་ཟིན་ཐོག་དཔྱད་གཞི་བཤུ་འབྲི་དང་། དཔྱད་རྩོམ་ཕབ་ལེན་སོགས་ཕྲལ་མངོན་སླ་བཅོས་བྱ་བའི་བྱེད་སྟངས་དེས་དགེ་རྒན་གྱི་དཔེ་ཀློག་གནས་ཚུལ་ཤེས་ཐུབ།  ཞིང་འབྲོག་པས་རྒྱལ་ཁབ་ཀྱི་རྩ་ཁྲིམས་དང་།   ཡང་དག་ཀྱི་སྲིད་ཇུས་སོགས་མི་ཤེས་པར།   ཚང་མ་ལྐུགས་པ་ཨུ་ཚུགས་ཁོ་ནས་འཚོ་བ་བསྐྱལ་སྟངས་འདིས་ཁོ་ཚོའི་བལྟ་ཀློག་གི་གནས་ཚུལ་ཡང་བལྟས་པ་ཙམ་གྱི་ཧ་གོ་མཐོང་གསལ་རེད།
     མདོར་ན་ལས་བྱེད་པས་མྱོང་ཚོར་ཤོ་ལོ་གཅིག་གཉིས་འབྲི་མི་ཤེས་པ་དང་།  དགེ་རྒན་གྱིས་ཁྲིད་ཟིན་ཡག་པོ་ཞིག་རྒྱག་མི་ཤེས་པ།     ཞིང་འབྲོག་པས་རྒྱལ་ཁབ་ཀྱི་སྲིད་ཇུས་བཟང་པོ་ཡང་མི་ཤེས་པ་སོགས་ཚང་མ།   བལྟ་ཀློག་མ་བྱས་པའི་འཇུག་འབྲས་རེད་ཅེས་བཤད་ན་མ་འགྲིག་པ་མེད།  བལྟ་ཀློག་གིས་རྩོམ་ཡིག་འབྲི་བའི་བྱང་ཚད་དང་།  སྐད་ཆ་ཤོད་པའི་ནུས་པ། ཤེས་བྱ་སྣ་ཚོགས་བློ་ངོར་འཆར་ཐུབ་པའི་ནུས་པ་མང་པོ་མཁོ་སྤྲོད་ཐུབ་པ་ནི།  གནའ་དེང་གི་དཔེ་དེབ་མང་པོའི་ནང་གསལ་པོ་གསུངས་འདུག་པ་མ་ཟད།  ང་རང་ཉིད་ཀྱི་དཔེ་ཀློག་གནས་ཚུལ་ལས་ཀྱང་ར་སྤྲོད་གསལ་པོ་བྱུང་།     གོང་གསལ་གནས་ཚུལ་དེ་དག་ལ་རྒྱུ་རྐྱེན་མང་པོ་གླེང་རྒྱུ་ཡོད་མོད་ངས་བྱས་ན་གཙོ་བོ་ནི་དཔེ་ དེབ་ལྟ་ཀློག་མ་བྱས་པའི་རྐྱེན་གྱིས་ཡིན་པར་འདོད།
         གཉིས་པ།  དཔེ་ཁང་ནང་གི་མཐོང་ཐོས།
     ང་རང་རྒྱུན་དུ་དཔེ་ཁང་ནང་འགྲོ་རྒྱུ་དེ་གོམས་གཤིས་སུ་གྱུར་ཟིན་པ་དང་།  དཔེ་ཆ་གསར་པ་རེ་མཐོང་ན། ལེགས་པས་རང་ལ་ཟད་མཐའ་མེད་པའི་སེམས་ཀྱི་རྒྱགས་ཕྱེ་རེ་སྦྱིན་ཐུབ་པ་དང་།  འབྲིང་གིས་རང་ལ་རྩོམ་ཡིག་འབྲི་བའི་སྐུལ་མ་དང་ཐབས་ཤེས་རེ་བསྟན་ཐུབ་ཅིང་།  