གླེང་གཞི།
         ང་ལ་ཉམས་མྱོང་ཙམ་ཐོབ་པས་ཆོག
 
 ཚང་མས་ཤེས་གསལ་ལྟར།ད་ལོར་ཡང་མཚོ་སྔོན་མི་དམངས་ཀུན་ཁྱབ་རླུང་འཕྲིན་ལས་ཁུངས་དང་བླ་བྲང་གངས་ཆབ་ཟེགས་མའི་འགྱུར་ཁུགས་གླིང་།རྨ་ཆུའི་སྦྲ་ནག་སྒྱུ་རྩལ་ཚང་བཅས་ཀྱིས་མཉམ་བསྒྲུབ་དགོས་བོད་ཁམས་ན་གོ་གནས་ངེས་ཅན་ཟིན་ཡོད་པས།མདོ་ཁམས་ཡུལ་གྱི་མུ་འབྲེལ་དཀྲོལ་ལེན་འགྲན་ཚོགས་ཆེན་མོ་སྟེ།གངས་ཆབ་ཟེགས་མ་རྟགས་མའི་སྐབས་བཞི་བའི་མདོ་ཁམས་དཀྲོལ་ལེན་འགྲན་ཚོགས་བསྡུས་པ་རེད།
 
 ནམ་རྒྱུན་འགྲན་ཚོགས་གང་དེ་གླེང་མགོ་བརྩམས་མ་ཐག་དཔལ་མགོན་དང་གངས་གཞུགས་སོགས་མ་ཎྀ་འདོན་འདོན་བྱེད་ཡོང་བའི་ཕྱོགས་དེ་ནས་ཀྱང་ང་ཚོའི་དཀྲོལ་ལེན་འགྲན་ཚོགས་འདི་ལ་ཅིག་འགྲིག་གི་མི་འདུག་པ་ལྟ་བུའི་ཚོར་སྣང་རེ་རང་དགར་བྱིན་ཡོང་ཡང་།དེ་ནི་ཏག་ཏག་ལ་ཚོར་སྣང་ཙམ་ལས་ཁ་འགྲིག་སོ་འགྲིག་གི་བདེན་ཁ་ཞིག་སུ་ལའང་ཡོད་ས་མ་རེད་པས།ད་ལོར་འགྲན་ཚོགས་བསྡུ་བའི་བརྡ་སྦྱོར་ཐོན་མ་ཐག་ཁོ་བོས་ཐད་ཀར་སྒོར་རྡོག་ཉིས་བརྒྱ་སྤྲད་དེ་མིང་རྟགས་བཀོད་པ་ཡིན་ལ།དེ་ཡང་དྲང་མོར་བཤད་ན།ཏག་ཏག་རང་ལ་ཉམས་མྱོང་ཙམ་ཐོབ་ཆོག་པས་རྟེན་འབྲེལ་ཆུང་ཆུང་ཞིག་གི་དབུ་བརྩམས་པའང་ཡིན།     
 
 ཐོག་མའི་བརྡ་སྦྱོར་ལ་བལྟས་ཡོད་མཁན་ཞིག་ཡིན་ཚེ་ཕལ་ཆེར་ཤེས་ངེས་ཀྱང་རེད་དེ།ད་ལོའི་འགྲན་ཚོགས་འདིར་སྔོན་ཆད་གྱི་འགྲན་ཚོགས་དག་དང་མི་འདྲ་ས་དང་མི་གཅིག་སའང་འགའ་ཞིག་ཡོད་འདུག་མོད།སྤྱི་ཕྱོགས་ནས་བལྟས་ན།འགྲན་བསྡུར་བྱེད་པའི་བརྒྱུད་རིམ་ལ་སྔར་བཞིན་འགྱུར་བ་གང་ཡང་བྱུང་མེད་པ་རེད།གང་ལྟར།ད་ལྟ་འགྲན་བསྡུར་ཡོངས་སུ་མཇུག་རྫོགས་ཟིན་ནའང་།ཁོ་བོས་རང་ཉིད་ཐེངས་འདིའི་འགྲན་ཞུགས་པ་ཞིག་ཡིན་པ་ནམ་ཡང་བརྗེད་འདོད་མི་འདུག་ལ།རང་ལ་ཉམས་མྱོང་ཙམ་ཐོབ་འདོད་ཀྱི་ཐོག་མའི་དམ་བཅས་ཀྱང་ཡང་ཡང་སྒུལ་བྱུང་བས།དེ་རིང་འདི་ནས་ཁོ་བོས་རང་གི་མྱོང་བ་དངོས་དག་ཤར་མར་བསྟར་རྩིས་ཡིན་ལ།དེ་འབྲེལ་གྱི་སྐད་ཆ་རློན་པ་དག་ཀྱང་ཐུར་དུ་དཔྱངས་རྩིས་ཡོད་པས།བལྟ་འདོད་དང་ཉན་འདོད་ཡོད་མཁན་དག་ཇི་འདོད་དུ་ཕེབས་ཆོག་པས་བྲང་གཞུང་ཡང་ཆེ་ནས་ཆེ་རུ་ཕྱེས་ཡོད།
 
 སྐད་ཆ་རྡོག་རྡོག་བྱས་ན།ང་ལ་སྔར་བཞིན་ཉམས་མྱོང་ཙམ་ཐོབ་པས་ཆོག་སྟེ།ཉམས་མྱོང་གི་འོད་སྣང་དང་བསླུ་བྲིད་བར་ནས་ང་རང་ནམ་ཡང་ཁེར་རྐྱང་གི་སེམས་ཁམས་རུམ་པར་དགའ།ང་རང་ནམ་ཡང་སྟོང་འདང་གི་མེ་ཏོག་འཐུ་བར་མོས།
                               
