སྐད་ཡིག་ནི་ལག་ཆའི་རང་བཞིན་དང་མི་ཆོས་རང་བཞིན་གཞི་གཅིག་ཏུ་འདྲེས་པའི་རིག་གནས་ཀྱི་སྣང་ཚུལ་ཞིག་སྟེ། མི་ཕན་ཚུན་འབྲེལ་འདྲིས་དང་བསམ་བློ་བརྗེ་རེས། རིག་གནས་རྒྱུད་འཛིན་དང་དར་སྤེལ་བྱེད་པའི་ལག་ཆ་གལ་ཆེན་ཞིག་ཡིན་པས་ན། སྐད་ཡིག་བསླབ་ཚན་འདི་ལ་རྣམ་པ་རྒྱ་ཆེ་ཞིང་ནང་དོན་གཏིང་ཟབ་པ། ཤེས་བྱའི་གནད་
ཆེ་བ་སོགས་ཀྱི་ཁྱད་ཆོས་མངོན་གསལ་ལྡན་ཞིང་བདེན་དགེ་མཛེས་གསུམ་གྱི་མི་ཆོས་སྙིང་སྟོབས་ཁོལ་དུ་ཕྱུང་བའི་རིག་ཚན་མ་ལག་ཅིག་ཡིན། ཡིན་ཀྱང་རང་ཅག་ལ་མཚོན་ན་སྐད་ཡིག་ཅེས་པའི་བསླབ་ཚན་འདི་དར་འཕྱི་བ་དང་སྤེལ་བའི་ཡུན་ཐུང་བས་བདག་གཞན་ གཉིས་ཀྱི་ཆར་ངོས་ཟིན་གསལ་བོ་ཞིག་ཆགས་མེད་པ་དང་། ཞིབ་འཇུག་དང་དོ་སྣང་གིས་མ་འདང་བ་སོགས་ཀྱི་རྐྱེན་དུ་མའི་དབང་གིས་རང་རྐྱ་འཕེར་བའི་རིག་ཚན་མ་ལག་ཅིག་ཏུ་ ཆགས་ཐུབ་མེད། དེ་ལས་ཀྱང་རང་ཅག་ལ་ཚད་ལྡན་གྱི་སྐད་ཡིག་བསླབ་དེབ་དང་དགེ་ རྒན་མེད་པའི་ཁར་དཔྱད་འཇོག་གི་རྣམ་པ་ཆིག་རྐྱང་ཅན་དང་སློབ་ཁྲིད་ཀྱི་ཁ་ཕྱོགས་མག་མོག་ཏུ་གྱུར་བ་སོགས་ཀྱི་གནད་དོན་མི་ཉུང་བ་ཞིག་འདུག
  གཅིག  ཚད་ལྡན་གྱི་བསླབ་དེབ་མེད་པ།
  སྤྱིར་བཤད་ན། ད་སྔ་གང་དུའང་ཚད་ལྡན་གྱི་སྐད་ཡིག་བསླབ་དེབ་ནི་འདིའོ་ཞེས་རྡོག་ རྡོག་ཅིག་སྟོན་རྒྱུ་མི་འདུག ཡིན་ནའང་སྐད་ཡིག་ནི་རིག་གནས་ཀྱི་སྣང་ཚུལ་ཞིག་དང་ འབྲེལ་འདྲིས་ཀྱི་ལག་ཆ་ཞིག འཚོ་གནས་ཀྱི་སྙིང་སྟོབས་ཤིག་ཡིན་པའི་ཆ་ནས་བཤད་ན། སྐད་ཡིག་བསླབ་དེབ་ནི་མ་མཐའ་ཡང་མི་རིགས་རིག་གནས་ཀྱི་ཁྱད་ཆོས་དང་དེས་མཚོན་པའི་བསམ་བློ་དང་འདུ་ཤེས་གཞིར་བྱས་ཐོག འཇིག་རྟེན་འཚོ་སྡོད་ཀྱི་ལྟ་བས་ཁྱབ་པ་ཞིག མི་རིགས་སྙིང་སྟོབས་ཀྱི་སྣ་འདྲེན་དུ་གྱུར་བ་ཞིག སློབ་མའི་བློ་ཁ་དང་འཚམ་ཞིང་སྐད་ དང་ཡི་གེར་འཇུག་པའི་དང་བ་འདྲེན་པ་ཞིག ལོ་རྒྱུས་དང་དུས་རབས་ཀྱི་སྲོག་ཞུགས་པ་ ཞིག་ཡིན་པར་སྙམ་སྟེ། སྐད་ཡིག་བསླབ་དེབ་ནི་སློབ་མ་རྣམས་སྐད་དང་ཡི་གེར་ འཇུག་པའི་སྒོ་མོ་ལྟ་བུ་ཡིན་པས། ཤེས་བྱ་དང་བསམ་བློ། མི་གཞི་དང་ཀུན་སྤྱོད། སྒྱུ་རྩལ་  གྱི་བློ་སྦྱོང་དང་མཛེས་དཔྱོད་ཀྱི་ལྟ་བ་སོགས་རས་ལ་སྣུམ་ཞུགས་པ་བཞིན་ཚིག་རེ་རེ་དང་ ཚན་པ་རེ་རེར་འཐིམས་ནས་ཡོད་ཅིང་། མི་རིགས་རིག་གནས་ཀྱི་ཉིང་བཅུད་དང་མི་ཆོས་ བསམ་བློའི་དྭངས་མ་འདུས་པའི་སྣ་འཛོམས་རང་བཞིན་གྱི་རིག་ཚན་ཞིག་གོ །
  དེ་ཡང་སྐད་ཡིག་ཅེས་པའི་རིག་ཚན་གྱི་མ་ལག་འདི་ནི་བཅིངས་འགྲོལ་བྱས་པའི་  ཚུན་དུ་རྒྱ་ནག་རིག་གནས་ཀྱི་ཤུགས་རྐྱེན་འོག་གསར་དུ་བྱུང་བའི་འཇིག་རྟེན་མི་ཆོས་སློབ་ གསོའི་མ་ལག་ཅིག་རེད། སྤྱིར་མི་རིགས་གང་ཞིག་ཡིན་ཀྱང་རིག་གཞུང་གསར་བ་ཞིག་  ནང་འདྲེན་བྱེད་པར་ཐོག་མར་དེའི་ཚུལ་ལ་ལད་མོ་དང་བར་དུ་ལག་ལེན་བྱས་ཏེ། མཐར་ མི་རིགས་ཀྱི་ཁྱད་ཆོས་ལྡན་པར་སྤེལ་རྒྱུ་ནི་རིག་གནས་འཕེལ་རྒྱས་ཀྱི་སྤྱི་ལུགས་ལྟ་བུ་ཞིག་ ཡིན། ཡིན་ཀྱང་རང་རེས་ད་ལྟའི་ཆར་རྒྱ་ཁྱབ་ཏུ་སྤྱོད་བཞིན་པའི་བསླབ་དེབ་ཁག་ནི་ཕྱི་ རྣམ་པའི་སྒྲིག་གཞིའི་ཆ་ནས་བཤད་ནའང་འདྲ། ནང་བརྗོད་བྱའི་དོན་གྱི་སྙིང་བོའི་ཆ་ ནས་བཤད་ནའང་འདྲ། རྒྱའི་སྐད་ཡིག་བསླབ་དེབ་ལ་ལད་མོ་བྱེད་པ་ཐལ་ཆེ་བའི་ཚུལ་དུ་ འདུག་སྟེ། བོད་སྐད་ཡིག་གི་རྨང་གཞིར་གྱུར་བའི་ཀློག་འདོན་དང་སུམ་རྟགས་དག་གསུམ་ སོགས་རྩིས་མེད་ཀྱིས་ཟུར་དུ་བཞག་ནས་ཡི་གེའི་སྨྱུག་རིམ་དང་གྲུབ་ཚུལ་ངོས་འཛིན་སོགས་ཀྱི་གལ་ཆེན་རང་བཞིན་དམིགས་སུ་བཏོན་ཡོད་པས་སློབ་མ་རྣམས་ལ་སྐད་ཡིག་གི་རྨང་ གཞི་ལེགས་པོ་འདིང་མ་ཐུབ་པར་ཀློག་གིས་ཚིག་མི་ཆོད་པ་དང་དོན་གྱི་གནད་མི་ཐོན་པ། བྲིས་ཀྱིས་དག་མི་འཁྱོངས་པར་གྱུར་ནས་སློབ་མའི་སྐད་ཡིག་ཆུ་ཚད་ཇེ་ཞན་དུ་འགྱུར་ བཞིན་པའི་གླེང་ཕྱོགས་ཛ་དྲག་ཅིག་ཆགས་ཤིང་། མི་རིགས་རིག་གནས་ཀྱི་ཁྱད་ཆོས་དང་ དགེ་མཚན་བོར་ནས་རྒྱ་ནག་གི་གསར་བརྗེའི་ལོ་རྒྱུས་དང་དཔའ་བོའི་ཆེ་བ། ལེ་ཧྥུན་གྱི་ སྙིང་སྟོབས་སོགས་སྒྱུ་རྩལ་གྱི་གསོན་ཉམས་མེད་ཅིང་ཆབ་སྲིད་ཀྱི་བསམ་བློ་སྒྲོག་སྦྱོང་བྱེད་ པའི་ཁ་གཡང་རང་བཞིན་ཅན་གྱི་བསླབ་ཚན་འགྱུར་མ་མང་དྲགས་པས་སློབ་མ་རྣམས་ཀྱི་སྐད་ཡིག་སློབ་སྦྱོང་གི་སྤྲོ་བ་རང་བཞིན་གྱིས་ཉམས་ཤིང་མི་རིགས་ཀྱི་སྙིང་སྟོབས་མེད་པ་ དང་། རིགས་ཞེན་གྱི་ལྷག་བསམ་མེད་པ། སྒེར་གཤིས་དང་བསམ་བློ་མེད་པར་གྱུར་   ནས་སློབ་གསོ་ལ་ཡིད་ཆེས་མེད་པའི་རྣམ་པ་སྡུག་པོ་དེ་ཆགས་པ་རེད།
  དེ་ཡང་སྐད་ཡིག་བསླབ་དེབ་ནི་སློབ་མ་རྣམས་ཀྱི་མི་ཚེ་ལ་སྙིང་བོ་དང་ཚེ་སྲོག་ལ་དོན་སྙིང་བསྩོལ་བྱེད་དེ་ཡིན་ཞིང་། སྒེར་གཤིས་ཀྱི་བསམ་བློ་དང་ཚུགས་ཐུབ་ཀྱི་མི་གཤིས་ བསྐྱེད་བྱེད། འཚོ་གནས་ཀྱི་སྙིང་སྟོབས་དང་ནུས་པ་སྩོལ་བྱེད། མིའི་རིགས་ཀྱི་ཕུལ་བྱུང་རིག་གནས་ལ་ངེས་པ་བསྐྱེད་བྱེད་ཅིག་ཡིན་པས་ན། རང་རེའི་བསླབ་གཞི་ཁག་ཀྱང་མི་རིགས་ཀྱི་ཁྱད་ཆོས་ལྡན་ཞིང་སློབ་མའི་བློ་ཁ་དང་འཚམ་པ། མ་འོངས་པར་ཁ་ཕྱོགས་པ་དང་འཛམ་ གླིང་ལ་ཁ་ཕྱོགས་པའི་རྣམ་པ་ཅན་དུ་ཆགས་པའི་རེ་བ་སྙིང་ནས་ཞུའོ།།
  གཉིས།  ཚད་ལྡན་གྱི་དགེ་རྒན་དཀོན་པ།
  དགེ་རྒན་ནི་མིའི་རིགས་ཀྱི་བླ་སྲོག་གི་འདྲ་བརྙན་བཟོ་མཁན་ཡིན་ལ་ལྷག་པར་དུ་སྐད་ཡིག་དགེ་རྒན་ནི་འདྲ་བརྙན་དེ་ལ་རིག་གནས་ཀྱི་སྙིང་སྟོབས་དང་དུས་རབས་ཀྱི་བླ་ སྲོག་འཇུག་མཁན་དེ་ཡིན་པས་ན། སློབ་གྲྭ་ཞིག་ལ་མཚོན་ནས་བཤད་ན་སྐད་ཡིག་དགེ་ རྒན་ནི་རྐང་འཛིན་པ་ཤ་སྟག་ཏེ་གདུང་མ་འདེགས་པའི་ཀ་བ་ལྟ་བུ་ཡིན་ཞིང་སྙིང་སྟོབས་ ཀྱི་དར་ཆ་ཞིག་གོ །  ཡིད་ཕངས་བ་ཞིག་ལ་རང་རེའི་སྐད་ཡིག་དགེ་རྒན་མང་ཆེ་བས་སྐད་ཡིག་སློབ་ཁྲིད་བྱེད་པའི་གོ་རིམ་ཁྲོད་དུ་སྐད་ཡིག་དགེ་རྒན་ཞིག་གིས་འདོན་འོས་བའི་ནུས་པ་དེ་ཐོན་གྱི་མེད་སྙམ་པའི་དོགས་པ་འཆིང་ཀིན་འདུག་པ་ནི་བརྟག་དཔྱད་མེད་པའི་འོལ་ཚོད་ཀྱི་འཆལ་གཏམ་ཙམ་དུ་ཟད་མོད། ཞིབ་ཏུ་བསམ་ན་གནས་ལུགས་ཅི་ཡང་མེད་ པ་ནི་མ་ཡིན་ཏེ། རང་ཅག་ལ་མཚོན་ན་སྐད་ཡིག་སློབ་ཁྲིད་གཉེར་བཞིན་པའི་དགེ་རྒན་ རྒན་གཞོན་བགྲང་ལས་འདས་པ་ཞིག་ཡོད་པ་གདོན་མི་ཟ། ཡིན་ཀྱང་རང་རེའི་དགེ་རྒན་ཁག་ནི་ཀློག་དང་འགྲེལ་བཤད་དོན་གཉེར་གྱི་ཞོར་ཁྲིད་དགེ་རྒན་ཙམ་ལས་ཚད་ལྡན་གྱི་ཆེད་ལས་དགེ་རྒན་ནི་ཧ་ཅང་དཀོན་པའི་ཚོད་དུ་གདའ།  སྤྱིར་སློབ་གྲྭ་ཆུང་འབྲིང་གི་སྐད་ཡིག་གི་དགེ་རྒན་དག་གི་སྐད་ཡིག་སློབ་ཁྲིད་ཀྱི་ལག་ལེན་པ་དང་རྟོག་དཔྱོད་པ་ཡིན་འོས་ཏེ། སློབ་མའི་འབྲི་ཀློག་དང་ཉན་བཤད། བསམ་གཞིག་དང་ལག་ལེན། གསར་གཏོད་ཀྱི་ནུས་པ་སོགས་ཕྱོགས་ཡོངས་ཀྱི་སྤུས་ཚད་མཐོ་རུ་འདེགས་པར་སེམས་རྣལ་མོས་ཞིབ་ འཇུག་དང་བློ་གཟུ་བོས་དཔྱད་པ་གཏོང་འོས་ཀྱང་། དགེ་རྒན་མི་ཉུང་བ་ཞིག་གིས་སློབ་ ཐུན་གཅིག་གི་འགན་ཁུར་འགྲུབ་ཐབས་ཙམ་ལས་སློབ་ཁྲིད་ཁྲོད་གནས་པའི་གནད་དོན་ དག་ལ་དངོས་ཡོད་ཀྱི་བསམ་གཞིག་དང་དཔྱད་པ་མི་གཏོང་བར་ཤེས་ཐབས་མི་གཙོ་ཚར་ཐབས་གཙོ་བ། བློ་སྒོ་འབྱེད་ཐབས་མི་གཙོ་སྐར་གྲངས་ལོན་ཐབས་གཙོ་བའི་སློབ་ཁྲིད་ཀྱི་ རྣམ་པར་སྒྱིད་ལུག་གིས་འཇུག་བཞིན་ཡོད་ཅིང་། ཐ་ན་སློབ་ཁྲིད་ཀྱི་དམིགས་ཡུལ་དང་ འཆར་གཞི་སོགས་དགོས་ངེས་ཀྱི་གྲ་སྒྲིག་དག་ཀྱང་མི་བརྒྱ་གདོང་གཅིག་གིས་འཐུས་པར་ བྱས་ཏེ་ཡི་གེའི་སྦྱོར་ཀློག་ནས་བརྩམས་ཏེ་སུམ་རྟགས་དག་གསུམ་དང་སྒྲ་ཚད་སྙན་ངག ལོ་རྒྱུས་དང་རྩོམ་འབྲིའི་རྒྱུན་ཤེས་སོགས་གཙོ་བྱས་ཏེ་ཐ་སྙད་ཀྱི་འགྲེལ་བཤད་དང་རྩོམ་པ་པོ་ངོ་སྤྲོད། བརྗོད་བྱ་དང་བསྟན་དོན་སོགས་ཁ་ལྕེ་ཟད་རག་བར་དུ་ཡང་དང་བསྐྱར་དུ་ ནན་གྱིས་འཆད་པ་ལས་སློབ་མའི་ཤེས་བྱ་དང་བསམ་བློ། བསམ་གཞིག་དང་ལག་ལེན། མི་གཞི་དང་ཀུན་སྤྱོད། སྙིང་སྟོབས་དང་ནུས་པ་སོགས་ཕྱོགས་ཡོངས་ནས་སྔོག་འདོན་དང་ གསོ་སྐྱོང་གང་ལེགས་བྱེད་པའི་ཐད་ལ་དོ་སྣང་མི་བྱེད་པ་དང་སློབ་མའི་སྐད་ཡིག་གི་བྱང་ ཚད་མཐོ་རུ་འདེགས་པའི་ཐད་ལ་དཔྱད་པའི་འཇུག་སྒོ་མི་ཡངས་པ། གསར་གཏོད་དང་ ཁྱད་ཆོས་མེད་པ། མདོར་ན་རང་རེའི་དགེ་རྒན་དག་ནི་སྐད་ཡིག་དང་སྐད་ཡིག་སློབ་ཁྲིད་ ལ་རྨོངས་བ་ཤ་སྟག་ཏུ་འདུག་གོ །
  གསུམ།  ཚད་ལྡན་གྱི་དཔྱད་འཇོག་མེད་པ།
  སྤྱིར་བསླབ་བྱ་གང་ཞིག་ལ་མཚོན་ནས་བཤད་ནའང་ཚད་ལྡན་གྱི་དཔྱད་འཇོག་མ་ལག་ཅིག་ཆགས་པར་བྱེད་རྒྱུ་ནི་གནད་ཀྱི་དམ་པ་ཡིན། དེ་ལས་ཀྱང་སྐད་ཡིག་ནི་བཀོལ་སྤྱོད་ རང་བཞིན་ཆེ་བའི་བསླབ་ཚན་ཞིག་ཡིན་པས། རྒྱུགས་གཞི་བཟོ་བར་བསླབ་བྱ་རང་མཚན་པའི་ཁྱད་ཆོས་འབུར་དུ་ཐོན་ཞིང་སློབ་མའི་འབྲི་ཀློག་དང་འཆད་ཉན། བསམ་གཞིག་དང་ དབྱེ་ཞིབ་སོགས་སྐད་ཡིག་དང་རིག་གནས་ཀྱི་བྱང་ཚད་ཚད་ག་འདྲ་ཞིག་ཏུ་ཐོན་ཡོད་མེད་ཅུང་ཡང་དག་པའི་སྒོ་ནས་མཚོན་ཐུབ་པ་ཞིག དགེ་རྒན་གྱི་སློབ་ཁྲིད་དང་སློབ་མའི་སློབ་ སྦྱོང་ལ་ཁ་ཕྱོགས་གསལ་སྟོན་གྱི་ནུས་པ་ལྡན་པ་ཞིག་ཡིན་དགོས་ཏེ། སློབ་མའི་ཤེས་བྱ་དང་བསམ་བློ། རྣམ་དཔྱོད་དང་སྙིང་སྟོབས་སོགས་ཕྱོགས་ཡོངས་ཀྱི་འཇོན་ཐང་དང་བྱང་ཚད་ ངོམས་ས། སྒེར་གཤིས་ཀྱི་བསམ་བློ་སྨིན་སའི་དག་ཞིང་ལྟ་བུ་ཞིག་ཡིན་འོས་མོད། རང་རེའི་དགེ་རྒན་རྣམས་ཀྱིས་རྒྱུགས་གཞི་བཟོ་སྐབས་ཤེས་བྱའི་ཆ་དམིགས་སུ་བཟུང་ནས་མིང་འགྲེལ་དང་རྩ་ཚིག