དུས་ཀྱི་འཁོར་ལོ་བར་མེད་དུ་འཁོར་བས། ང་ཚོ་ཡང་སློབ་གཉེར་གྱི་སྐས་རིམ་གསར་པ་ཞིག་ལ་དགོས་སོང། མ་གཞིར་ང་ཚོར་ཤེས་རིག་དགའ་ཚལ་དུ་ཤེས་བྱའི་ཉིང་བཅུད་བཏུང་བའི་གོ་སྐབས་ལྡན་ཀྱང། སློབ་བུ་རྣམས་ཀྱིས་རང་མོས་ཅི་དགའ་ངང་དུ་དུས་འཁོར་སྐྱེལ་ཅིང་ལེ་ལོའི་་བསླུ་བྲིད་ཀྱི་ཁུད་དུ་ཉལ་བ་ནི་ཤིན་ཏུ་མི་རིགས་པས། དེང་སྐབས་ཀྱི་ང་ཚོ་ནི་མཚར་སྣང་ཅན་གྱི་བྱིས་པ་མིན་པར་མཐོ་རིམ་སློབ་འབྲིང་གི་འཚོ་བར་སོན་པའི་ན་གཞོན་ཞིག་ཡིན་པས་རྐྱེན་གྱིས་ང་ཚོས་ངེས་པར་དུ་དུས་ཀྱི་གོམ་འགྲོས་དང་བསྟུན་ནས་མི་ཚེའི་མ་འོངས་ལ་གདམ་ག་དང་རང་གི་ཕུགས་བསམ་ལ་མནོ་བསམ་བྱེད་དགོས་ཤིང་སློབ་དུས་གསར་པ་འདི་ལ་དེ་བས་འཆར་གཞི་འཆུགས་སུ་མེད་པ་ཞིག་བཞག་དགོས་ངེས་རེད༎
  ཕྱོགས་བཞི་མཚམས་བརྒྱད་ནས་ཡོང་བའི་སློབ་བུ་ཚོས་རང་ཉིད་ཀྱི་མ་འོངས་བའི་འཚོ་བ་དང་ཕུགས་བསམ་མངོན་འགྱུར་བྱེད་པའི་སླད་དུ་རང་ཉིད་ཀྱི་ཤེས་བྱའི་རིག་གནས་སྣ་ཚོགས་སྦྱང་བར་གཞོལ་བཞིན་ཡོད་། ཇི་སྐད་དུ“ཉིན་གཅིག་གི་འཆར་གཞི་འགྲུབ་མིན་ཞོགས་པ་ལ་རག་ལས”ཞེས་པ་དང“ལོ་ཇུས་ལེགས་ཉེས་དཔྱིད་ལ་རག་ལས”ཞེས་ཟེར་བ་བཞིན་ང་ཚོས་སློབ་དུས་གསར་པའི་འཆར་གཞི་འགྲུབ་མིན་ནི་རང་རང་སོ་སོ་ལ་རག་ལས་དགོས།   དེ་བཞིན་སློབ་དུས་གསར་པ་འདི་ལ་ཞུགས་དུས་སུ།  རང་ཉིད་ཀྱི་ཉེས་པ་དང་སྐྱོན་ཆ་མཐའ་དག་རྩྭ་ལྟར་སྤོང་དགོས་པ་ནི་ང་ཚོ་ཀུན་གྱི་འགན་ཁྲི་ཞིག་ཏུ་བརྩིས་པར་ཁར། སྔར་ཡོད་ཀྱི་འདུ་ཤེས་བཟང་པོ་དར་སྤེལ་དུ་གཏོང་དགོས་ཤིང་ད་དུང་རིག་པའི་གནས་ལ་ཤེས་བརྩོན་ཟུང་གིས་འཇུག་རྒྱུའི་དམ་བཅའ་དང་ཐབས་ཤེས་ལག་ཏུ་བསྟར་ནས་མ་འོངས་འདུན་མ་གཉེར་རྒྱུ་ནི་མི་བུ་ཞིག་གི་སྤྱོད་ལུགས་ཡིན། དེ་བས་ང་ཚོས་དུས་གསར་པ་འདི་ལ་འཆར་གཞི་གསར་པ་ཞིག་འཇོག་རྒྱུ་ནི་སྔོན་འགྲོ་ཞིག་དང་།ཐབས་ལམ་ཞིག་ཡིན་པ་ནི་བདེན་དོན་འབའ་ཞིག་ཉིད༎