                                         ཁག་དང་པོ།    ས་ཁུལ་འགྲན་བསྡུར་དང་འུར་ཟིང་།
 
 
  དེ་ཡང་བརྡ་སྦྱོར་ལས་ཀྱང་ཁ་གསལ་གཏིང་གསལ་ཡིན་པ་བཞིན་ཐེངས་འདིའི་འགྲན་ཚོགས་ཀྱང་སྔོན་ཆད་ཀྱི་འགྲན་ཚོགས་དག་དང་འདྲ་བར།ཐོག་མའི་ས་ཁུལ་འགྲན་བསྡུར་དང་བསྐྱར་འགྲན།རྟིང་རྩོད་འགན་བསྡུར་བཅས་འགྲན་བསྡུར་ཐེངས་གསུམ་བྱེད་རྒྱུའི་འཆར་གཞིའི་ཐོག་ནས།མགོ་ལོག་ས་ཁུལ་གྱི་ཐོག་མའི་འགྲན་བསྡུར་དེ་ཟླ་བརྒྱད་པའི་ཚེས་ཉི་ཤུ་ཉིན་མགོ་ལོག་ཁུལ་དར་རྒྱས་སྨན་རྩིས་སློབ་གླིང་ནས་བསྡུས་པ་རེད།འགྲན་ཚོགས་དེར་འགྲན་ཞུགས་པ་ཉེར་དགུ་འདུག་ལ།དེའི་ནང་སྐྱེས་མ་འགྲན་ཞུགས་པའང་རེ་འགའ་ཡོད་པ་རེད།འགྲན་ཞུགས་པ་ཅུང་མང་པོ་ཡོད་པས་ཡིན་ཤེས་ཆེ་སྟེ།གཙོ་སྒྲུབ་ལས་ཁུངས་ཀྱིས་ཆེད་མངགས་བསལ་འདེམས་མི་སྣས་འཆར་བཀོད་ལྟར།ཐོག་མར་འགྲན་ཞུགས་པ་ཚོར་རང་རང་གི་འགྲན་ཞུགས་གླུ་ཡི་ཁ་བྱང་ཐོ་འགོད་དང་འགྲན་བསྡུར་གོ་རིམ་གྱི་ཤོག་རྒྱན་བླངས་དུ་བཅུག་རྗེས།རིམ་པ་གཉིས་སུ་བགོས་དེ་འགྲན་བསྡུར་དངོས་སུ་ཞུགས་པ་རེད།རིམ་པ་དང་པོའི་འགྲན་ཞུགས་པ་ཚོས་སྔ་དྲོའི་ཆུ་ཚོད་བཅུ་པ་ནས་ཉིན་གུང་ཆུ་ཚོད་བཅུ་གཉིས་དང་ཕྱེད་ཀའི་བར་དུ་འགྲན་བསྡུར་བྱས་ཤིང་།རིམ་པ་གཉིས་པའི་འགྲན་ཞུགས་པ་ཚོས་ཕྱི་དྲོའི་ཆུ་ཚོད་གཉིས་པ་ནས་བཞི་དང་ཕྱེད་ཀ་བར་དུ་འགྲན་བསྡུར་བྱས་རྗེས་གཞི་ནས་མགོ་ལོག་ས་ཁུལ་གྱི་བསལ་འདེམས་འགྲན་བསྡུར་ཡོངས་སུ་མཇུག་རྫོགས་ཏུ་བཅུག་པ་རེད་མོད་ཀྱང་།དྲང་མོར་བཤད་ན།བསལ་འདེམས་དེས་ནི་འགྲན་ཞུགས་པ་དང་ལྟད་མོ་བ་གང་གི་སེམས་སུའང་མི་བདེ་བའི་ཚོར་སྣང་རེ་ཐུལ་ཐུལ་དུ་ཕྱུར་དུ་བཅུག་སོང་བས་ནི།བསལ་འདེམས་དེ་ནི་དྲང་མོ་དྲང་བཞག་ཞིག་ཡོང་མེད་པ་ཐག་གིས་ཆོད་པ་ཞིག་རེད།
 བརྡ་སྦྱོར་དུ་སྒྲ་སྙན་འབྲུག་མགོ་མ་དཀྲོལ་མཁན་སུ་ཡིན་ཡང་དམིགས་བསལ་གྱི་སྐར་མ་ཐིག་ཚེག་ཐིག་ལྔ་དང་སྐྱེས་མ་དཀྲོལ་ལེན་མཁན་ལ་དམིགས་བསལ་གྱི་སྐར་མ་ཐིག་ཚེག་ཐིག་ལྔ།དེ་གཉིས་ཀ་ནུས་པའི་གླུ་མ་དག་ལ་དམིགས་བསལ་སྐར་གྲངས་ཐིག་ཚེག་གཅིག་བཅས་སྟེར་རྒྱུ་ཡིན་ཚུལ་བཤད་ཡོད་པ་ཕལ་ཆེར་ཚང་མའི་ཤེས་ཡོད་ངེས་མོད།དེ་ལས་གཞན་པའི་དམིགས་བསལ་ཞིག་ཡོད་པ་ནི་སུ་ལའང་གོ་ཐོས་ཙམ་ཡང་མི་འདུག་ལ།ལྷག་དོན།ཐེངས་འདིར་མགོ་ལོག་ས་ཁུལ་ནས་བསྡོམས་པའི་གླུ་བ་གླུ་མ་བཅུ་བདམ་ཐོན་བྱུང་བའི་ཁྲོད་གླུ་མ་ཁ་ཅིག་གི་མཇུག་མཐའི་སྐར་གྲངས་དེ་ད་སྔ་ཡན་ཆད་ཀྱི་འགྲན་ཚོགས་གང་དུའང་བྱུང་མ་མྱོང་བའི་སྣང་ཚུལ་ཞིག་ཏུ་གྱུར་བ་ནི་ཐེངས་འདིའི་འགྲན་ཞུགས་པ་དང་ལྟད་མོ་བ་ཚང་མའི་འདང་རྒྱག་ཆེས་ཆེ་ས་ཞིག་ཏུ་གྱུར་ཡོད།

