ང་རང་དགེ་རྒན་ལ་དགའ། 
 ལྷག་ཏུ་བདེན་ལུགས་ལ་དགའ། —ཡ་ལེ་ཧྲི་དོ་དི།
     ཁོ་བོས་གླེང་བར་བྱ་བའི་སློབ་ཁྲིད་ཁྲོད་ཀྱི་རང་དབང་རྩོད་པ་ཡང་། སློབ་ཁྲིད་ཁྲོད་ཀྱི“ཁྲིད”ཀྱི་རང་དབང་རྩོད་པ་མིན་པར། “སློབ”ཀྱི་རང་དབང་རྩོད་པ་ཡིན། རྒྱུ་མཚན་ཡང་ང་ཚོའི་སློབ་ཁྲིད་ཀྱི་ཁྲོད་དུ“སློབ”ལ་རང་དབང་གི་གོ་སྐབས་མེད་པར། ཡོད་ཚད“ཁྲིད”ཀྱིས་བདག་འཛིན་བྱས་སོང་བས་ཡིན། 
   ཐོག་མར་ང་ཚོ་སློབ་ཁྲིད་ཅེས་པའི་ཐ་སྙད་འདི་འཕྲད་དུས། ནང་དོན་དུ་སློབ་དང་ཁྲིད་གཉི་ག་ཡོད་པ་རྟོགས་ངེས། “ཁྲིད”ལས“སློབ”སྔོན་དུ་བཞག་པར་བལྟས་ན། གཙོ་བོ་དང་བསྙེགས་སའང་སློབ་ཡིན་པ་ཚེགས་མེད་དུ་མཁྱེན། སློབ་ཁྲིད་ཚོགས་པའི་མཐར་ཐུག་གི་དམིགས་ཡུལ་དང་འབབ་ས་ཡང་སློབ་མས་བསླབ་བྱའི་ཡུལ་བསླབས་ཏེ་རྒྱུད་ལ་ཤེས་རབ་བསྐྱེད་རྒྱུ་དེ་ཡིན། སློབ་ཁྲིད་ཀྱི་གོ་རིམ་ཧྲིལ་བོའི་ཁྲོད་དུ“སློབ”ནི་ལྟེ་བ་དང་དམིགས་ས་ཡིན། ཡིན་ཡང་ང་ཚོའི་སློབ་ཁྲིད་ནི་དགེ་རྒན་གཅིག་པུར་དབང་བ་ལས་སློབ་མ་ལ་དབང་སྲོལ་མེད། དགེ་རྒན་ཁོ་ནས་ཁྲིད་སྟེགས་སུ་ཁ་ལྕེ་སྐམ་རག་བར་དུ་ཁྲིད་ཁྲིད་རྗེས་སློབ་ཁྲིད་གཞི་ནས་གྲོལ་སོང་། སློབ་མ་རྣམས་ཀྱིས་ཀྱང་མགོ་བོ་སྒུར་སྒུར་ངང་སློབ་ཁྲིད་ལ་ཉན་ཉན་རྗེས། རྡོག་ཁྲེས་ལྕི་མོ་ཞིག་ཕྲག་ནས་སར་བཞག་པ་ལྟར་ངལ་དུབ་དང་སུན་སྣང་གིས་ཁེངས་པའི་གདོང་ལ་ད་གཟོད་འཛུམ་གྱིས་ཕྱུག ང་ཚོའི་སློབ་ཁྲིད་ནི་སློབ་མ་རྣམས་ལ་མཚོན་ན་འགན་ཁུར་ལྕི་མོ་ཞིག་ལས་སྤྲོ་སྣང་གི་བྱ་བ་གཅིག་ཏུ་ཡེ་ནས་སེམས་ཀྱིན་མེད། འགན་ཁུར་ལྕི་མོ་ཞིག་ཏུ་སྣང་བས་སློབ་ཁྲིད་ཀྱིས་སློབ་མ་རྣམས་ལ་གནོན་ཤུགས་ཀྱིས་མནར་གཅོད་གཏོང་བ་ལས། སྤྲོ་སྣང་དང་ལྷོད་གཡེང་གི་མཁའ་དབུགས་ཤིག་བསྐྲུན་གྱིན་མེད་ཚོད་འདུག  