མ་མཐར་ཡང་རྩོམ་པ་པོའི་རྔུལ་ཁྲག་ཆུད་ ཟོས་སུ་མ་བཏང་བར།  མགོ་མཇུག་ཚང་བའི་བལྟ་ཀློག་རེ་བྱེད་ཆེད་རིན་གོང་སྒོར་རྡོག་བཅུ་གྲངས་ལ་མི་འཛེམས་པར།    ཉོ་རྒྱུ་དེ་ངའི་ཡི་གེ་ཤེས་པའི་དོར་མེད་ཀྱི་འགན་འཁྲི་ཞིག་ལ་བརྩི་བཞིན་ཡོད།
     དཔེ་ཁང་ནང་ཕེབས་མཁན་ཕལ་ཆེ་བ་ནི།    ཕྲུ་གུའི་ཡིག་རྒྱུགས་ལ་དམིགས་པའི་བསྐྱར་སྦྱོང་སྣ་ཚོགས་གཟིགས་མཁན་ཡིན་པ་དང་།  དེ་དག་ལའང་རིན་གོང་མཐོ་བའི་དབུགས་རིང་འདོན་མཁན་ཉུང་ཉུང་མ་རེད།
  དེ་ནས་གྲྭ་པ་དང་ཨ་ནི་ལགས་ཡིན་ཅིང་།   ཁོང་རྣམས་པས་དཔེ་ཆ་ཉོ་སྐབས་རང་རང་གི་སྒྲུབ་མཐའ་དང་། བླ་མའི་བཀའ་སློབ་བཞིན་ཆོས་ཕྱོགས་ཀྱི་དཔེ་རྩ་ཆེན་ཁ་ཤས་
གཟིགས་པ་ལས།  བསམ་བློ་གསར་པའི་དཔེ་ཚོགས་དང་།   གནད་ལུགས་ཀྱི་ཕྱུག་པའི་འཇིག་རྟེན་པའི་གནད་དོན་གླེང་བའི་དཔེ་ཆ་ག་ལ་ཉོ། དེ་ནས་ཡང་མི་རེ་ཟུང་ཡོད་པ་དེ་དག་ཕལ་ཆེར་སློབ་གྲྭའི་དགེ་རྒན་དང་།དཔེ་དེབ་ལ་ཅུང་ཟད་བལྟ་མཁན་དེའདྲ་ཡིན་པར་རློམ་ཀྱང་།  མིང་གྲགས་ཅན་གྱི་མཁས་པ་དང་།  གོ་མྱོང་ཡོད་པའི་རྩོམ་པོ་རེ་ཟུང་གི་དཔེ་དེབ་ཁོ་ནར་བལྟ་བ་ལས། གཞན་རྣམས་ལ་དོ་སྣང་དེ་ཙམ་མི་བྱེད། དེ་བས་དཔེ་དེབ་གཟིགས་རྒྱུ་དེ་ཕལ་ཆེར་གོང་ཚད་མཐོ་དྲག་འདུག་སྙམ་པའི་བསམ་རྒྱ་ལས་མི་ཐར་བར། རིན་གོང་བྲིས་པའི་བརྒྱབ་ཤོག་ལ་བལྟ་གིན་དུ་དཔེ་ཁང་ལས་ཐོན་འགྲོ་གི་འདུག
    ད་དུང་མི་རེ་ཟུང་ཡོད་པ་ནི་རྩོམ་པ་པོ་ཡིན་སྲིད་ཅིང་ཁོ་ཚོའི་ངོ་གདོང་ལས།  རང་ཉིད་ཀྱིས་ལོ་མང་བསམ་གཞིགས་དང་སྨྱུག་རྩེ་འགུལ་ནས་བྲིས་པའི་སྐད་ཆའི་ མར་ཁུ་རེ་རེ།  ཀློག་པ་པོའི་མིག་ཟུང་ལས་སྣང་མེད་དུ་དོར་བ་མཐོང་དུས། ཡིད་ཆད་ཀྱི་དབུགས་རིང་ནར་ནར་དུ་འཐེན་བཞིན་དཔེ་ཁང་ལས།  