  སྤྱིར་བཤད་ན།འཇིག་རྟེན་ན་ཚད་མའི་སྐྱེས་བུ་མེད་པ་བཞིན་ང་ཚོར་ལྷག་ཏུ་ཚད་མར་འཛིན་ཆོག་པའི་གླུ་བ་ཞིག་ཀྱང་ཡོད་མི་སྲིད་པས།གོང་གི་སྐྱེས་མ་དེ་དག་གི་སྐར་གྲངས་དེ་ཁོ་ཚོར་ཐོབ་ཆོག་ཆོག་ཅིག་ཡིན་ཀྱང་སྲིད་ཟེར་མཁན་ཡང་ཡོད་སྲིད་པ་རེད་མོད།མ་གསང་བར་བཤད་ན།ང་ཚོར་ངན་པ་རང་རྒྱུས་ཡོད་ཆེ་བས་ཡིན་པ་འདྲ་སྟེ།ཁོ་བོས་ཚམ་ཚོམ་མེད་པར་བཤད་སྤོབས་པ་ཞིག་ལ།མགོ་ལོག་ས་ཁུལ་གཅིག་པུ་མ་དགོས་སྤྱིར་ཐེངས་འདིའི་འགྲན་ཚོགས་དུའང་ཚད་ཐིག་དེ་འདྲར་སླེབས་པའི་གླུ་བ་ཞིག་མི་འདུག་ལ།ནམ་རྒྱུན་ང་ཚོའི་ཁ་ནང་སྣ་ནང་ནས་གླེང་རྒྱུ་རྒྱུན་ཆད་མ་མྱོང་བའི་གླུ་བ་ཆེན་པོ་སྒམ་པོ་དག་ཀྱང་ཚད་ཐིག་དེར་སླེབས་མི་འདུག་པ་ཁོ་ཐག་རེད།རྒྱུ་མཚན་ནི་ཐེངས་འདིའི་མགོ་ལོག་གི་གླུ་མ་དག་གི་མཇུག་མཐའི་སྐར་གྲངས་ནི་ང་ཚོའི་རྒྱུན་ལྡན་གྱི་སྐར་གྲངས་དགུ་ཚེག་ཅིག་ཅིག་ཉིག་ཉིག་ལས་བརྒལ་དེ་བཅུ་ཚེག་ཅིག་ཅིག་ཉིག་ཉིག་ཏུ་སླེབས་པས་རེད་ལ།ལྷག་དོན།འགྲན་བསྡུར་གང་དེ་མ་གཞི་ནས་རྩོད་ཉོག་ཅིག་གི་ངོས་ནས་མཇུག་རྫོགས་འགྲོ་རྒྱུ་ཡིན་པའི་སྔ་ལྟས་ཞིག་ཀྱང་གསའ་གསེང་གང་རུང་ནས་ལྷང་ལ་བུད་ཡོད་པས་སོ།
 
   སྐར་གྲངས་དེ་ནི་ཏག་ཏག་ལ་ཕྱི་ནང་གཉིས་ཀྱི་ཆ་རྐྱེན་ཧ་ཅང་འཛོམས་པོ་ཡིན་ས་དག་ལའང་ཐོབ་དཀའ་བ་ཞིག་ཡིན་ན།ང་ཚོ་ལྟ་བུའི་ངག་འཛེར་འཛེར་དང་ལག་འདར་འདར་ཙམ་ལས་གང་ཡང་འཁྱོངས་ཀི་མེད་མཁན་དག་ལ་ག་རེ་དབང་ཨང་།དེའི་ཕྱིར་ཁོ་བོས་ངོ་གདོང་འཛུམ་གྱིས་ཕྱུག་པའི་གོང་གི་སྐར་གྲངས་མཐོན་པོ་ཅན་ཚོ་རིག་ན།ཁོ་ཚོར་འདང་རྒྱག་ཅི་ཡང་མེད་པར་ཁ་རོག་གེར་རང་རང་ས་ན་ལུས་འདུག་པ་བསམ་ན།ད་དུང་དཔྱད་འདེམས་པ་དག་གིས་ཀྱང་རང་གིས་རང་ལ་འགྲིག་རྟགས་ཆེན་པོ་རེ་བརྒྱབ་ཏེ།གླུ་བ་གླུ་མ་གཞན་དག་སེམས་ནས་བོར་བའི་ཚུགས་ཀ་དེ་མཐོང་ན།ཤ་གསེང་རུས་གསེང་ནས་གཟེར་ལྷོག་ལྷོག་གིས་ཐོན་ཡོང་བ་ནི་དགའ་བ་ཞིག་ག་ལ་ཡིན་ཏེ་སེམས་ཀྱིས་མི་ཐེག་པའི་སྐྱོ་བ་ཆེན་པོ་ཞིག་ཏུ་གྱུར་སོང་།

  གྲོགས་པོ་རེ་འགར་མཚོན་ན།ས་ཁུལ་འགྲན་བསྡུར་དག་ལ་འདི་འདྲའི་རྙོག་དྲ་ཡོད་པ་ནི་རྒྱུན་ལྡན་ཞིག་ཏུ་འདོད་ཀི་འདུག་ལ།འགྲན་ཞུགས་པ་ཞིག་ལ་མཚོན་ན་རང་གི་ས་ཁུལ་ནས་རྒྱལ་བར་བྱེད་པ་ནི་ཆེས་ཆེ་བའི་གནད་འགག་ཅིག་ཏུ་བརྩི་བཞིན་འདུག་པ་གོ་དུས།གཙོ་སྒྲུབ་ལས་ཁུངས་ཀྱི་ཁུངས་མི་གཞན་པ་དག་གིས་ཀྱང་།ས་ཁུལ་གཞན་དག་གི་གླུ་བ་གླུ་མ་དག་ལ་འདི་འདྲའི་དྲང་བདེན་མིན་པའི་སྐར་མ་རེ་བརྒྱབ་སྟེ་དེ་འདྲའི་བློ་ངོར་ཤོང་དཀའ་བའི་ཚོར་བ་ཡ་མཚན་རེ་སྟེར་གྱིན་ཨེ་ཡོད་འདོད་ན།ཁོ་བོས་མདོ་འཛིན་པ་ཆ་མེད་དེའི་སྐད་ངག་ལ་ཡང་ཡང་ཉན་ཞོར།ཁུ་འབྲོང་གི་ངོ་གདོང་ལ་ཡང་ཡང་བལྟ་དགོས་བྱུང་ལ།རྨ་ཆུའི་འཇམ་པའི་སེམས་ནང་དུ་ཡང་ཡང་བསྙབས་དགོས་བྱུང་སོང་།
 