དེ་བས་སློབ་མ་རྣམས་ཀྱི་ལྷན་སྐྱེས་སུ་ཡོད་པའི་བཟང་ཆའམ་ཤེས་རབ་ཀྱི་ཐོན་ཁུངས་དེ་ཆུད་ཟོས་དང་འཕྲོ་ལྷག་ཏུ་གཏོང་བཞིན་མཆིས། དེ་ཡང་སློབ་ཁྲིད་ཀྱི་སྐབས་སུ་སློབ་མ་རང་ཉིད་ལ་རང་རྒྱུད་ཀྱི་ནུས་པ་བསྔོགས་འདོན་དང་ཤེས་རབ་གང་དགར་བསྐྱེད་པའི་གོ་སྐབས་དེ་མེད་པས་ཡིན།  སློབ་མ་ཚོའི་མཚར་སྣང་དང་འཚོལ་ཞིབ།  གསར་རྙེད་ཀྱི་དབང་ཆ་འཕྲོག་སོང་བས་ཡིན། སློབ་ཁྲིད་སྐབས་ཀྱི་རང་དབང་གི་དུས་ཚོད་དང་ཁོར་ཡུག་ཀྱང་བཅོམས་སོང་། མདོར་ན་ཚེ་སྲོག་གི་རང་དབང་ཡང་ཤེས་མེད་ཚོར་མེད་ངང་རྡུལ་དུ་བརླག་པ་མ་ཡིན་ནམ། སློབ་ཁྲིད་བྱེད་སྟངས་འདི་འདྲ་ཞིག་གིས་སློབ་མ་འཇོན་ཐང་ཅན་མང་པོ་ཞིག་གི་འཕེལ་ཆོག་ཆོག་གི་བློ་གྲོས་དང་བསྐྱེད་ཆོག་ཆོག་གི་ཤེས་རབ་རྨེག་མེད་དུ་བཟོ་བཞིན་མཆིས། དེ་བས་སློབ་ཁྲིད་ནི་དགེ་སློབ་གཉི་ག་དབང་རྒྱུ་གལ་ཆེན་ནང་གི་འགངས་ཆེན་ཡིན། པེ་ཅིན་སློབ་ཆེན་གྱི་དགེ་རྒན་ཆེན་མོ་དང་ཆེད་མཁས་པ་གྲགས་ཅན་ཆན་ལུས་ཆོན་གྱིས་སློབ་ཁྲིད་ལ་ལྟ་ཚུལ་འདི་འདྲ་ཞིག་བཏོན་ཡོད་དེ། “སློབ་ཁྲིད་ཀྱི་སྐབས་སུ་དགེ་རྒན་དང་སློབ་མ་གཉིས་ཀྱི་བར་དུ་བསམ་པའི་བརྗེ་རེས་བྱེད་དགོས། འདི་ལྟར་བྱས་ཚེ་སློབ་ཁྲིད་གྲོལ་རྗེས་དགེ་སློབ་གཉི་གའི་བསམ་བློའི་རིམ་པ་གོང་དུ་བསྟད་ངེས” 
ང་ཚོའི་ཉམས་མྱོང་ལ་གཞིགས་ན་ཡང་དགེ་རྒན་གཅིག་པུས་ཁྲིད་སྟེགས་སྟེང་ནས་སློབ་ཁྲིད་ཀྱི་དུས་ཚོད་ཕུད་རྒྱག་བྱས་པ་ལས་དགེ་སློབ་ཐུན་མོང་གིས་གནད་དོན་གསར་རྙེད་དང་གནད་དོན་དབྱེ་ཞིབ། གནད་དོན་ཐག་གཅོད་བགྱིས་ན་ཕྱོགས་གཉིས་ཀྱི་རིག་པ་འཕེལ་བ་རྩོད་མེད་རེད་ལ། སྤྱི་ལོ་སྔོན་གྱི་གནའ་བོའི་ཀེ་རུ་སུའི་མཚན་ཉིད་པ་ཞིག་གིས། སློབ་ཁྲིད་བྱེད་སྐབས་རང་ལས་སློབ་མ་གཙོ་བོར་བཞག་ཏེ། སློབ་མས་གནད་དོན་འཚོལ་དཔྱོད་དང་དབྱེ་ཞིབ། ཐག་གཅོད་ཀྱི་དབང་ཆ་སྤྲོད་ཀྱིན་ཡོད་ལ། གལ་སྲིད་སློབ་མ་དཀའ་གནད་ལ་འཕྲད་ཚེ་ཐུན་མོང་གིས་སེལ་གྱིན་འདུག