རང་ཁྱིམ་གྱི་ཕྱོགས་སུ་དལ་བུས་ལོག་འགྲོ་གིན་འདུག      གསན་དང་ཀློག་པོ་ལགས།   ཤོ་སྦག་རྒྱན་འགྱེད་ཀྱི་རྭ་བ་ན།  ཐོབ་ཤོར་སྟོང་ཕྲག་ལ་མགོ་མི་སྒུར་བའི་དཔའ་བོ་ཚོ།  ཆང་རག་ཆགས་སྤྱོད་ཀྱི་གཡུལ་ས་ན་སྟོང་ཕོད་ཁོག་ཡངས་ཀྱི་རླབས་ཆེན་ཚོས།  དཔེ་ཁང་ནང་སྐད་ཆའི་ལང་འཚོ་འཚར་བའི་བང་མཛོད་རེ་རེ་ལ།  སྒོར་ཉི་ཤུ་སུམ་ཅུའི་རིན་ཡང་སྤྲོད་ནུས་ཀྱི་མི་གོང་གསལ་གནས་ཚུལ་དེ་དག་ལ་གཞིགས་ན། ང་ཚོའི་དཔེ་ཀློག་གི་གནས་ ཚུལ་ངོ་མ་ནི།  ཡིག་རྒྱུགས་ལ་དམིགས་པའི་སློབ་མ་དང་།  དགེ་རྒན་རེ་ཟུང་།ཆོས་ལུགས་ལ་སྦྱོང་བའི་གྲྭ་བཙུན་ཁ་ཤས་ལས།  དོན་དངོས་སུ་མེས་རྒྱལ་དང་མི་རིགས་ཀྱི་དོན་དུ་དང་།    ལས་ཁུངས་དང་ལས་དོན་གྱི་ཆེད་དུ་དཔེ་དེབ་ལ་བལྟ་མཁན་མེད་ལ།  ཚོང་པ་དང་ཁེ་ལས་པ།     ཞིང་པ་དང་འབྲོག་པ་ཚོས་ཞིང་ལས་ཀྱི་བསྐོར་དང་།  ཕྲུགས་གསོ་ཚགས་ཀྱི་བསྐོར།  ཚོང་རྒྱག་སྟངས་དང་ཁེ་ལས་གཉེར་སྟངས་སོགས་འཐུས་སྒོ་ཚང་
བའི།  དཔེ་ཐོག་གི་ཤེས་བྱ་དེ་དག་ཀློག་གི་མེད་པ་དེ་བས་ཀྱང་ཧ་གོ་བ་མིན་ནམ།   མ་ཟད་རྒྱལ་ཁབ་ཀྱི་ཡང་དག་པའི་རྩ་ཁྲིམས་དེ་དག་ཀྱང་བལྟ་གི་མེད་པ་རེད།    དེ་ལྟར་ང་ཚོ་བོད་རིགས་ཀྱི་བསམ་བློའི་གོ་རྟོགས་རྗེས་ལུས་ཡིན་པའི་གྲུབ་བྱེད་མང་པོ་ཤོད་དགོས་དོན་མེད།     གཙོ་བོ་དཔེ་དེབ་མ་ཀློག་པས་གནད་ལུགས་མང་པོ་ཞིག་རྩོམ་པ་པོས་
ཡིག་ཐོག་ནས་གསལ་བཤད་དང་། ངོ་སྤྲོད་གསལ་པོ་བྱས་ཡོད་རུང་དཔེ་དེབ་མ་ཀློག་པའི་མི་རིགས་ཤིག་ལ།   གནད་ལུགས་ཀྱི་བམ་པོ་རི་ ལྟར་རྩིག་ཀྱང་དགོས་པ་གང་ཡང་མེད་དོ།
          གསུམ་པ།    རྩོམ་ཡིག་ནི་གནད་ལུགས་ཀྱི་བང་མཛོད་རེད།