                                          
 
                                           ཁག་གཉིས་པ།    སྐྱར་འགྲན་དང་སྐྱོ་བ་ཐར་ཐོར།
 

  གཙོ་སྒྲུབ་ལས་ཁུངས་ཀྱི་མི་སྣ་དག་ཕྱོགས་སོ་སོའི་ས་ཁུལ་ཏུ་ཕེབས་རྗེས་བསྡོམས་པའི་དཀྲོལ་ལེན་པ་དྲུག་ཅུ་རེ་བཞི་ཐེངས་འདིའི་ཟི་ལིང་གི་བསྐྱར་འགྲན་དུ་ཞུགས་ཐུབ་པ་བྱུང་།ཐོག་མའི་གསལ་བརྡ་ལྟར་ན་ཐེངས་འདིའི་བསྐྱར་འགྲན་དེ་ཟི་ལིང་གྲོང་ཁྱེར་དངོས་ནས་བསྡུ་རྒྱུ་ཡིན་པ་འདྲ་ཡང་།གཙོ་སྒྲུབ་ལས་ཁུངས་ཀྱི་མི་སྣའི་འཆར་གཞི་ལ་འགྱུར་ལྡོག་ཐེབས་ཕྱིར་བསྐྱར་འགྲན་མ་བྱས་པའི་ཉིན་སྔོན་མར་བསྐྱར་འགན་དུ་ཞུགས་ཐུབ་མཁན་དག་ཆེད་དུ་ཁྱི་ཀའི་སྲིན་པོ་གླིང་ག་རུ་འགྲོ་དགོས་བའི་བརྡ་བསྟན།
 
ཏག་ཏག་ཁྱི་ཀ་རུ་འགྲོ་དགོས་བའི་ནངས་མོ་དེར།བསྐྱར་འགྲན་དུ་ཞུགས་ཐུབ་མཁན་དག་གཙོ་སྒྲུབ་ལས་ཁུངས་ཀྱི་བཀོད་འདོམས་ལྟར་མཚོ་སྔོན་བརྙན་འཕྲིན་ཁང་གི་སྒོ་གྲུང་དུ་འདུས།སྤྱིར་ན་འགྲན་ཞུགས་དཀྲོལ་ལེན་པ་རེ་བཞི་ལས་མེད་མོད་སྐབས་དེར་མི་མགོ་གྲངས་མེད་ཅིག་གིས་འདུ་རིབ་ལང་ལོང་བྱེད་ཀི་འདུག་པ་མཐོང་བས།ཁོ་བོ་ཆེད་དུ་མི་ཚོགས་དེའི་ཉེ་སར་བཅར་ཏེ་ཞིབ་ཏུ་བལྟས་བ་ན།དེ་དག་ནི་ང་ཚོའི་གླུ་བ་གླུ་མ་ཚོ་དང་འབྲལ་ཐབས་ཡེ་མེད་པའི་མི་སྣ་སྐོར་ཞིག་སྟེ།འགྲན་ཞུགས་གླུ་བ་གང་དེའི་ཕ་མ་དང་དགེ་རྒན།ཕུ་བོ།གྲོགས་པོ་དང་གྲོགས་མོ།ཡང་ན།བཟའ་ཚང་བཅས་ཐ་ན་རང་གི་གཉེན་བཞི་རྩ་ལག་གང་ཞིག་འཛོམས་མེད་པ་ཞིག་ནི་མི་འདུག་པར་འདྲ་བས།དེ་མ་ཐག་ཁོ་བོའི་ཡིད་ལའང་དོན་དག་གཞན་ཞིག་རང་དགར་དྲན་དུ་བཅུག་བྱུང་སྟེ།དེ་སྔོན་མགོ་ལོག་གི་ཡིན་ཚུལ་ལབ་པས་རྒད་པོ་ཞིག་གིས་ང་རང་མགོ་ལོག་གི་འགྲན་ཞུགས་པ་ཚོའི་གྲལ་དུ་སྡོད་དགོས་ཚུལ་དང་དེ་མིན་ཡར་མར་ལ་འགྲོ་གྲངས་མང་ན་བོར་བརླག་ཐེབས་འགྲོ་ཚུལ་སོགས་མང་དུ་ལབ་རྐྱེན་ཡང་མ་གཞི་རྒྱུ་རྐྱེན་འདི་ལ་ཐུག་པ་ལོས་ཡིན་སྙམ།
 
གང་ལྟར་འདི་ནི་བར་སྟོང་གི་སྐད་ཆ་ཙམ་ལས་མ་འདས་ནའང་།སེམས་གནད་དུ་ཕབ་ན།འདི་ལས་ང་ཚོའི་གླུ་བ་གླུ་མ་དག་གི་ཉམས་ཆུང་ཉག་ཕྲའི་ལས་དབང་གི་མཐོང་སྣེ་གཞན་ཞིག་ཀྱང་རྙེད་ཆོག་པ་འདྲ་ཨང་།
 