  འཚོ་བ་ནི་དགའ་སྐྱོ་ཆགས་སྡང་གི་མི་ཚེའི་བརྒྱུད་རིམ་ཞིག་ཡིན། དེ་བཞིན་སློབ་སྦྱོང་གི་འཚོ་བ་ཡང་དགའ་སྐྱོ་འདྲེས་མ་ཞིག་ཡིན་ངེས་ལ་། དཀའ་སྡུག་གི་འཚོ་བའི་རིགས་ཤིག་ཀྱང་ཡིན་སྲིད། དེ་དག་ནི་འཇིག་རྟེན་གྱི་ཆོས་ཉིད་དང་གོམས་གཤིས་ཀྱང་རེད།  དེ་བས་ང་ཚོ་ན་ཆུང་སློབ་གཉེར་བ་དག་གིས་མནོ་བསམ་ཞིབ་མོ་གཏོང་ནས་རང་གི་སྙིང་རུས་དང་བརྩོན་པར་བརྟེན་ནས་མ་འོངས་འཚོ་བར་བཅོས་བསྒྱུར་དང་བཅིངས་འགྲོལ་གཏོང་རྒྱུ་ནི་ངེས་པ་དོན་གྱིས་ཕྱུག་པའི་ལས་དོན་ཞིག་ཡིན། དེ་ཡང་སྙན་གྲགས་ཅན་གྱི་གང་ཟག་ཅིག་གི་ངོས་ནས་བརྗོད་ན་། དང་ཐོག་དཀའ་ངལ་གྱི་ཁུར་པོ་འཁུར་ནས་མཐར་སྐད་གྲགས་ཅན་གྱི་མི་ཞིག་ཏུ་གྱུར་བའི་བརྒྱུད་རིམ་དེ་ང་ཚོས་གསལ་པོར་ཤེས་དགོས། བོད་ཀྱི་ཁ་དཔེར“གོ་དགོས་ན་ཉན་དགོས། ཟ་དགོས་ན་ལས་དགོས”ཞེས་པ་ནང་བཞིན་ང་ཚོས་སྦྱང་འབྲས་གཡུར་དུ་ཟ་བ་ཞིག་ལེན་དགོས་ན་ངེས་པར་དཀའ་ངལ་ལ་མི་འཇེམ་ཞིང་དེའི་བློ་སྤོབས་ཀྱང་ལྡན་དགོས་པ་དེ་ནི་མཐུན་རྐྱེན་ཅིག་རེད། དེར་བརྟེན། སློབ་དུས་གསར་པའི་ནང་དུ་རང་ཉིད་ཀྱིས་རང་དང་འཚམ་པའི་འཆར་གཞི་ལེགས་པོ་ཞིག་བཀོད་ནས་མ་འོངས་པའི་འདུན་ལམ་ལ་བསམ་གཞིགས་བྱེད་རྒྱུ་ནི་མིང་དོན་མཚུངསས་པའི་སློབ་མ་ཞིག་གི་བྱ་ལུགས་ཡིན༎
   ཤེས་ཡོན་གྱིས་ང་ལ་ཐག་རིང་དུ་བལྟ་བའི་མིག་དབང་གནང་ཞིང་བདག་གི་ལས་དབང་ལ་ཁ་ལོ་ཡང་བསྒྱུར་བྱུང།  དེ་བས་ཁོ་བོས་བསམ་ན་ཤེས་ཡོན་ནི་འགྲོ་དྲུག་ཀུན་ལ་རིས་མེད་ཀྱིས་དྲོད་ཁོལ་གནང་བའི་ཉི་མ་དང་འདྲ་ལ་སྡུག་བསྔལ་རིས་མེད་དུ་མནར་བའི་དམྱལ་བའི་ཆོས་རྗེ་ཞིག་ཀྱང་མཚུངས་པར་འདོད། ངོ་མ་རེད།  ཤེས་ཡོན་ལ་ཕྱོགས་རིས་སྤུ་ཙམ་མེད་པས་ང་ཚོས་དྲང་ཐིག་གཅིག་གི་སྟེང་ནས་ཤེས་ཡོན་བརྩོན་པ་བྱེད་རྒྱུ་ནི་སློབ་མ་ཀུན་ལ་དབང་བའི་ཐོབ་ཐང་ཞིག་མ་རེད་དམ༎