     རྩོམ་པ་པོ་ནི་དུས་རབས་ཀྱི་མགྲིན་ཚབ་པ་ཡིན་ཞེས་པ་ལྟར། འཚོ་བའི་ནང་གི་ལེགས་ཉེས་དང་།   དུས་རབས་ཀྱི་འགྲོ་ཕྱོགས།   སྤྱི་ཚོགས་ཀྱི་འཕོ་འགྱུར།རྒྱལ་ཕྱི་རྒྱལ་ནང་གི་འཕེལ་རིམ།   མེས་རྒྱལ་གྱི་གནས་བབ།མི་རིགས་ཀྱི་ལས་དབང་སོགས་ཚང་མ་ཡིག་ཐོག་ནས་གླེང་གི་ཡོད་པས།  རྩོམ་ཡིག་ནི་ངོ་མ་འཚོ་བའི་མཚོན་ཚུལ་ཅི་ལ་མིན།    དཔེ་དེབ་མང་པོ་ཞིག་གིས་གནད་ལུགས་རྒྱུ་མཚན་མང་པོ་གསལ་བཤད་བྱས་ནས། ཀློག་པ་པོའི་གོ་རྟོགས་མཐོ་རུ་འགྲོ་ཐབས་བྱས་ཡོད་པ་དང་། དཔེ་དེབ་མང་པོ་ཞིག་གིས་སྤྱི་ཚོགས་ཀྱི་སྐྱོན་ཡོན་ལ་དབྱེ་ཞིབ་དང་།  ཐབས་ཤེས་བཟང་པོ་རེ་རེ་ངོ་སྤྲོད་བྱས་ནས།    འཕྱིས་འབྱུང་གི་མདུན་ལམ་ཡག་པོ་ཞིག་བསྟན་ནས་ཡོད།མདོར་ན་དཔེ་དེབ་ནི་རྩོམ་ཡིག་ལས་གྲུབ་པ་དང་།  རྩོམ་ཡིག་ནི་གནད་ལུགས་ཀྱི་བང་མཛོད་དང་འདྲ།  ང་ཚོ་དཔེ་དེབ་ལ་མི་དགའ་བ་དེས།   ང་ཚོ་ལ་གནད་ ལུགས་ཀྱི་གཞུང་ལུགས་མེད་པ་དང་།  གནད་ལུགས་ཀྱི་གོ་ཆ་མེད་པས་རྒྱུ་མཚན་དང་།   ལས་དོན་གང་ཞིག་སྤྱི་ཚོགས་ཀྱི་འགྲོ་ལུགས་ལྟར།  ལེགས་གྲུབ་ལྡན་ཞིག་སྒྲུབ་མི་ཐུབ།   དེ་ལྟར་སྒྲུབ་མ་ཐུབ་པས་
ང་ཚོ་སྔར་བཞིན་རྗེས་སུ་ལུས།
            བཞི་པ།  དཔེ་དེབ་ཀློག་རྒྱུ་ནི་དུས་རབས་ཀྱིས་ང་ཚོར་སྤྲད་པའི་ལས་འགན་ཡིན།
  དཔེ་དེབ་མ་ཀློག་པའི་གྱོང་གུན་མང་པོ་ཞིག་གོང་དུ་བཤད་ཟིན་ཀྱང་།   ང་ཚོས་ཇི་ལྟར་བྱས་ཏེ་དཔེ་དེབ་ཀློག་དགོས་མིན་དེ། ད་དུང་ཡང་གསལ་པོ་ཞིག་ཆགས་ ཐུབ་མེད།  དེས་ན་ང་ཚོས་མི་རིགས་གཞན་གྱི་དཔེ་དེབ་ཀློག་པའི་གནས་ཚུལ་ཁ་ ཤས་དཔེ་རུ་དྲངས་པ་ཡིན་ན།  ང་ཚོ་དང་འདྲེས་འདྲིས་ཆེ་ཆོས་ནི་རྒྱ་མི་རིགས་ཡིན་པ་དང་།   