པགཞན་ཁོ་ཐང་ཆེན(广场)སོགས་སུ་སོང་ནས་མི་གཞན་ལ་སློབ་སྟོན་གནང་ཞོར་རང་ཉིད་ཀྱི་ཡོན་ཏན་གྱི་འཁོར་གཞིས་ཀྱང་རྒྱ་བསྐྱེད་ཀྱིན་ཡོད། ཁོ་བདེན་ལུགས་ཀྱི་ཆེད་དུ་རང་སྲོག་མཆོད་པའི་མཚན་ཉིད་པ་གྲགས་ཅན་སུའུ་ཀེ་ར་ཐེ་རེད། ང་ཚོའི་ཁོ་དང་ཁོ་ལྟ་བུ་མི་བོ་ཆེར་ཡི་རང་དང་སློབ་སྦྱོང་བྱ་འོས། གང་ལྟར་སློབ་ཁྲིད་ནི་དགེ་སློབ་ཐུན་མོང་ལ་དབང་བའི་བྱ་བ་ཞིག་ཡིན་པ་ཁ་མིན་དོན་ཐོག་ཏུ་གྲུབ་ཡོད་པས། སློབ་ཁྲིད་ཀྱི་གོ་རིམ་ཧྲིལ་བོ་རང་ཁོ་ནས་བདག་ཏུ་བཟུང་བའི་དགེ་རྒན་རྣམས་ཀྱིས་ཡིད་དུ་བཅགས་པར་བྱ།
  སློབ་ཁྲིད་ཀྱི་བྱ་བ་ལེགས་པོ་མ་འཁྱོངས་ན་སྤྱི་ཚོགས་འཕེལ་རྒྱས་འགྲོ་བྱེད་ཀྱི་སྒོ་སོ་སོ་ཡོངས་སུ་བརྒྱབ་པ་དང་མཚུངས་སྟེ། སློབ་ཁྲིད་ཀྱི་བྱ་བ་ནི་ཡོད་ཚད་མདུན་བསྐྱོད་དང་དར་རྒྱས་སུ་འགྲོ་བའི་རྩ་བའི་རྩ་བ་ཡིན། ཚད་ངེས་ཅན་ཞིག་གི་སྟེང་ནས་གླེང་ན་མི་རིགས་ཤིག་གི་ལས་དབང་དང་རྒྱལ་ཁབ་ཅིག་གི་དར་རྒུད་ཀྱང་སློབ་ཁྲིད་ཀྱི་བྱ་བས་ཐག་གཅོད་བྱེད་ཀྱིན་ཡོད་དོ། །
                                                                          2010．02．11ཉིན།
ཟུར་བཤད།
  གོང་ན་དགེ་རྒན་ལྡེ་མིག་ལགས་ཀྱིས་དེང་སང་དོན་ངོ་མའི་དགེ་རྒན་རྣམ་པས་སློབ་ཁྲིད་བྱེད་སྟངས་གསལ་བོར་བརྗོད་ཡོད་པ་རེད། རང་ཉིད་དང་རང་གི་ཁོར་ཡུག་ལ་ཞིབ་ལྟ་ཐེངས་ཤིག་བྱས་ཚེ། དོན་ངོ་མའི་རྒན་ལགས་ཀྱིས་གསུངས་པ་ལྟར་རེད། དེང་གི་ང་ཚོའི་བོད་ཁམས་ཕལ་ཆེར་གྱི་དགེ་རྒན་