 
ཟླ་དགུ་བའི་ཚེས་ཉེར་གསུམ་ཉིན་མི་མགོ་རེ་བཞིའི་གྲུབ་པའི་བསྐྱར་འགྲན་གྱི་འགྲན་ཚོགས་དེ་ཁྱི་ཀ་སྲིན་པོའི་གླིང་ཀ་རུ་བསྡུས་པ་རེད་ལ།ཐོག་མའི་ས་ཁུལ་འགྲན་ཚོགས་དག་དང་བསྡུར་ཚེ་གར་སྟེགས་ཀྱི་རྣམ་པ་ཁོ་ནས་ཀྱང་འགྲན་ཞུགས་པ་ཚོར་ཁ་དོག་གཞན་ཞིག་བྱུགས་ཆོག་པ་འདྲ་ཡང་།ཏག་ཏག་ཆུ་ཚོད་གཉིས་རིང་ལ་རླངས་འཁོར་དུ་འདུར་རྒྱུགས་བྱེད་དགོས་བྱུང་བས་ཚང་མའི་ཚོར་བ་ཉབ་ཉོབ་ཏུ་བཏང་ཚར་འདུག་ལ།ལྷག་དོན་གླུ་བ་ལ་ལར་ཟས་ཟ་བའི་ཡི་གའང་ཆད་དུ་བཅུག་སོང་།
 
ཡིནའང་།གླུ་བ་ནི་སྔར་བཞིན་གླུ་བ་རང་རེད་པས།གཙོ་སྒྲུབ་པས་ཅི་གསུང་དང་ལེན་མི་བྱེད་ཐབས་མེད་རེད་ལ།གླུ་བ་ནི་སྔར་བཞིན་གླུ་བ་རང་ཡིན་པས།དུས་ཚོད་ལྟར་གླུ་མཆོད་ཤར་སེ་ཕུལ་དགོས་བའང་རྒྱུན་ལྡན་ཡིན་པས།འགྲན་ཞུགས་ར་བསྐོར་ནས་ང་ཚོར་མགྱོགས་ཟས་སྟབས་བདེ་རེ་སྟེར་རྗེས་དེ་མཐུད་འགྲན་བསྡྭར་དངོས་ལ་ཞུགས་ཤིང་ཅི་མགྱོགས་ངང་མཇུག་རྫོགས་ཏུ་བཅུག་མོད།སླར་ཡང་།རླངས་འཁོར་དུ་གཡོས་བརྫངས་བརྫངས་བྱས་ཏེ་ཤར་སེ་ཟི་ལིང་གྲོང་ཁྱེར་གྱི་སྲང་ལམ་དུ་རེ་རེ་བཞིན་སྟོར་སོང་བའི་ཚུགས་ཀ་དེ་བསམ་ན།སྐད་ཆ་ཞིག་ཅི་ནུས་ཀྱང་འདི་ལྟར་མི་ཤོད་ཐུ་མེད་རང་རེད་སོང་སྟེ།སྤྱི་ཕྱོགས་ནས་བལྟས་ན་འགྲན་ཚོགས་འདི་ནི་སྒེར་གཉེར་འགྲན་ཚོགས་ཤིག་ཏུ་གྲུབ་ཡོད་པས་ཆ་ནས།འགྲན་ཚོགས་འདིའི་ཐོག་མཐའ་བར་གསུམ་དུ་ནོར་འཁྲུལ་ལ་ཤས་རེ་ཡང་འབྱུང་མི་ཆོག་པ་ཞིག་རྩ་བ་ནས་མ་ཡིན་ཡང་།གླུ་བ་གླུ་མ་གང་གི་ངོས་ཐད་ནས་ལངས་སྟེ་བལྟས་ན།ཁོ་ཚོར་ཡང་མ་གཞི་ནས་ཐོབ་ཆོག་ཆོག་དང་ཡོད་ཆོག་ཆོག་གི་རྩིས་ཐང་རེ་ཡོད་པས་ན།དེ་ལ་སུས་ཀྱང་ཅི་འདོད་གང་འདོད་དང་།ཡང་ན་མ་ཤེས་མ་ཚོར་ས་ནས་གས་ཆག་དང་ནག་ནོག་ཏུ་བཏང་ཆོག་སའང་རྩ་བ་ནས་མ་རེད་འདོད།
  ཡང་གཅིག་བཤད་ན།འགྲན་ཞུགས་པ་ལ་ལར་མཚོན་ན།བསྐྱར་འགྲན་འདི་ཡང་གོ་སྐབས་གལ་ཆེན་ཞིག་ཏུ་རང་ཤུགས་ཀྱིས་གྲུབ་ཡོད་པ་ནི།ཐེངས་འདིར་བསྐྱར་འགྲན་ལའང་འོད་སྡེར་པར་སྐྲུན་བྱེད་ཀི་ཡོད་པ་ཙམ་པོ་ཡིན་ན་འགྲིག་ས་མ་རེད་དེ།ཕྱོགས་དེ་ནས་ང་ཚོས་སྔར་བཞིན་རང་རང་གི་ཁེ་གྲགས་དོན་གཉེར་གནང་ཀིན་ཡོད་པ་ཁྱབ་བསྒྲགས་གནང་བ་ཙམ་མ་གཏོགས་གང་ཡང་འཁྱོངས་མེད་ཀི་འདོད།སྤྱིར་བཤད་ན།ང་ཚོ་ཁེ་གྲགས་ལ་རྩ་བ་ནས་དགའ་མི་ཆོག་པའི་གནས་ལུགས་ཞིག་ཀྱང་མི་འདུག་པ་འདྲ་ཡང་།སྐབས་ལ་ལར་ང་ཚོ་རང་གི་ཁེ་གྲགས་ལ་ཇི་ལྟར་དགའ་བ་དང་ང་ཚོས་རང་གི་ཁེ་གྲགས་ཇི་ལྟར་གཉོར་སྐྱོང་གནང་དགོས་བ་རྨང་ནས་ཤེས་ཀི་མི་འདུག་པ་ལྟ་བུའི་སྣང་ཚུལ་རེ་ནི་འདུག་པས།ཁོ་བོ་ནི་ཁ་རོག་གེར་འདུག་མ་བཟོད་པ་ཙམ་ཡིན་ལ།ལྷག་དོན།ཐེངས་འདིེར་འགྲན་ཞུགས་པ་ཚོས་མི་སྒེར་ནས་འགྲོ་སྒོ་མང་ཙམ་བཏང་དགོས་བྱུང་བར་ཙམ་གྱི་ཐོག་ལ་མཛུག་གུ་བཙུག་སྟེ།སྔོན་ཆད་ཀྱི་འགྲན་ཞུགས་པ་དག་དང་ཁེ་དབང་གཤིབ་བསྡུར་གནང་འདོད་པ་ནི་མ་ཡིན་ཡང་།མ་གཞི་ཚང་མར་གླུ་བ་གླུ་མ་ཞེས་པའི་བརྡ་ཆད་རེ་སྦྱར་ཡོད་པ་གཞི་རྩ་བྱས་ཏེ་ཚང་མ་འགྲན་ཞུགས་པ་རེ་རེ་ཡིན་པ་ཆོས་ཉིད་དུ་བྱས་ན།ཁོ་བོས་ཀྱང་ཐེངས་འདིའི་འགྲན་ཞུགས་པ་ང་ཚོ་དང་སྔོན་ཆད་ཀྱི་འགྲན་ཞུགས་པ་ཁོ་ཚོ་ཚང་མའི་མ་མཐའི་ཁེ་དབང་ལ་ཡོ་འཁྱོག་མེད་པས་སྨོན་ལམ་སེམས་ནས་བཏབ་མྱོང་བ་ནི་སུ་ལའང་གསང་དོན་མི་འདུག་ཨང་།