ཁོ་ཚོའི་དཔེ་ཀློག་གི་གོམས་གཤིས་ནི་ངོ་མ་ཡག་པོ་ཞིག་ཡོད་པ་སྟེ།   ལྷམ་འཚེམ་རྒྱུ་མེད་པའི་བར་གསེང་དང་།    རླངས་འཁོར་ཁ་བཀག་པའི་དུས་ཚོད་ཕྲན་བུ།  ཚལ་ཉོ་མི་མེད་པའི་བར་གསེང་ཅུང་ཟད་སོགས་ལའང་ཚགས་པར་དང་།  དཔེ་དེབ་བལྟ་ཀློག་བྱེད་ཀྱི་འདུག    དེ་ལྟར་བྱས་པའི་རྐྱེན་གྱིས་ཁོ་ཚོའི་གོ་རྟོགས་མཐོ་བ་དང་།  ལས་ཁུངས་ནང་གི་དབུ་ཁྲིད་དང་།    ལས་རིགས་ཁག་གི་གཙོ་ཤུགས།   འཛུགས་སྐྲུན་ཚོགས་པའི་ཚོགས་གཙོ་དང་།  ཚོང་ལས་ཐོག་གི་ ལེགས་གྲུབ་པ་མང་པོ་ཞིག་བྱུང་བ་རེད།  མ་ཟད་ཞིང་པ་ཚོས་ཀྱང་རྒྱལ་ཁབ་ཀྱི་རྩ་ཁྲིམས་དང་མཐུན་པར། ཁེ་འབབ་ཡོད་པའི་ལས་པ་མང་པོ་ཞིག་བྱེད་ཤེས་ཀྱི་འདུག   དེ་དག་ནི་ཁོ་ཚོས་དཔེ་དེབ་ཀློག་པས་ཤེས་ཡོན་གྱིས་འཇོན་ཐང་བསྐྱེད་བསྲིང་ཐུབ་པ་ལས།  དམིགས་བསལ་དབང་ཆ་སྤྲད་ནས་གང་བྱུང་བྱས་པ་ཞིག་མིན་པས།  ང་ཚོས་མ་འཇོན་ན་ཁ་རོག་སྡུག་རྒྱུ་ལས་ཅི་ཡང་ཤོད་ས་མེད།
     དེར་བརྟེན་ང་ཚོས་ད་ནས་བཟུང་།  ཞིང་པ་དང་འབྲོག་པ།  ལས་བྱེད་དང་ཚོང་པ་སོགས་དབྱེ་བ་མེད་པར།   ཡེ་གེ་ཤེས་མཁན་ཚང་མས་དུས་ཚོད་ཀྱི་ཁོམ་པ་མང་པོ་སྟོང་ཟད་མ་བཏང་བ་དང་།  དཔེ་དེབ་གྱི་རིན་འབབ་ཅུང་ཟད་ལ་མ་ གཡོལ་བར།  དཔེ་དེབ་ཉོས་ནས་བལྟ་ཀློག་བྱ་རྒྱུ་ནི།  རྒྱལ་ཁབ་ཀྱི་ཡིག་རྨོངས་ སེལ་བ་ཆུད་ཟོས་སུ་མི་འགྲོ་བ་དང་།  མི་རིགས་ཀྱི་འཕེལ་རྒྱས་དང་མདུན་ལམ་དེ་ དུས་རབས་ཀྱི་རྗེས་སུ་མ་ལུས་པར།   མི་རིགས་གཞན་ལྟར་རང་སྐྱ་འཕེར་བ་ཞིག་ཡོང་ཆེད།   དཔེ་དེབ་ཀློག་རྒྱུ་ནི་དོར་ཐབས་མེད་པའི་བླ་མེད་ཀྱི་འགན་འཁྲི་ཞིག་ ཡིན་པ་ཤེས་དགོས་སོ།
 

རྩོམ་ཁུངས། ངེད་དྲ་བ།