རྣམ་པས་སློབ་ཁྲིད་བྱེད་སྟངས་ནི་རྣམ་པ་རྙིང་བ་རྙིང་རྐྱང་དང་། ལད་ཟློས་རང་བཞིན་གྱི་ཤུགས་ཆེས་ཆེར་དྲགས་པ། གསར་གཏོད་དང་སློབ་མར་ཕན་འབྲས་ལྡན་པའི་སློབ་ཁྲིད་བྱེད་སྟངས་ཞིབ་འཇུག་དང་། རྣམ་པ་གསར་བ་བཙལ་བའི་ལས་སུ་མི་འཇུག་པར། ནམ་རྒྱུན་སློབ་དང་ཁྲིད་གཉིས་ལས“སློབ”ལ་རང་དབང་གི་གོ་སྐབས་མེད་པར། ཡོད་ཚད“ཁྲིད”ཀྱིས་བདག་འཛིན་བྱས་སོང་བས། བོད་ཀྱི་སློབ་བུ་རྣམས་ལ་གསར་གཏོད་དང་ཡར་རྒྱས་གོང་འཕེལ་འགྲོ་བའི་རྣམ་པ་གཏན་ནས་མངོན་མི་ཐུབ་པར། ནམ་རྒྱུན་རྗེས་ལུས་ཀྱི་མེ་ཏོག་འཐུ་ནས་གཞན་རྗེས་སུ་འབྲང་ཅི་ཐུབ་བྱེད་པ་ལས། སློབ་ཁྲིད་ཀྱི་ཁྲོད་ནས་མཚར་སྣང་དང་། དགའ་སྣང་བཙལ་བའི་སྐལ་བ་ཡག་པོ་ཞིག་དེ་འདྲ་མི་རྙེད་པའི་རྒྱུ་མཚན་ནི། དེང་གི་བོད་རིགས་དགེ་རྒན་རྣམ་པའི་སློབ་ཁྲིད་བྱེད་སྟངས་ཀྱི་རྣམ་པ་བཅོས་སྒྱུར་དང་། སློབ་ཁྲིད་བྱེད་སྟངས་ཞིབ་འཇུག་གཏིང་ཟབ་ཅིག་བྱེད་མ་ཤེས་པའི་ཉེས་སྐྱོན་གྱི་གྲུབ་འབྲས་ཤ་སྟག་རེད། དེ་མིན་དེང་སང་གི་སློབ་ཆེན་སློབ་གྲྭ་ནས་མཐར་ཕྱིན་པའི་ཤ་དར་ཁྲག་དར་གྱི་ན་གཞོན་ཕོ་མོ་དེ་དག་གིས་སློབ་གྲྭ་ནས་སྦྱངས་དགོས་པའི་ཤེས་བྱ་མ་སྦྱང་བར་རྨང་གཞི་ཤེས་བྱ་ཅི་ཡང་མེད་པའི་སྒོ་ནས་མཐར་ཕྱིན་འཛིན་ཡིག་ཤོག་སྟོང་ཞིག་མཆན་དུ་བཙིར་ནས་མི་རིགས་སློབ་གསོའི་ལས་རྐང་དུ་བུད་དེ།  མི་རབས་རྗེས་མའི་བདག་པོ་འདི་ཚོར་ཤ་ཚ་སྙིང་ཉེ་གཏན་ནས་མི་བྱེད་པར་རང་ཉིད་ལྟ་བུའི་ཕྱི་རྫིག་ནང་སྟོང་གི་ན་གཞོན་མགོ་བདེ་བག་གཡེང་ཏག་ཏག་སྐྱེད་བསྲིང་བྱེད་པ་ལས། རང་ཉིད་ཀྱི་སློབ་ཁྲིད་བྱེད་སྟངས་ལ་བཅོས་སྒྱུར་དང་རྣམ་པ་གསར་བའི་ཁྲིད་ཐབས་དག་ལ་སློབ་སྦྱོང་དང་ཞིབ་འཇུག་མི་བྱེད་པར། སློབ་མ་རྣམས་ཀྱི་ལྷན་སྐྱེས་