                                        ཁག་གསུམ་པ།     རྟིང་རྩོད་དང་རྙོག་དྲ།
     ཏག་ཏག་ལ་བསྐྱར་འགྲན་མཇུག་རྫོགས་དེ་ཉིན་བཞི་འགོར་བའི་ཉིན་མོ་སྟེ།ཟླ་དགུ་བའི་ཚེས་ཉེར་བདུན་ཉིན་གྱི་དགོང་མོར་ཐེངས་འདིའི་ཆེས་མཐའ་མཇུག་གི་འགྲན་བསྡུར་ཏེ་རྟིང་རྩོད་འགྲན་བསྡུར་ལ་དངོས་སུ་ཞུགས་པ་རེད།
  སྤྱིར་ན་གར་སྟེགས་ཇུས་འགོད་དང་འགྲན་བསྡུར་རྣམ་པ་སོགས་ཕྱོགས་གང་གི་ཐད་ནས་བལྟས་ཀྱང་གོང་གི་བསྐྱར་འགྲན་ལྟ་བུའི་ཐབས་ཆག་ནང་གི་སྡུག་ཐུག་གི་ཆ་དེ་མི་འདུག་ནའང་།ཆུ་ཚོད་བཞི་ལྷག་རིང་གི་འགྲན་བསྡུར་དེ་མཇུག་རྫོགས་རྗེས་སུ།སྔར་བཞིན་ན་བུན་ལྟ་བུའི་སྐྱོ་བ་ཞིག་སོ་སོའི་སེམས་སུ་ཟུག་ཅིང་དྭངས་ཐབས་མེད་པར་གྱུར་བ་ནི།སྤྱིར་ན་སྐབས་དེའི་མི་རྣམས་ལ་དབང་ཆོག་ཆོག་གི་སེམས་ཚོར་ཙམ་ཡིན་ཆོག་ནའང་།ཞིབ་ཏུ་བསམ་ཞིང་བསམ་ན།དེ་ནི་གསང་ཐབས་མ་ཡོད་པས་ནད་ཡམས་ཚབས་ཆེན་ཞིག་རེད།
  ནད་ཡམས་དེའི་ནམ་ཡང་མི་རྣམས་སྡུག་ལ་སྦྱོར་བར་བྱེད་ཅིང་ལྷག་དོན་མི་རྣམས་ལ་ཡིད་ཆེས་མེད་པར་བཟོ་ཡི་ཡོད།དེ་རྒྱུ་མཚན་ག་རེའི་སྟེང་ནས་མཐོང་གི་ཡོད་ཟེར་ན།གཙོ་བོ་རང་ཉིད་དངོས་སུ་ཞུགས་པའི་ཐེངས་འདིའི་འགྲན་ཚོགས་འདི་བརྒྱུད་དེ་གླེང་གི་ཡོད།དེ་ཇི་ལྟར་གླེང་དགོས་བྱུང་སོང་ཟེར་ན།ཐོག་མར་ང་ཚོས་མཉམ་དུ་འགྲན་ཚོགས་འདིའི་བརྡ་ཐོའི་ངོས་སུ་ཞིབ་ལྟ་ཐེངས་ཤིག་མི་བྱེད་ཐུ་མེད་རེད།དེ་ན་བརྡ་ཐོའི་ངོས་སུ་ག་རེ་བྲིས་འདུག་ཟེར་ན།མ་གཞི་དེ་རུ་མང་པོ་མང་པོ་ཞིག་བྲིས་འདུག་ཡང་།དེ་ཡི་ངོས་སུ་གླུ་ཚིག་ལ་ཡར་སྐུལ་གྱི་ཆ་ལྡན་དགོས་ཞེས་བྲིས་འདུག་པ་དེས་ཐེངས་འདིའི་འགྲན་བསྡུར་གྱི་དགོངས་དོན་ཆེ་ཤོས་ཤིག་མཚོན་ཡོད་པ་རེད།དེ་བཞིན་མ་མཐའ་ཡང་གླུ་བ་གླུ་མ་གང་དེས་ཆ་རྐྱེན་འདིར་བརྩི་འཇོག་བྱེད་འོས་འོས་ཡིན་པ་འདྲ་ཡང་།འོན་ཀྱང་།ཐེངས་འདིར་འདེམས་ཐོན་བྱུང་བའི་བྱ་དགའ་ཨང་དང་པོའི་བདག་པོ་དེར་ཐ་ན་གླུ་ཚིག་གི་གཏན་ཁེལ་དགོངས་དོན་ལའང་འཚམ་པོ་ཡོང་ཐབས་མེད་པ་ནི་ག་རེ་ལན་ནམ།ཡང་ན་བརྡ་སྦྱོར་དུ་གླུ་ཚིག་ལ་ཡར་སྐུལ་གྱི་ཆ་ཡོད་དགོས་ཞེས་གཏན་ལ་ཕབ་ཡོད་ཅིང་དོན་དུ་ཡར་སྐུལ་གྱི་ཆ་ཙམ་ལྡན་པའི་གླུ་ཚིག་དག་ལ་སྐར་གྲངས་འཕྲི་རྐྱང་དང་སྐྱོན་ཆ་ཆེ་ཚུལ་བཤད་དགོས་དོན་ག་རེ་ཡིན་ནམ།ལྷག་དོན་བྱ་དགའ་ཨང་དང་པོའི་བདག་པོ་དེའི་གར་སྟེགས་སུ་རྣམ་འ་གྱུར་ག་འདྲ་སྟོན་གྱིན་ཡོད་པ་ནི་སུ་ལའང་གསང་ཐབས་ཡོད་པ་མ་ཡིན་པས།དེས་བོད་མི་རིགས་ཀྱི་གླུ་བའི་ཚབ་མཚོན་ཐུབ་རབས་ཟེར་ན།འཛམ་པོའི་གླིང་གི་གར་སྟེགས་སུ་ང་ཚོ་བོད་མི་རིགས་ནི་ཅི་འདྲ་ཞིག་ཏུ་མཐོང་སྲིད་དམ།