རྩོམ་པ་པོ་སུ་ཡིན་པ་དང་དུས་ནམ་ཞིག་ལ་ཡུལ་གང་དུ་འཁྲུངས་པ་སོགས་གཏན་འཁེལ་གྱི་དྲིས་ལན་ཡོད་པའི་འདྲི་ཚིག་གཞན་དབང་ཅན་ཁོ་ན་བཅའ་བ་དང་། སློབ་མས་ཡིག་འབྲུ་ན་གཅིག་ཀྱང་མ་ཆད་པར་བློར་བཟུང་ནས་ཇི་བཞིན་དུ་བྲིས་ཡོད་ན་ཅི་སྙམ་པའི་ངང་འགྲིག་རྟགས་བརྒྱབ་ནས་སྐར་མ་སྟེར་བ། ཐ་ན་རྩོམ་ཡིག་ལའང་ ཁ་བྱང་དང་བརྗོད་བྱ། ཡིག་གྲངས་ཀྱི་ལོངས་ཚད་གཏན་འཁེལ་བྱས་ནས། ཆ་རྐྱེན་གང་ དག་ཚང་དགོས་པའི་རེ་བ་ནན་མོ་འདོན་པ་སོགས་སློབ་མའི་རང་དབང་གི་བསམ་གཞིག་ལ་བཀག་རྒྱ་བཟོ་བ།མདོར་ན་ང་ཚོས་ད་ལ་ཐུག་གི་བར་དུ་སློབ་དེབ་ཙམ་ལ་རྒྱུགས་བླངས་བ་ལས་སྐད་ཡིག་ལ་རྒྱུགས་མ་བླངས། སྦྱང་བྱ་ཙམ་ལ་རྒྱུགས་བླངས་བ་ལས་འཇོན་ནུས་ལ་རྒྱུགས་མ་བླངས། རྒྱུགས་ཀྱི་ཆེད་དུ་རྒྱུགས་ཙམ་བླངས་བ་ལས་སློབ་མའི་ཆེད་དུ་རྒྱུགས་མ་ བླངས་བར་སྐད་ཡིག་ལོག་ལམ་དུ་བརྫངས་ནས་སློབ་མ་ལོག་ལམ་དུ་བཅུག་པས་སློབ་མའི་ རྒྱུད་ལ་སློབ་སྦྱོང་བྱེད་པ་ནི་རྒྱུགས་ལས་སྐར་མ་ལོན་ཆེད་ཙམ་ཡིན་པའི་ངེས་ཤེས་བསྐྱེད་པ་དང་། སློབ་མར་རྒྱུགས་སྤྲོད་པའི་ནུས་པ་ཙམ་ལས་དགོས་ངེས་ཀྱི་འཇོན་ནུས་དང་སྙིང་ སྟོབས་ཅི་ཡང་བསྐྱེད་མ་ཐུབ། དེ་བས་ཚོས་སེམས་རྣལ་མོས་བསམ་གཞིག་དང་བློ་གཟུ་བོས་ དཔྱད་པ་ནན་མོས་སློབ་ཁྲིད་ལ་ཕན་ཐོགས་ཤིང་སློབ་མ་ལ་གོ་ཆོད་པའི་ཚད་ལྡན་གྱི་སྐད་ ཡིག་རྒྱུགས་གཞི་ཞིག་བཟོ་བའི་ཐད་ལ་འབད་པ་ལྷུར་བླངས་ནས་ཚད་ལྡན་གྱི་དཔྱད་ འཇོག་མ་ལག་ཅིག་ཆགས་པར་བརྩོན་རྒྱུ་ནི་སྐད་ཡིག་དགེ་རྒན་རྣམ་པའི་གཟུར་མེད་ཀྱི་ འགན་འཁྲི་ཞིག་ཏུ་སེམས་སོ། །

                                      ༢༠༡༢ལོའི་ཟླ༥བའི་ཚེས༩ཉིན།

རྩོམ་ཁུངས། ངེད་དྲ་བ།