སུ་ཡོད་པའི་བཟང་ཆའམ་ཤེས་རབ་ཀྱི་ཐོན་ཁུངས་དེ་ཆུད་ཟོས་དང་འཕྲོ་ལྷག་ཏུ་གཏོང་མཁན་གྱི་ཉེས་ཅན་གཏེ་བོ་འབའ་ཞིག་ཏུ་གྱུར་དང་འགྱུར་བཞིན་པ་ལས། སློབ་ཁྲིད་ཟེར་བའི་གོ་དོན་དེ་ཡེ་ནས་ཤེས་ཀྱི་མེད་པར་ནམ་རྒྱུན་འགྲོ་ཐབས་འདུག་ཐབས་ཀྱི་སློབ་ཁྲིད་མག་མོག་ཅིག་གིས་སློབ་མ་འཇོན་ཐང་ཅན་མང་པོ་ཞིག་གི་འཕེལ་ཆོག་ཆོག་གི་བློ་གྲོས་དང་བསྐྱེད་ཆོག་ཆོག་གི་ཤེས་རབ་རྨེག་མེད་དུ་བཟོ་བཞིན་མཆིས།  འདི་དག་ནི་སློབ་གསོ་ཆེད་མཁས་པ་དང་སློབ་གསོའི་སྡེ་ཁག་གི་འགན་ཁུར་མི་སྣ་དང་། སློབ་གྲྭའི་སློབ་གཙོ་སོགས་ཀྱི་དོ་སྣང་བྱེད་ཡུལ་དུ་གྱུར་མེད་པའི་ལྐོག་གྱུར་གྱི་གསང་བ་ཞིག་ཏུ་གྱུར་ཡོད་པའི་སྣང་ཚུལ་དངོས་རེད་དོ།། སློབ་གྲྭ་ཞིག་གི་འགན་ཁུར་གཙོ་བོ་ནི་སློབ་ཁྲིད་ཡིན་པས། དེང་སྐབས་གོང་འོག་བར་གསུམ་ཚང་མས་སློབ་གྲྭའི་བྱ་བ་གཙོ་བོ་ནི་གོང་རིམ་འགོ་ཁྲིད་ཀྱི་ཞིབ་བཤེར་བྱེད་དུ་ཡོང་བའི་བྱ་བ་གཙོ་བོ་དང་། ནང་གི་གཙང་སྦྲ་གཙོ་བོ།  ཕྱི་ཚུལ་བཅོས་མ་གཙོ་བོ། རྫུན་བཟོ་གཙོ་བོ། ནང་གི་སྒྲིག་ཆས་གཙོ་བོ་སོགས་ཡིན་པ་ལས།  སློབ་མའི་ཤེས་བྱའི་རྨང་གཞི་ག་འདྲ་ཡིན་མིན་དང་། སློབ་གྲྭའི་སློབ་ཁྲིད་ཀྱི་དོ་དམ་མ་ལག་ཅི་འདྲ་ཡིན་མིན། སློབ་གྲྭའི་འགོ་ཁྲིད་ཀྱི་དོ་དམ་མ་ལག་ཆ་ཚང་ཡིན་མིན། དགེ་རྒན་རྣམ་པའི་སློབ་ཁྲིད་ཞིབ་འཇུག་གི་ཁྲིད་སྟངས་ག་འདྲ་ཡིན་མིན་སོགས་ནི་མིག་ནང་དུ་མི་ཐོགས་པའི་བྱ་བ་ཆེས་ཕལ་བ་ཞིག་ཏུ་བཞག་ཡོད་པས། དེང་གི་ཕྱི་རྫིག་ནང་སྟོང་གི་བོད་རིགས་དགེ་རྒན་དང་སློབ་མ་འདི་དག་བྱུང་བ་མ་ཡིན་ནམ།
                                                                         ཞེས་གཅན་རྣམ་ཐར་ནས།

རྩོམ་ཁུངས། ངེད་དྲ་བ།