      བསམ་ཞིང་བསམ་ན་སེམས་པ་ནི་ལྷག་ཏུ་སྐྱོ་ཡོང་བས་སྐབས་རེར་ངག་ཁྲོལ་མིན་ལའང་དཀའ་ཁག་ཆེ་རུ་བྱིན་འདུག་མོད། ཁོ་བོས་ངག་ཁྲོལ་མིན་བྱས་དེ་བསྡད་ན་ང་ཚོ་གླུ་བ་གླུ་མ་དག་གི་མདུན་ལམ་ནི་སྔར་ལས་ཇེ་དོག་སུ་བྱིན་པར་དོགས་དྲགས་པས།སྐད་ཆ་བཤད་མཚམས་འདི་ནས་འཇོག་དགོས་ན་ནི་ཁྱོད་རང་འཐད་ཀྱང་ཁོ་བོ་ག་ལ་འཐད་དེ་མི་འཐད་པས།ད་ནི་མུ་མཐུད་དུ་ཤོད་པར་བྱ་སྟེ།སྤྱིར་ན་འགྲན་ཚོགས་གང་དེར་མཚོན་ནའང་ཞན་ཆ་ཡོད་ཆོག་པ་རེད་མོད།ཁ་ནས་བོད་མི་རིགས་དང་བོད་མི་རིགས་ཀྱི་གླུ་གར་རིག་གནས་དར་སྤེལ་དགོས་ཚུལ་མང་པོ་ཞིག་ལབ་ཀྱང་།དོན་དུ་དེ་ལས་ལྡོག་སྟེ་གླུ་གར་ནི་ཁ་གཡར་ས་ཞིག་དང་གླུ་བ་གླུ་མ་ནི་ལག་ཆ་ཙམ་དུ་བེད་སྤྱད་དེ།སྒེར་གྱི་ཚོང་དོན་འབའ་ཞིག་ལ་འབད་མཁན་དག་ལ་ཁོ་བོ་རྨང་ནས་སུན་པོ་བྱུང་སོང་།གལ་ཏེ་ཁྱོད་རང་ཁོ་བོའི་སྐད་ཆ་འདི་ལ་དོགས་པ་ཟ་ན།ཐེངས་འདིའི་འགྲན་ཚོགས་འདི་ལ་ཐེངས་གཅིག་བལྟ་བར་བརྩོན་དང་ཁྱོད་ཀྱིས་མིག་འདུན་ཀྱི་ཡོད་ཚད་ཧ་གོ་བར་ངེས།ཡིནའང་།འགྲན་ཚོགས་ཡོངས་ཀྱི་ཞན་ཆ་ནི་མ་གཞི་ནས་མངོན་ལྐོག་གཉིས་སུ་སྣང་བས།ཁྱོད་ཀྱིས་མཐོང་བ་ནི་མངོན་སུམ་ཡིན་པ་དེ་བཞིན་དུ་ཁོ་བོས་ཁྱོད་ལ་ལྐོག་གྱུར་གྱི་དོན་དག་ཅིག་ཀྱང་ཕྲལ་དུ་བྱོས་ན།ཏག་ཏག་འགྲན་ཚོགས་འདི་མཇུག་རྫོགས་པའི་ཉིན་མོར།ཁོ་བོར་དངོས་གནས་མིག་ཆུ་སེམས་ལ་ལྷུང་བའི་དོན་དག་ཅིག་དང་ཕྲད་པ་ནི།གཙོ་སྒྲུབ་མི་སྣས་ང་ཚོ་མི་རེར་སྒོར་རྡོག་བཅུ་རེ་སྟེར་བས་ཚུགས་ཀ་དེ་དང་།སྒོར་རྡོག་བཅུ་པོ་དེས་ང་ཚོར་ལམ་དངུལ་བྱོས་ཟེར་བ་ལྟ་བུའི་རྣམ་འགྱུར་དེ་རེད།