    སློབ་དུས་ཀྱི་འཚོ་བ་ནི་སྐས་རིམ་ལ་འཛེགས་པའི་བརྒྱུད་རིམ་ཞིག་དང་ཅི་མི་མཚུངས། དེ་ཡང་ཁོ་བོས་སློབ་དུས་གསར་པ་འཇོག་པའི་འཆར་གཞི་ནི། སློབ་དེབ་ཁག་གི་སྦྱངས་འབྲས་ཡོད་ཚད་ཕྱོགས་ཡོངས་ནས་འཕེལ་རྒྱས་གཏོང་རྒྱུ་དེ་ཡིན། དེ་བཞིན་དགེ་རྒན་གྱིས་སློབ་ཁྲིད་བྱེད་པའི་སྐབས་བསམ་པ་རྒྱ་ཡན་དུ་མི་གཏོང་བར་བློ་རྩེ་གཅིག་སྒྲིམ་དང་ལས་གཉེར་དུས་ཐོག་ཏུ་འབྲི་ནས་དགེ་རྒན་ལ་བསྟབ་རྒྱུ་སོགས་སྔོན་གྱི་སྤྱོད་ལུགས་ལས་ལྡབ་འགྱུར་གྱིས་ལེགས་པོར་ཆགས་རྒྱུ་དེ་ཡིན།  ཇི་སྐད་དུ། “བློ་རྩེ་གཉིས་ཀྱིས་དོན་མི་འགྲུབ། ཁབ་རྩེ་གཉིས་ཀྱིས་གོས་མི་འདྲུབ”ཞེས་པ་བཞིན་དུ་དགེ་རྒན་གྱིས་འཆད་ཁྲིད་བྱེད་པའི་སྐབས་སུ་སློབ་བུས་ལུས་ངག་ཡིད་གསུམ་་དགེ་རྒན་གྱི་ཕྱོགས་སུ་མི་གཏད་པར་འོག་ཏུ་གཏམ་ཤབ་ཤུབ་སྨྲ་བ་དང་ལྐོག་ཏུ་རྩེད་མོ་རྩེ་བ། དཔེ་ཆ་གཞན་ལ་བལྟ་བ་སོགས་བྱེད་ན་གོང་དུ་འཆད་པའི་གཏམ་དཔེ་བཞིན་དོན་དག་གལ་ཆེན་བསྒྲུབ་མི་ཐུབ་ལ་འགྲུབ་ཀྱང་མི་ཐུབ།  དེ་ལས་ང་ཚོས་ལེ་ལོ་དང་རྣམ་གཡེང་སོགས་ཀྱི་སྐྱོན་ཆ་རིང་ནས་སྤངས་ཏེ་སྒོ་གསུམ་དྲི་མ་མེད་པར་དགེ་རྒན་བཟང་པོར་གུས་བཏུད་ཅིང་སློབ་ཁྲིད་ཀྱི་་ནང་དོན་མ་ལུས་སེམས་སུ་འཇོག་རྒྱུ་དང་མི་ཤེས་པ་རྣམས་དགེ་རྒན་ལ་བཀའ་འདྲི་བྱེད་དེ་རང་ཉིད་ཀྱི་སློབ་སྦྱོང་གི་སྦྱང་འབྲས་མཐོར་འདེགས་སུ་གཏོང་རྒྱུ་ནི་རང་གི་འཆར་གཞི་ལེགས་འགྲུབ་ཡོང་རྒྱུའི་གྲུབ་ཆ་དང་སློབ་མ་ཞིག་གི་འོས་འགན་ཞིག་ཀྱང་རེད༎
     སྔོན་བྱོན་མཁས་པའི་གསུང་ལས“རྒྱན་པོ་འགྱེད་དང་འདུས་ལ་བལྟ་བ་དང། ལེ་ལོ་སྡིག་པའི་གྲོགས་ལ་བསྟེན་པ་དང། མཚན་མོ་རྒྱུ་བ་ངན་སོང་གྲགས་པ་ཉམས་པའི་རྒྱུ”ཞེས་ཕ་ཁྲག་དང་རྔུལ་ཆུང་བསགས་པའི་དངུལ་ལོ་རྣམས་དེང་སང་སློབ་བུ་འགའ་ཡིས་འཛེམ་མེད་ངང་རང་ལ་མཁོ་བ་མེད་པའི་ལས་ལ་སྤྱོད་ནས་ཉི་མ་གཏོང་བར་འདུག་ལ་ཤོ་སྦག་སོགས་ལ་རྒྱན་འཛུགས་པ་དང་དྲ་ཁང་དང་ཨར་ཁང་སོགས་སུ་དངུལ་རྣམས་ཆུ་སྤྱོད་སྤྱོད་བྱེད་བཞིན་འདུག། སློབ་མ་དེ་དག་ལ་ནི་སློབ་དུས་གསར་པ་དང་རྙིང་པ་ཅི་རིགས་སུ་སློབ་སྦྱོང་གི་འཆར་གཞི་ཞེས་པ་ནི་ཁོ་ཚོ་དང་འབྲེལ་བ་གཏན་ནས་མེད་པ་ལྟར་དུ་འདུག་ཅིིང་ལྷག་པར་དེ་དག་ལ་མ་འོངས་ཕུགས་བསམ་ཞེས་གླེང་ཀྱང་རྣ་ཅོག་སྐམ་པོར་གསེར་བྱོ་བའི་དཔེ་བཞིན་དགའ༎
    སློབ་ཕྲུག་དེ་རིགས་ལ་བདག་རང་སེམས་གཏིང་ནས་ཤ་ཞིག་ཚ་བར་ཐལ་ལ་སུན་སྣང་ཡང་སྐྱེས་སོང། དེ་བས་བུ་ཆུང་བདག་གིས་སེམས་གཏིང་གི་སྙིང་གཏམ་དྲོན་མོ་ཞིག་འཆད་པར་འདོད། སློབ་བུ་ལགས། ང་ཚོ་ནི་མ་འོངས་མེས་རྒྱལ་དང་གངས་ལྗོངས་གསར་པའི་བློ་འགེལ་ས་ཡིན་པས། ད་ནས་བཟུང་སྟེ། སྤོབས་པ་ཆེར་བསྐྱེད་ཀྱིས་ཉེས་པ་རྒྱུ་དྲུག་སྤང་སྟེ་སློབ་སྦྱོང་ལ་བསམ་པའི་ཁ་ལོ་སྐྱོག་པ་དང།“དགོན་པར་ཁྲིམས་མེད་ན་དམ་ཉམས་ལུང་པ་གང”ཞེས་པའི་དཔེ་ལྟར་ཐོག་མཐའ་ཀུན་ཏུ་རང་གིས་རང་ཉིད་ནི་སློབ་མ་ཞིག་ཡིན་པར་ཤེས་དགོས་ཤིང་སློབ་གྲྭའི་སྒྲིག་ཁྲིམས་སྲུང་རྒྱུ་ནི་དོན་ཀུན་འགྲུབ་རྒྱུའི་རྩ་བ་ཡིན།  ལྷག་པར་དུ་སློབ་དུས་གསར་པ་ཞིག་ལ་སློབ་སྦྱོང་གི་འཆར་གཞི་ལེགས་པོ་ཞིག་བཀོད་དེ་རང་གི་ལང་ཚོའི་དུས་སྐབས་ཆུད་ཟོས་སུ་མི་གཏོང་བར་ཤེས་རིག་གི་ཉིང་བཅུད་འཐུང་ན་དགའ་བར་སྙམ༎
   དེ་ཡང་སྔོན་བྱོན་མཁས་པས་གསུངས་པའི “མཁས་པ་ཡོན་ཏན་དཔག་མེད་ཀྱང་་༎ གཞན་གྱི་ཡོན་ངུ་ལེན”ཅེས་པའི་དོན་གྱི་ཉིང་བཅུད་བླངས་ཏེ་ཐོས་འཚོལ་གྱི་ལམ་བུ་ཁྲོད་དུ་ང་མཐོང་ང་ཆེའི་མགོ་འཕང་མ་བཏེག་ནས་ཁེངས་སྐྱུང་དང། གུས་ལུགས། དེ་བཞིན་བརྩོན་སེམས་ཀྱིས་རིག་པ་ཀུན་ལ་རིས་མེད་དུ་སྦྱོང་རྒྱུ་ནི་ཧ་ཅང་གལ་ཆེ། དེའི་ཁར་རང་ཉིད་དང་འཚམ་པའི་སློབ་སྦྱོང་གི་ཐབས་ཤེས་ཡག་པོ་ཞིག་འཚོལ་དགོས་པ་མ་ཟད་ཐབས་ཤེས་དེ་ལག་ཏུ་བསྟར་དགོས༎