   ཁོ་བོར་མཚོན་ན་ཐེངས་འདིར་རྟིང་སྐུལ་བྱ་དགའ་ཞིག་ལས་ཐོབ་མེད་ས་ཞིག་ཡིན་པ་ནི་བདེན་པ་དངོས་ཀྱི་དོན་དག་ཅིག་ཡིན་པས།མང་མང་ཞིག་གིས།ཁོ་བོ་བྱ་དགའ་དེ་ཙམ་གྱིས་ཡིད་མ་ཚིམ་པར་སྐད་ཆ་གང་འདོད་དུ་ཤོད་ཀྱིན་འདུག་འདོད་པའམ།ཡང་ན།ཁོ་བོ་ལྟ་བུའི་གླུ་བའི་གྲལ་མཐའ་འཚང་མཁན་ཞིག་ལ་སྐད་ཆ་འདི་འདྲ་ཤོད་པའི་གོ་ཐོབ་གང་ཡང་མི་འདུག་འདོད་ན།དེ་ནི་ནོར་འཁྲུལ་ཞིག་མིན་པའི་ངེས་པ་ཡང་ཁྱོན་ནས་མ་ཡོད་དེ།ཁོ་བོར་མཚོན་ན།མང་མང་ཞིག་གིས་ཆུང་ཆུང་དུ་བལྟ་བའི་རྟིང་སྐུལ་ཞེས་པའི་ཡིག་འབྲུ་གཉིས་པོ་ཕྲག་སྟེང་དུ་ལྷུང་མ་ཐགཏག་ཏག་ཡིག་འབྲུ་དེ་གཉིས་ལྗིད་དྲགས་པའི་ཚོར་བ་ཞིག་གིས་ལུས་ཡོངས་སུ་ཁྱབ་སོང་།དེ་ན་དེ་ནི་ཅི་ཞིག་ཡིན་ནམ།འགྲེལ་བ་གནང་མཁན་སུ་ཞིག་ཡོད་དམ། འགྲེལ་བ་ག་རེ་རྒྱག་རྒྱུ་ཡིན་ནམ།དེ་བཞིན་བྱ་དགའ་གཞན་དག་གི་བདག་པོ་དག་ལའང་འདང་རྒྱག་དང་སེམས་ཁུར་དེ་ལས་ལྕི་བ་རེ་ཡོད་ན་འགྲིག་ཅིང་།དོན་དུ་ངག་སྒོ་གཏན་དོན་ག་རེ་ཡིན་ནམ།དོན་དམ་སྔོན་གྱི་འགྲན་ཚོགས་གང་དུའང་བསམ་ཚུལ་འདི་འདྲ་སྐྱེས་དེ་སྐད་ཆ་འདི་ལྟར་ཤོད་མཁན་བྱུང་མ་མྱོང་བའི་རྐྱེན་ཀྱིས་ཡིན་ས་རེད་དེ།བལྟ་ཕྱོགས་ཤིག་གིས་ཁྱོད་ཚོས་ཁོ་བོར་ཡིད་ཆེས་ཀི་མི་འདུག་པ་ལྟ་བུའི་མིག་མདའ་རེ་ཡང་འཕང་ཡོང་ཨང་།གང་ལྟར་གནད་དོན་འདི་དག་ནི་སྔ་མོ་ཞིག་ནས་ཁོ་བོས་འདང་རྒྱག་ཡུལ་དུ་གྱུར་ཚར་བས།ད་ལྟ་བྲེལ་བ་ལངས་དོན་གང་ཡང་མ་ཡོད་ལ།མདོར་ན།གླུ་བ་ཞིག་བྱེད་འདུན་གྱིས་ནམ་ཡང་གློད་ཀི་མེད་ནའང་།དོན་དམ་གང་ཞིག་བྱེད་དགོས་ཤེས་ཀི་མེད་པའི་ཉམ་ཆུང་ཉག་ཕྲ་དག་དང་།ཁ་ནས་གླུ་བ་སྐྱེད་བསྲིང་དང་དོན་དུ་གླུ་བ་ཉམས་རྒུད་གཏོང་མཁན་གྱི་སྒེར་དོན་པ་དག་གི་མིག་འདུན་ནས།ཁོ་བོ་ནམ་ཡང་བྱིས་པ་བསམ་མེད་ཅིག་ལྟར་སྟོང་འདང་གི་མེ་ཏོག་ཕྱོགས་བཞིར་གཏོར་བར་མོས་མཐུན་བྱུང་བ་ཙམ་མོ།
                                                   ༢༠༡༡ལོའི་ཟླ༡༡ཚེས་༢༡ཉིན་ལན་གྲུ་ནས།
                        གསལ་བཤད།  མ་གཞི་བྲིས་རྩོམ་འདི་ནི་སྐབས་ཐོག་ཏུ་སྤེལ་ན་འགྲིག་ཅིང་།གནས་ཚུལ་གང་མང་ཞིག་གི་དབང་གིས་ཅུང་དལ་འགོར་མི་བྱེད་ཐུ་མེད་དུ་གྱུར་སོང་།ལྷག་དོན།འདི་ནི་རང་གི་སེམས་ཚོར་དངོས་གཙོ་བོར་བརྗོད་པ་ཞིག་ཡིན་པས་བྲི་ན་འོས་པ་འགའ་རེར་ལོགས་སུ་མི་བཞག་ཐུ་མེད་བྱུང་ཡོད།གང་ལྟར་ད་ལྟ་བྲིས་རྩོམ་འདི་མཇུག་བསྡུ་བའི་དུས་ལ་སླེབས་པ་ཙམ་བྱུང་བས།བྲིས་རྩོམ་འདི་དང་འདིའི་ཕྱོགས་ཀྱི་ཞན་ཆ་ཅི་རིགས་ལ་དགོངས་དག་ཞུས་པ་དགེ་གྱུར་ཅིག
 


                     

རྩོམ་ཁུངས། ངེད་དྲ་བ།