  བདག་གི་སློབ་དུས་གསར་པའི་འཆར་གཞི་གཙོ་ཆེ་ཤོས་ནི་རིག་པ་ཁག་ལ་སྦྱོང་བརྩོན་བྱེད་རྒྱུ་ནི་སྨོས་མི་དགོས་པའི་ཁར། ལྷག་པར་བོད་རང་ཉིད་ཀྱི་སྐད་ཡིག་ཕྱོགས་ལ་བརྩོན་པའི་སྲོག་གི་དབང་པོ་བསྟིམ་དགོས་ཀྱང།  འདི་ཉིད་མི་ཉམས་གོང་སྤེལ་མཛད་རྒྱུའི་དམ་བཅའ་རི་མོ་སྙིང་ག་རྡོ་ཡི་ངོས་སུ་བརྐོས་ཡོད། དེ་ནི་བདག་གི་འཆར་གཞི་རྟག་བརྟན་ཅིག་ཡིན་པ་དང་ཁྱོད་རྣམ་པར་སྐུལ་བའི་སྙིང་གཏམ་ཚིག་གསུམ་མམ་རང་གི་སྐད་ཡིག་ལ་གཅེས་འཛིན་བྱེད་དགོས་པའི་འདུ་ཤེས་ཤིག་ཆགས་ཐུབ་པའི་རེ་སྨོན་ཀྱང་ཡིན༎
  སློབ་གྲོགས་ལགས། དུས་ཚོད་ལ་ཕྱིར་ལྡོག་མེད་ཅིང་དར་བབས་ཐོས་འཚོལ་གྱི་དུས་སྐབས་འདི་ཡང་འུ་ཚོ་འཚར་ལོངས་བྱུང་བའི་ཞོར་དུ་རིམ་བཞིན་ལ་ཁའི་ཉི་མ་ཇི་བཞིན་དུ་ཡལ་བཞིན་འདུག། མཐོ་འབྲིང་གི་ལོ་གསུམ་ནི་དེར་འཐབ་རྩོད་བྱེད་དགོས་པའི་དུས་སྐབས་དང་མ་འོངས་མི་ཚེའི་ཁ་ཕྱོགས་བྱེད་པོ་ཞིག་ཡིན་པ་ནི་ཀུན་གྱིས་ཤེས་གསལ་ལགས་མོད།  འོན་ཀྱང།  འུ་ཚོ་འདི་ལྟར་སྒྱིད་ལུག་གི་མལ་དུ་ཉལ་ནས་བསྡད་ན། མ་འོངས་མེས་རྒྱལ་དང་གངས་ལྗོངས་ལ་སྨན་པའི་ལས་དོན་ཞིག་བསྒྲུབ་རྒྱུ་ཕར་ཞོག།། ཐ་ན་རང་གི་མི་ཚེ་ཧྲིལ་པོ་ཡང་སྤྱི་ཚོགས་ཀྱི་གད་སྙིགས་དང་དུས་རབས་ལ་མཁོ་མེད་བ་མེད་པ་ཞིག་ཏུ་འགྱུར་ཉེས་ཡོད་པས། ད་ནས་བཟུང་སྟེ། སློབ་དུས་གསར་པ་ལ་འཆར་གཞི་དང་རང་གི་མི་ཚེ་ལ་ཁ་དོག་བསྐྲུན་པའི་རིག་པའི་པིར་རུ་སྙིང་རུས་ཚོན་གྱི་ཁུ་བ་བླུག་རྒྱུ་ནི་ང་ཚོ་ཀུན་གྱི་འོས་འགན་ཉག་ཅིག་ལགས༎

རྩོམ་ཁུངས། ངེད་དྲ་བ།